Jeremías 23 - Bible in Tzeltal Bachajón

Ya suhtic talel te mach'atic cuxulic hilel

¹ ¡Obol sbahic te jcanan-tuminchijetic te ya slajinlanic soc ya spucticlanic bahel te tuminchijetic cu'un! xchi te Jehová.

² Ha yu'un te Jehová, te Dios yu'un Israel, hich ya yalbe te jcanan-tuminchijetic te ya scanantaybonic te pueblo cu'un: Ha'ex la apucticlanic bahel te tuminchijetic cu'un soc la axiwteslanic; ma ba la acanantayic. Ha yu'un ya ca'bat castigo yu'un te schopolil awa'telique, xchi te Jehová.

³ Te tuminchijetic cu'un te cuxulic hilel ho'on ya jtsobticlan tal ta spisil q'uinaletic ta banti la jtenticlan bahele, ya cac' te ya suhtic tal ta aquiltic yu'unic; tey ya xmuc'ubic soc tey ya sp'ohl sbahic a.

⁴ Ya cac'ticlambe jcananetic te ya scanantayique. Ma ba ya xiwiquix, ma ba ya smel yo'tanic, soc ma xch'ay jcohtuc, xchi te Jehová.

⁵ Ya me xtal sc'ahc'alel, xchi te Jehová, te ya jchicnajtes jtuhl spuhl te David te toj yo'tan, ha ya x'och ta ajwalil, ya scuentahin soc sp'ijil yo'tan, soc toj me ya ya'iy chahpanwanej soc ya spas te bin toj ta pasel ta q'uinal.

⁶ Ya xcol Judá ta sc'ahc'alel soc te Israel jun yo'tan ya x'ayin. Hich ya xc'oht te sbihil te ya x'a'bote: Jehová, te mach'a cu'untic te toj yo'tan, xchi.

⁷ Ha yu'un ya xtal sc'ahc'alel, xchi te Jehová, te ma hichuc ya yalic xan: Yiloj Jehová te la sloq'ues tal ta sq'uinal Egipto te israeletic, ma me xchihuquic;

⁸ pero hich me ya yalic: Yiloj Jehová te la sloq'uesbe tal te sts'umbal Israel ta q'uinal ta stojol norte soc ta spisil te q'uinaletic banti la spucticlan bahel, xchihic. Hich ya xnahinic ta sq'uinalic, xchi.

Sc'oblal lotil jalwanejetic

⁹ Hich ay sc'oblal te jalwanejetic: Pich'il co'tan ya ca'iy, ya xnihc spisil jbaquel. Ta scaj te Jehová soc te sch'ul c'op hichon te bin ut'il jyacubel, hichon te bin ut'il jtuhl winic te u'untaybil yu'un vino.

¹⁰ Como nojel ta j'antsiwejetic te q'uinale; ta scaj te halbil chopol sc'oblal, taquij te q'uinal soc taquij te aquiltic ta jochol taquin q'uinal. Chopol te be yu'un te jalwanejetic soc ma stojiluc ya stuhunic te yipique.

¹¹ Te jalwanej soc te sacerdote ma lecuc sc'oblalic; ta templo cu'un la jta te schopolilique, xchi te Jehová.

¹² Ha yu'un te be yu'unic hich ya xc'oht te bin ut'il bilil be ta yihc'al q'uinal, ya yich'ic tsulq'uinel, ya xyahlic tey a; yu'un ya quich'be tal bin chopol ta stojolic te bin ha'bil ya xtal te castigo yu'unique, xchi te Jehová.

¹³ Ta yohlil te jalwanejetic ta Samaria la jquil te bintic ma smulan co'tan: la yalic sc'op-jalwanej ta scuenta Baal, hich la showiytesbonic te pueblo Israel cu'une.

¹⁴ Soc ta yohlil te jalwanejetic ta Jerusalén, quiloj bintic ilobtic sba: ya ya'iyic antsiwej soc ya ya'iyic lot, ya ya'beyic yip yo'tanic te mach'atic chopolic, scuenta yu'un mayuc mach'a ya suhtes yo'tanic yu'un te bin chopol ya spase. Hich c'ohemic ta co'tan te bin ut'il Sodoma, te mach'atic nahinemic tey a hich c'ohemic te bin ut'il Gomorra.

¹⁵ Ha yu'un te Jehová te scuentahinej spisil hich ya yalbe sc'oblal te jalwanejetic: Ya cac'ticlambe swe'ic ch'ahco' soc ya cac'ticlambe yuch'ic ha' te yich'oj veneno, como ta scuenta te jalwanejetic ta Jerusalén te puhc bahel ta spahmal q'uinal te ma xyich'ic ta muc' te Diose, xchi.

¹⁶ Hich yaloj te Jehová te scuentahinej spisil: Ma xawa'iybeyic sc'op te jalwanejetic te ya yalbeyex sc'op-jalwanej; ya ya'beyex smuc'ul awo'tanic te toyol ay. Ya yalbeyic sc'oblal snahalsitic te talem ta yo'tanic, ma ha'uc te bin halbotic yu'un te Jehová.

¹⁷ Spisil ora hich ya yalbeyic te mach'atic ya sp'ajonic: Ya yal te Jehová te ay me lamal q'uinal ta atojolic, xchihic. Soc hich ya yalbeyic te mach'atic ya st'unic te tulan yo'tanique: Ma ba ya xtal ta atojolic te bin chopol, xchihic.

