Jeremías 2 - Bible in Tzeltal Bachajón

La yihquitayic sch'uhunel Jehová te Israel

¹ Tal te sc'op Jehová ta jtojol, hich la yal:

² Bahan, halbeya te Jerusalén te hich ya yal te Jehová: Ya jna' te c'alal ach'ixat to a jun awo'tan ta jtojol, te c'uxon ta awo'tan te c'alal jmacojat a, te la at'unon bahel ta jochol taquin q'uinal, ta q'uinal te mayuc bin ts'umbil tey a.

³ Ch'ultesbil a te Israel ta stojol Jehová, ha sba sit sts'unubil. Spisil te mach'atic la slajinic la sta smulic yu'un; chopol bin c'oht ta stojolic, xchi te Jehová.

⁴ A'iybeya awa'iyic sc'op te Jehová, pueblohex yu'un Jacob, soc spisil ta chahp yu'un Israel.

⁵ Hich ya yal te Jehová: ¿Bin ma lecuc la stahbonic te ame'atatic, te q'uejel bahtic ta jtojol, te la st'unic bahel te bin ma xtuhun, te hich mayuc sc'oblal c'ohtic?

⁶ Ma ba la yalic: ¿Banti ay te Jehová te la sloq'uesotic tal ta Egipto, te la yic'otic bahel ta jochol taquin q'uinal, ta taquin q'uinal soc hemeltic, ta taquin lum soc yaxinal lajel, ta lumq'uinal te mayuc mach'a c'axem tey a soc mayuc mach'a ya xnahinic tey a? ma xchihuquic.

⁷ Ho'on la jquiq'uex tal ta lequil q'uinal scuenta yu'un yac awe'beyic sit te awal ts'unubic soc te bintic lec tey a. Pero tal abohlobtesbonic sc'oblal te q'uinal cu'un soc la awaq'uic te ilobtic sba c'oht te bin quich'oje.

⁸ Te sacerdotehetic ma hichuc la yalic: ¿Banti ay te Jehová? ma xchihuquic; soc te mach'atic yich'ojic te Ley ma ba la sna'bonic jba; te jcananetic la stoy sbahic ta jtojol, te jalwanejetic c'opojic ta scuenta te sbihil Baal soc la st'unic bahel te bintic ma xtuhunique.

⁹ Ha yu'un ya jtijex ta c'op yu'un ya jcontrahinex, xchi te Jehová, ya jchahpan yu'un scontrahinel te yal-snich'nab te awal-anich'nabique.

¹⁰ C'axanic bahel ta ti'mar yu'un Quitim soc ila awilic, ticonahic bahel ta Cedar soc tsahtaya awilic ta lec; ilawil teme ay hich c'ohem ta pasele.

¹¹ ¿Ay bal nación te syanijtesej te diosetic yu'un, aunque ma ha'uc diosetic? Pero te pueblo cu'un la sjeltay te yutsilal ta bin jc'axel ma xtuhun.

¹² ¡Xchamuc awo'tan yu'un, ch'ulchan! ¡Nihcan yu'un tulan xiwel! xchi te Jehová.

¹³ Cha'chahp mulil la spas te pueblo cu'une: ha te la yihquitayon, ho'on te cuxul sloq'uib-ha'on, soc la shotic yawil ha' yu'unic, ha yawil ha'etic te lohmenic te ma xhil ha' tey a.

¹⁴ ¿Ha bal a'bat te Israel? ¿Ayin bal ta mosohil? ¿Bin yu'un hiche te pojbil biluc c'ohem?

¹⁵ Te chojetic awonic ta scontrahinel, tulan awonic soc la sjinic hilel te sq'uinale; chic'bilic te pueblohetic yu'un, mayuc mach'a ya xnahin tey a.

¹⁶ Te winiquetic yu'un Menfis soc Tafnes la swuybat ajol.

¹⁷ ¿Ma bal ha'uc hich pasbotat yu'un te la awihquitay hilel te Jehová te Dios awu'un te c'alal la stojobtesat bahel ta be?

¹⁸ Yo'tic, ¿bin yac ata a te ya xbahat ta Egipto yu'un yac awuch'be ya'lel te muc'ul-ha' Nilo? Soc ¿bin yac ata a te ya xbahat ta Asiria yu'un yac awuch'be ya'lel te muc'ul-ha' Éufrates?

¹⁹ Ya ya'bat castigo te amule, ya yalbat amul te ma junuc awo'tan. Nopa awa'iy hiche soc na'a me te ha chopol soc ch'a te yac awihquitay hilel te Jehová te Dios awu'un, soc te ma ba ya xiw awo'tan ta jtojol, xchi te Jehová te scuentahinej spisil.

