Jeremías 34 - Bible in Tzeltal Bachajón

Jeremías ya stsits Sedequías

¹ Ha te sc'op Jehová te tal ta stojol Jeremías c'alal la ya'beyic guerra te Jerusalén te Nabucodonosor ajwalil yu'un Babilonia soc spisil te soldadohetic yu'un, spisil te nacionetic te cuentahimbilic yu'un soc spisil te pueblohetic yu'un, hich la yal:

² Hich yaloj te Jehová, te Dios yu'un Israel: Bahan, halbeya te Sedequías ajwalil yu'un Judá te hich yaloj te Jehová: Ya cac' ta sc'ab te ajwalil yu'un Babilonia te pueblo ini, ha ya schic' ta c'ahc'.

³ Te ha'ate ma ba ya xcolat loq'uel ta sc'ab, ya me xtsacotat soc ya x'ac'otat ta sc'ab. Ya me awil ta asit te ajwalil yu'un Babilonia te ya sjucat ta c'op ta asit; soc ya me xbahat ta Babilonia.

⁴ Pero, Sedequías ajwalil yu'un Judá, a'iya me awa'iy bin ya yal te Jehová, yu'un hich ya yalbat ac'oblal: Ma ba ya xlajat ta espada;

⁵ jun awo'tan ya xchamat. Soc hich te bin ut'il la schiq'uic bintic sumet yic' c'alal chamic te me'iltatiletic awu'un, ha te ajwaliletic te nahil ay awu'un, hich me ya schiq'uic ta acuenta soc hich me ya yoq'uetayat: ¡Ay, ajwalil! xchihic, como ho'on caloj te c'op ini, xchi te Jehová.

⁶ Hich te jalwanej Jeremías la yalbe spisil te c'op ini te ajwalil Sedequías ta Jerusalén,

⁷ c'alal te soldadohetic yu'un te ajwalil yu'un Babilonia yacalic ta ya'beyel guerra a te Jerusalén soc spisil te yantic pueblohetic yu'un Judá te hilemic to, ha te Laquis soc Azeca; como ha nax te pueblohetic ini te joytaybilic ta ts'ahc te hilemique.

Sc'axuntayel bin chapal te ya xhil ta libre hebreohetic te ayic ta mosohil

⁸ Te sc'op Jehová te tal ta stojol Jeremías c'alal lajix yo'tan a te Sedequías ta schapel c'op soc spisil te ants-winiquetic ta Jerusalén te ha ya xhilic ta libre te mach'atic ayic ta mosohil,

⁹ te jujutuhl ya me yac' ta libre te mach'atic ayic ta mosohil yu'unic, chican teme winic o ants; ma me ayuc mach'a ya smosohin te slumale.

¹⁰ Spisil te jtsobawetic soc spisil te pueblo, te c'alal la ya'iyic te bin chapbil, ha te ya me yaq'uic ta libre te winiquetic soc antsetic te ayic ta mosohinel yu'unic, te mayuquix mach'a ya smosohinic, la sch'uhunic spasel soc la yaq'uic ta libre.

¹¹ Pero patil la suht sc'opic, la scha'iq'uic xan ta mosohinel te winiquetic soc antsetic te yac'ojiquix ta libre.

¹² Ha yu'un tal te sc'op Jehová ta stojol Jeremías, hich la yal:

¹³ Hich yaloj te Jehová, te Dios yu'un Israel: La jchahp jc'op soc te ame'atatic te c'alal la jloq'ues tal ta sq'uinal Egipto, ta banti ayic ta mosohinel, hich la jcal:

¹⁴ Ta shuquebal ha'bil jujutuhl ya me yaq'uic ta libre te yermano hebreo te schonoj sba ta stojolique. Ta waqueb ha'bil ya yac' sba ta a'batinel awu'un, patil ya me awac' ta libre. Pero te ame'atatic ma ba la ya'iybonic jc'op, ma ba la yich'onic ta cuenta.

¹⁵ Yo'tic la asuhtes awo'tanic, la apasic te bin toj ta jtojol, jujutuhlex la awaq'uic ta libre te alumalique; la achap ac'opic ta jtojol ta na banti ya yich' halel te jbihile.

¹⁶ Pero cha'suhtexix ta apatic soc la abohlobtesbonic te jbihile; jujutuhlex la acha'iq'uic xan te winic soc ants te awac'ojiquix ta libre te mach'a la sc'anique, la acha'otsesic xan ta mosohil.

¹⁷ Ha yu'un hich yaloj te Jehová: Ma ba la ach'uhumbonic jc'op, ma ba la awaq'uic ta libre te alumalic, te amohloltaque. Ha yu'un ya cac'at ta libre, xchi te Jehová, ha te libre ya xlajat ta espada, ta jmilawal-chamel soc ta wi'nal. Ya cac' te xiweltic sba ya xc'ohex ta stojol spisil te nacionetic ta bahlumilal.

¹⁸ Te winiquetic te la sc'axuntaybonic te chapbil-c'op cu'un, te ma ba la sc'ohtesic ta pasel te bin ya yal te chapbil-c'op la spasic ta jtojol, te c'alal la sjatic ta ohlil te jcolel toro soc te c'axic bahel ta yohlil,

¹⁹ ha te príncipaletic yu'un Judá soc yu'un Jerusalén, te mach'atic ay ya'telic, te sacerdotehetic soc spisil te ants-winiquetic ta q'uinal te c'axic bahel ta yohlil te jatbil toro,

²⁰ ya cac'ticlan ta sc'ab te scontratac soc ta sc'ab te mach'atic ya xlehbot scuxlejalic yu'un. Te schamen baq'uetalic ya xti'otic yu'un mutetic ya xwihlic ta toyol soc ha'mal chambahlametic.

²¹ Soc te Sedequías ajwalil yu'un Judá soc te príncipaletic ya cac' ta sc'ab scontratac soc te mach'atic ya xlehbot scuxlejalic yu'un, ta sc'ab soldadohetic yu'un te ajwalil yu'un Babilonia, te loq'uemiquix ta atojolique.

²² Ya cal mandar, xchi te Jehová, soc ya cac' te ya suhtic tal ta pueblo ini. Ya me ya'beyic guerra, ya me yu'untayic soc ya me ya'beyic sc'ahc'al. Soc ya cac' te ya xlaj te pueblohetic yu'un Judá, mayuc mach'a ya xhil ta nahinel tey a, xchi.