¹⁸ Pero ¿mach'a c'oht stehc'an sba ta chahpajibal yu'un Jehová yu'un ya yil soc ya ya'iybe te sc'ope? ¿Mach'a la ya'iybe ta lec te sc'ope?

¹⁹ Ilawil, te tulan yic'al ha'al yu'un Jehová tulan ya xloc' bahel; tulan sutu-ic' ya xc'oht ta stojol te mach'atic chopolique.

²⁰ Te yilimba Jehová ma xquehchaj ha to c'alal ya xc'oht ta pasel te bintic snopoj ta yo'tan. Ta patil bahel ya me xc'oht ta awo'tanic.

²¹ Ma ho'ucon jticonej te jalwanejetic ini, pero ahnimajic bahel; ma ba la jc'oponlan, pero la yalic sc'op-jalwanej.

²² Te ha'uc c'ohtic ta chahpajibal cu'un, la yalbonic jc'op ta stojol te pueblo cu'un soc la ya'be yihquitayic hilel te chopol be st'unojic soc te chopol ya'telic te hichuque.

²³ ¿Ha nax bal Dioson te nopol ayon, xchi te Jehová, ma bal ha'uc Dioson te namal ayone?

²⁴ ¿Ay bal mach'a ya xhu' ya snac' sba te banti ma xhu' ya quil? xchi te Jehová. ¿Ma bal nojeluc cu'un te ch'ulchan soc te bahlumilal? xchi te Jehová.

²⁵ Ca'iybeyej te bin ya yalic te jalwanejetique, ha te ya yalic lotil sc'op-jalwanej ta scuenta te jbihile. ¡Ay jwayich, ay jwayich! xchihic.

²⁶ ¿Jayeb xan c'ahc'al te hich ay ta yo'tanic te jalwanejetic te ya yalic lotil c'op, te ya yalic te lo'loywanej te ay ta yo'tanique?

²⁷ Ta scuenta te swayichic te ya yalbe sbahic, ¿ya bal scuyic te hich ya yac' ch'ayucon ta yo'tan a te pueblo cu'un, hich te bin ut'il ch'ay te jbihil ta yo'tanic te sme'static ta scaj te Baal?

²⁸ Te jalwanej te ay swayich, ac'a yal te swayiche; pero te mach'a yich'oj te jc'ope, ac'a yal ta melel. ¿Bin yochelic a te taquin ac soc te trigo? xchi te Jehová.

²⁹ ¿Ma bal pajaluc soc c'ahc' te jc'ope, xchi te Jehová, soc ma bal pajaluc soc martillo te ya swuy te tone?

³⁰ Ha yu'un, ya jcontrahin te jalwanejetic, xchi te Jehová, te talel c'axel ya yelc'ambe sbahic te jc'ope.

³¹ Hich ya yal te Jehová: Ya jcontrahin te jalwanejetic te ya ya'be schi'il te sc'opic, te hich ya yalic: Hich yaloj te Jehová, te xchihique.

³² Melel ya jcontrahin te jalwanejetic te ya yalic slotil wayichic, te ya yalbeyic te pueblo cu'un, te hich ya yac' howiyuc ta scuenta slotic soc sbaba-c'opic. Ma ba la jticon soc ma ba la jcalbe mandar. Mayuc bin lec loq'uem yu'unic a te pueblo ini, xchi te Jehová.

³³ Te pueblo ini, o jtuhl jalwanej, o jtuhl sacerdote teme hich ya sjoc'obat: ¿Bin a te sc'op-jalwanej yu'un te Jehová? teme xchihe, hich xawalbe: Hich ay te sc'op-jalwanej: Ya quihquitayex hilel, xchi te Jehová.

³⁴ Teme hich ya yal jtuhl jalwanej, o jtuhl sacerdote, o jtuhl swinquilel te pueblo: Ha sc'op-jalwanej yu'un Jehová ini, teme xchihe, ya ca'be castigo soc te mach'atic ay yu'une.

³⁵ Jujutuhlex hich yac awalbe te apat-axuhc o te awermano: ¿Bin la sjac' te Jehová? ¿Bin la yal? xchihex.

³⁶ Ma me hichuc xawalic xan: Ha sc'op-jalwanej yu'un Jehová ini, ma xchihuquex, como te sc'op te jujutuhl ha nix sc'op-jalwanej c'ohem yu'un, hich yac ahowiytes te sc'op te cuxul Dios, te Jehová te scuentahinej spisil, te Dios cu'unique.

³⁷ Hich yac awalbe te jalwanej: ¿Bin la sjac'bat te Jehová? ¿Bin la yal? xchihat.

³⁸ Teme hich yac awal: Ha sc'op-jalwanej yu'un Jehová ini, teme xchihate, hich ya yal te Jehová: Te bin ut'il hich la awalic: Ha sc'op-jalwanej yu'un Jehová, xchihat, aunque la jcalbeyex te ma hichuc xawalic: Ha sc'op-jalwanej yu'un Jehová ini, te xchihone,

³⁹ ha yu'un ya jch'ayex ta co'tan soc ya jbulex loq'uel ta jtojol, ha'ex soc te pueblo la jca'beyex soc te ame'atatique.

⁴⁰ Soc ya caq'uex ta q'uexlal spisil ora, ta pehc'anel sbahtel q'uinal te ma ba ya xch'ayot ta o'tanil, xchi.