²⁰ Como nameyix la awuy te yugo awu'un soc te bin chuculat a, hich la awal: Ma ba ya cac' jba ta a'batinel, xchihat. Ta spisil ini, la awac' aba ta antsinel ta spisil toyol tsehletic soc ta ye'tal spisil pimil ya'binal te'etic.

²¹ La jts'unat hichuc tsahbil ts'usub, ta spisil lequil sbac' ts'unubil. ¿Bin ut'il ay a te c'atp'ujat ta jtojol ta yan ts'usubil?

²² Aunque yac apoc aba ta lejía soc yac atuhun bayel xapon, stalel ay ta jtojol te yabaquil te amule, xchi te Cajwaltic Jehová.

²³ ¿Bin ut'il ay a te hich yac awal: Ma ba bohloben jc'oblal, mayuc bin ora la jt'un bahel te baaletic, te xchihate? Ilawil bin ut'il ayat ta spamlej, na'a me te bin apasoj, yantsilel camellohat te bayuc nax ya x'ahnimajat,

²⁴ yantsilel ha'mal burrohat te c'ahyem ta jochol taq'uin q'uinal, te ya yich' ta ic' te c'alal chijuben, ¿mach'a ya xhu' yu'un scomel? Mach'ayuc ya xlehot yu'un, ma ba ya xluhb, como ya sta ta yorahil te schijubel.

²⁵ Ma me xbehenat te mayuc atep soc ma me xawac' ya xtaquij anuc'. Pero hich la awal: Mayuc bin ya xhu' ta pasel, como ha c'ux ta co'tan te yan diosetic, ya me jt'un bahel, xchihat.

²⁶ Hich te bin ut'il ya xq'uexaw j'elec' te c'alal ya xchicnaj, hich ya xq'uexawic te sna Israel, ha'ic soc te ajwaliletic, príncipaletic sacerdotehetic soc te jalwanejetic yu'unic,

²⁷ te hich ya yalbeyic te te': Ha'at jtatat, xchihic, soc hich ya yalbeyic te ton: Ha'at la awalatayon, xchihic. La ya'bon quil te spatic, ma ha'uc te sit yelawic. Pero te c'alal ay swocolic hich ya yalic: ¡Hahchan, coltayawotcotic! xchihic.

²⁸ ¿Banti ay te diosetic awu'unic te la apasique? ¡Ac'a hahchuquic, ya quiltic teme ya xhu' ya scoltayex ta yorahil awocol! como hich yipal diosetic awu'un te bin ut'il pueblohetic awu'une, Judá.

²⁹ ¿Bin yu'un yac ahachic c'op ta jtojol? Apisilic la atoy abahic ta jtojol, xchi te Jehová.

³⁰ Tojol la jca'be castigo te anich'nabic, ma ba la yich'ic ta cuenta te tojobtesele. Te espada awu'unic la slajinlan te jalwanejetic hich te bin ut'il choj ya xbutsticlanwan.

³¹ Jcaj ts'umbalilex ini, a'iybeya awa'iyic sc'op te Jehová. ¿Yu'un bal jochol taquin q'uinalon ta stojol Israel, o q'uinalon te ay ta yihc'al q'uinal? ¿Bin yu'un hich ya yal te pueblo cu'un: Ayotcotic ta libre; ma ba ya xtalotcotiquix ta atojol, te xchihe?

³² ¿Ya bal xch'ay ta yo'tan te ach'ix te sch'ahlele? o te ach'ix te ya xnuhpun, ¿ya bal xch'ay ta yo'tan te sch'ahlel sc'u'e? Pero te pueblo cu'un bayelix c'ahc'al te ch'ayon ta yo'tane.

³³ ¡Mero yac ana'be sbehlal slehel te mach'a yac amon aba soque! ¡Te chopol antsetic ay bin ya xhu' ya snopic ta acuenta!

³⁴ Ta ac'u' apac' ya xchicnaj sch'ich'el te pobrehetic te mayuc smulic, aunque mayuc bin chopol la atahbe. Aunque hich ay, hich yac awal:

³⁵ Mayuc jmul; ma ba ilinem Dios ta jtojol, xchihat. Ya xhahch jchahpanat, como la awal: Mayuc jmul, te xchihate.

³⁶ ¿Bin yu'un te ora nax yac ayanijtes te behetic awu'une? Ya me xq'uexawat ta scuenta Egipto, hich te bin ut'il q'uexawat yu'un Asiria.

³⁷ Ha nix hich, atsacoj ajol a ya xloc'at tey a, como te Jehová la sp'ajticlan te mach'atic smuc'ulinejic awo'tane; ma ba lec ya xc'ohat ta scuentahic.