Jeremías 26 - Bible in Tzeltal Bachajón

La yalbeyic smilel Jeremías

¹ Ta shahchibal te ay ta ajwalil yu'un Judá te Joacim snich'an Josías, tal te sc'op Jehová,

² hich la yal: Hich yaloj te Jehová: Tehc'ana aba ta yamaq'uil te sna Jehová, c'opona spisil te mach'atic talemic ta pueblohetic yu'un Judá yu'un ya sch'uhuntayic ta sna Jehová, halbeya spisil te c'opetic la jcalbat ta mandar te yac awalbe; ma me ayuc jp'ahluc te ma xawale.

³ Ya wan ya'iyic, hich jujutuhl ya yihquitayic hilel te chopol be yu'unique; hich ya jsut jc'op yu'un te bin chopol jnopoj te ya jpasbe yu'un te schopol a'telique.

⁴ Hich yac awalbe: Hich yaloj te Jehová: Teme ma ba yac awich'bonic ta cuenta soc ma ba yac at'unic te Ley cu'un te la jca'beyexe,

⁵ teme ma ba yac awa'iybeyic sc'op te jalwanejetic, te a'batetic cu'un te bayel buelta la jticombeyex tal, te ma ba la awa'iybeyic te sc'opique,

⁶ ya cac' te hich ya xc'oht te na ini te bin ut'il Silo soc te pueblo ini ya cac' te ma lecuc sc'oblal ya xc'oht ta stojol spisil te nacionetic ta bahlumilal, xchi.

⁷ Te sacerdotehetic, te jalwanejetic soc spisil te pueblo la ya'iyic bin la yal te Jeremías ta sna Jehová.

⁸ C'alal laj yo'tan te Jeremías ta yalel spisil bintic halbot ta mandar yu'un Jehová, te sacerdotehetic, te jalwanejetic soc spisil te pueblo la stsaquic, hich la yalic: ¡Ya me xlajat!

⁹ ¿Bin yu'un yac awal sc'op-jalwanej ta scuenta sbihil te Jehová, te hich yac awal: Te na ini hich ya xc'oht te bin ut'il Silo soc te pueblo ini jimbil ya xc'oht soc mayuc mach'a ya xnahin tey a? te xchihate, xchihic. Spisil te pueblo la sjoytayic te Jeremías ta sna Jehová.

¹⁰ Te príncipaletic yu'un Judá, c'alal la ya'iyic, loq'uic tal ta sna ajwalil, bahtic ta sna Jehová, la shuhcan sbahic ta Yach'il Ochibal yu'un te sna Jehová.

¹¹ Te sacerdotehetic soc te jalwanejetic hich la yalbeyic te príncipaletic soc spisil te pueblo: Te winic ini ya sc'an ya yich' milel, como la yal sc'op-jalwanej ta scontrahinel te pueblo ini, hich te bin ut'il awa'iyej ta achiquinic, xchihic.

¹² Te Jeremías c'opoj ta stojol spisil te príncipaletic soc spisil te pueblo, hich la yal: Te Jehová la sticonon ta yalel sc'op-jalwanej ta scontrahinel te templo ini soc te pueblo ini ta spisil te c'opetic awa'iyejique.

¹³ Lecubtesahic te behetic awu'unic soc te awa'telic, ch'uhumbeyahic te sc'op te Jehová, te Dios awu'unique; hich ya sut sc'op te Jehová ta spasel te bin chopol yaloj te ya spasbeyexe.

¹⁴ Te ho'one ayon ta ac'abic, pasbonic te bin lec soc te bin toj yac awa'iyique.

¹⁵ Pero na'ahic me teme yac amilonic, ya xc'oht ta atojolic te sch'ich'el mach'a mayuc smul soc ta stojol te pueblo ini soc te mach'atic nahinemic tey a, como melel sticonejon ta atojolic te Jehová yu'un ya calbeyex spisil te c'opetic ini te yac awa'iybelique, xchi.

¹⁶ Te príncipaletic soc spisil te pueblo hich la yalbeyic te sacerdotehetic soc te jalwanejetic: Ma sc'an te ya x'ac'ot ta lajel te winic ini, como la sc'oponotic ta scuenta sbihil Jehová te Dios cu'untique, xchihic.

¹⁷ Ha yu'un cha'oxtuhl mamaletic yu'un te q'uinal la stehc'an sbahic hahchel, hich la yalbeyic spisil te pueblo te stsoboj sbahic:

¹⁸ Te Miqueas te talem ta Moreset c'opoj ta sc'op-jalwanej te c'alal ay ta ajwalil yu'un Judá a te Ezequías, hich la yalbe spisil te pueblo yu'un Judá: Hich yaloj te Jehová te scuentahinej spisil: Te Sión ya yich' tuquel ta arado hich te bin ut'il q'uinal, te Jerusalén ya xc'atp'uj ta busul jinel soc te wits yu'un te templo ya xnoj ta pimil q'uinal, xchi.

¹⁹ Te Ezequías ajwalil yu'un Judá, soc spisil Judá, ¿la bal smilic te Miqueas? ¿Ma bal ha'uc la yich' ta muc' te Jehová soc la sc'ambe te lecuc yo'tan ta stojol? ¿Ma bal lajuc sut sc'op te Jehová yu'un te bin chopol yaloj te ya spasbe? ¿Ya bal cac' taluc ta jtojoltic te bin c'ax chopole? xchihic.

²⁰ Ay yan winic te c'opoj ta sc'op-jalwanej ta scuenta sbihil Jehová, ha te Urías snich'an Semaías, te talem ta Quiriat-jearim, c'opoj ta scontrahinel te pueblo soc te q'uinal ini, hich te bin ut'il la yal te Jeremías.

²¹ Te ajwalil Joacim soc spisil mach'atic muc' ya'telic soc spisil te príncipaletic, la ya'iyic te bin la yale. Te ajwalil c'an smil; pero c'alal hich la ya'iy te Urías, la xi', hich ahn bahel ta Egipto.

²² Te ajwalil Joacim la sticon bahel ta Egipto te Elnatán snich'an Acbor soc yantic winiquetic.

²³ La yiq'uic loq'uel tal ta Egipto te Urías, la yiq'uic ta stojol te ajwalil Joacim, te ha la smil ta espada soc la sch'ojbe bahel sbaq'uetal ta comon muquenal.

²⁴ Pero te Ahicam snich'an Safán c'opoj ta scoltayel te Jeremías scuenta yu'un ma ba ya x'och ta sc'ab te pueblo yu'un ya smilic.