Jeremías 18 - Bible in Tzeltal Bachajón

Sloc'omba c'op yu'un jpac'ojom soc ahch'al

¹ Ha te sc'op Jehová te tal ta stojol Jeremías, hich la yal:

² Hahchan, cohan bahel ta sna te jpac'ojom, tey ya calbat a te jc'ope, xchi.

³ Ha yu'un cohon bahel ta sna te jpac'ojom, la jquil yac ta a'tel ta a'tejibal yu'un.

⁴ Te oxom te yac ta spasel ta ahch'al jihn ta sc'ab, ha yu'un la scha'pas yan oxom, ha chican te bin yilel la sc'an yo'tan.

⁵ Hich tal ta jtojol te sc'op Jehová:

⁶ Sna Israel ¿ma bal yacuc xhu' te hich ya jpasbeyex te bin ut'il ya spas te jpac'ojom ini? xchi te Jehová. Hich te bin ut'il te ahch'al ay ta sc'ab te jpac'ojom, hich ayex ta jc'ab, sna Israel.

⁷ Ta jts'ihn nax ya xc'opojon ta scontrahinel jun pueblo o nación yu'un ya yich' bulel, busq'uinel soc jinel.

⁸ Pero teme ya suhtes yo'tan yu'un te schopolil, te la jcalbe sc'oblale, ya jsuht jc'op, ma ba ya jpasbe te bin chopol jnopoj te ya jpasbe.

⁹ Soc teme jts'ihn nax ya cal te ya yich' pasel soc ts'unel jun pueblo o nación,

¹⁰ pero teme ya spas te bin chopol ta jtojol, teme ma ba ya sch'uhumbon te jc'ope, ya jsuht jc'op yu'un te bin lec te jnopoj te ya jpasbe.

¹¹ Halbeya hiche te ants-winiquetic ta Judá soc te mach'atic nahinemic ta Jerusalén: Hich yaloj te Jehová: Yacon ta schahpanel te bin chopol ta atojolic, yacon ta schahpanel te bin ya scontrahinex. Jujutuhl, ihquitayahic hilel te chopol behetic awu'unic; tojobtesahic te behetic awu'unic soc te awa'telic, xchihat.

¹² Pero ya me yalic: ¡Tojol! como ya me jt'uncotic bahel te loc'ombahetic cu'uncotic, jujutuhlotcotic ya jpascotic te bin ya snop te chopol co'tancotic, ya me yutic.

¹³ Ha yu'un hich ya yal te Jehová: Joc'obeya awa'iyic te nacionetic, teme ay hich ya'iyejique. ¡Ay bin c'ax chopol spasoj te ach'ix Israel!

¹⁴ ¿Ay bal ya xch'ay te me'sic ta tontiquil ta witsiltic yu'un Líbano? ¿Ya bal xquehchaj te siquil ha'etic te ya x'oquin tal ta namal q'uinal?

¹⁵ ¡Pero te pueblo cu'un ch'ayon ta yo'tanic, ya schic'be pom te loc'ombahetic te ma xtuhunique! La sc'ohchin sbahic ta behetic yu'unic, ta namey behetic, st'unojic joybehetic, ma ha'uc chapal behetic.

¹⁶ La sutp'inic ta jochol q'uinal te sq'uinalic, te labambil spisil ora. Spisil mach'atic ya xc'axic tey a xcham yo'tanic yu'un, ya sjimulan sjolic yu'un.

¹⁷ Hich te bin ut'il ic' ta banti ya xloc' tal c'ahc'al ya jpucticlan bahel ta stojol te scontratac. Ya ca'be yilic te jpat, ma ha'uc te jsit quelaw, ta sc'ahc'alel te lajinel yu'unique, xchi te Jehová.

La schap sc'opic ta contrahinel Jeremías

¹⁸ Hich la yalic: La'ic, ya jchahp jc'optic ta scontrahinel te Jeremías; como ma xpasot falta te nohptesel yu'un te sacerdotehetic, te j'ac'-o'tanil yu'un te mach'atic ay sp'ijilic, soc te sc'op te jalwanejetique. La'ic, ya jcomtic ta c'op, ma ba ya quich'tic ta cuenta te bin ya yale, xchihic.

La sc'opon Dios Jeremías

¹⁹ Jehová, a'iybon awa'iy jc'op, a'iybeya awa'iy te bin ya yalic te jcontrataque.

²⁰ ¿Ya bal yich' tojel ta bin chopol te bin lec, te bin ut'il la sjoc'bonic jch'enal? Na'a me te la jtehc'an jba ta atojol yu'un ya cal te bin lec ta scuentahic, yu'un ya xloc' bahel ta stojolic te awilimba.

²¹ Ha yu'un ac'a ta wi'nal te yal-snich'nabic; ac'a hiluquic ta stojol te espada. Ac'a te mayuc yalatac te yihnamic soc te me'ba' ya xhilic, ac'a yich'ic milel te smamalalic, soc te queremetic yu'unic ac'a lajuquic ta espada ta guerra.

²² ¡Ac'a chicnajuc awetic ta snahic te c'alal jts'ihn nax yac awic'be tal ta stojolic jpoj-biluquetic! yu'un la sjoq'uic ch'en yu'un ya stsaconic, soc la snac'bonic jyacol ta banti ya xc'oht te coque.

²³ Pero ha'at, Jehová, yac ana'be spisil te bin chapbil yu'unic yu'un ya smilonic. Ma me xapasbe perdón yu'un te schopolilic, soc ma me xatup'be ta atojol te smulique. ¡Ac'a sc'ohchin yoquic ta atojol, hich me xapasbe ta yorahil awilimba!