Jeremías 17 - Bible in Tzeltal Bachajón

Ts'ihbabil ta yo'tan Judá te mulile

¹ Te smul te Judá ts'ihbabil ta cincel-taq'uin soc ta jay sni'il diamante-ton, bojticlambil ochel ta yo'tanic soc ta xulubiletic yu'un te scajtajib ta chiq'uel mahtaniletic yu'unic,

² scuenta sna'ojibal yu'un te yal-snich'nabique. Te scajtajib ta chiq'uel mahtaniletic yu'unic soc te loc'ombahetic yu'un Asera ayic ta ye'tal te'etic te pimic ya'binal soc ta toyol tsehletic,

³ ta sba te toyol witsetic soc ta jamal q'uinal. Ya cac' ta pojel spisil ac'ulejal ta scaj smul te toyol awilaletic awu'un ta spisil aq'uinal.

⁴ Ya me xch'ay te bin la jca'bat awich' soc ya cac' smosohinat acontratac ta q'uinal te ma xana'be sba, como ta quilimba atsunoj c'ahc' te spisil ora ya xtihl, xchi te Jehová.

⁵ Hich yaloj te Jehová: Ma lecuc sc'oblal te mach'a ha smuc'ulinej yo'tan te winiquetic, te ha ya smuc'ulin yo'tan te yip te winic, te ya yihquitay ta yo'tan te Jehová.

⁶ Hich ya xc'oht te bin ut'il jpeht ch'ix ta jochol taquin q'uinal, ma ba ya yil te bin ora ya xtal te bin leque; ya x'ayin ta tontiquil ta jochol taquin q'uinal, ta chi'il lumq'uinal ta banti mayuc mach'a nahinem tey a.

⁷ ¡Bayel me yutsil te mach'a ha smuc'ulinej yo'tan te Jehová, te yac'oj yo'tan ta stojol te Jehová!

⁸ Hich ya xc'oht te bin ut'il jtehc' te' ts'umbil ta ti'ha' te ya yac' bahel slohp' ta banti ya x'oquin bahel te ha'e. Ma ba ya xi' te c'alal ya xtal sc'uxul c'ahc'al, stalel yax ya'binal a. Ta ha'bil te ya xtaquij te q'uinal ma ba ya smel yo'tan soc ma ba ya xquehchaj ta yaq'uel sit.

⁹ Mero jlo'loywanej te o'tanile, c'ax hich a te bin ut'il spisil bintic ay. C'ax chopol, ¿mach'a ya xhu' ya sna'be sba?

¹⁰ Ho'on Jehovahon ya jtsahtay te o'tanil, soc ya jtsahtay te bin snopoj, yu'un ya ca'be stoj ta tuhlutuhl ha chican bin ya spasic, ha chican bin yilel sit te ya'tele, xchi te Jehová.

¹¹ Te mach'a ma stojiluc ya sta sc'ulejal, hich c'ohem te bin ut'il wanculul te yan tomut ya sluts'. Ta yohlil te scuxlejal ya x'ihquitayot yu'un, soc ta slajibal ha sonso ya xc'oht.

¹² Te huctajibal te ay yutsilal, te toyol sc'oblal c'alal ta shahchibal, ha yawil te ch'ul awilal cu'untic.

¹³ Jehová, te smuc'ulat yo'tan Israel, spisil te mach'atic ya yihquitayat ya x'ac'otic ta q'uexlal. Te mach'atic ya spit sbahic ta atojol, ya yich'ic ts'ihbayel ta ts'ubil lum ta scaj te la yihquitayic hilel te Jehová, te cuxul sloq'uib-ha'e.

¹⁴ Lecubtesawon, Jehová, hich ya xlecubon; coltayawon, hich ya xcolon, como ha'at te ya calbat yutsil ac'oblal.

¹⁵ Te ants-winiquetic hich ya yalbonic: ¿Banti ay te sc'op Jehová? Ac'a c'ohtuc ta pasel ta ora yo'tic, xchihic.

¹⁶ Pero ma ba la jt'unat ta sc'anel te yac awac'ticlambe castigo, soc ana'oj te ma ba jc'anoj te sc'ahc'alel wocol; te bin caloj ta que, ay ta atojol.

¹⁷ Ma me ha'uc tulan xiwel ya xc'ohat ta jtojol, como ha'at ahnibalat cu'un ta yorahil wocol.

¹⁸ Ac'a q'uexawuc te j'uts'inwanejetic cu'un, ma me xawac' te ya xq'uexawanon; ac'a xiwuquic, ma me xawac' xiwucon ho'on. Ac'a taluc ta stojolic te yorahil bin chopol, jinticlana soc cheb buelta jinel.

Scanantayel sc'ahc'alel cux-o'tan

¹⁹ Hich la yalbon te Jehová: Bahan, tehc'ana aba ta yochibal te pueblo, ta banti ya xloq'uic bahel soc ya x'ochic talel te ajwaliletic yu'un Judá; soc tehc'ana aba ta yantic ochibaletic yu'un Jerusalén,

²⁰ hich xawalbeyic: ¡A'iya awa'iyic te sc'op te Jehová, ajwaliletic yu'un Judá, spisil Judá soc spisil mach'atic nahinemic ta Jerusalén te ya x'ochex tal ta ochibaletic ini!

²¹ Hich yaloj te Jehová: Tsahtaya abahic ta lec te ma ba yac awich'ic bahel ihcatsil ta sc'ahc'alel cux-o'tan o te yac awotsesic tal ta ochibaletic yu'un Jerusalén.

²² Ma me xaloq'uesic ihcatsil ta anahic ta sc'ahc'alel cux-o'tan soc ma me ayuc a'tel yac apasic a, ha ch'ultesbil ac'a c'ohtuc te sc'ahc'alel cux-o'tan, hich te bin ut'il la jpas ta mandar te ame'atatique.

²³ Pero ma ba la ya'iyic, ma ba la yac' schiquinic a; la stulanijtes yo'tanic yu'un te ma ba ya ya'iyic soc ma ba ya yich'ic tojobtesel.

²⁴ Pero teme yac ach'uhumbonic jc'op, xchi te Jehová, teme ma ba yac awich'ic ochel tal ihcatsil ta ochibaletic yu'un te pueblo ini ta sc'ahc'alel cux-o'tan, teme yac ach'ultesic te sc'ahc'alel cux-o'tan soc mayuc a'tel yac apasic a,

²⁵ hich te ajwaliletic te ya xhuhcajic ta shuctajib David, soc te príncipaletic, ya me x'ochic tal ta ochibaletic yu'un te pueblo ini soc carretahetic soc cawuhetic, ha'ic soc te príncipaletic yu'unic soc te winiquetic yu'un Judá soc te mach'atic nahinemic ta Jerusalén. Hich te pueblo ini spisil ora ay yajwal.

²⁶ Ya xtalic ants-winiquetic ta pueblohetic yu'un Judá soc ta tut pueblohetic ta sjoyobal Jerusalén, ta sq'uinal Benjamín, ta Sefela, ta tut witsiltic soc ta Neguev, ya me yich'ic tal ta sna Jehová scohtol chic'bil mahtaniletic soc milbil mahtaniletic, mahtanil harina soc pom, soc te mahtanil yu'un yalel wocol.

²⁷ Yan teme ma ba yac ach'uhumbonic jc'op ta sch'ultesel te sc'ahc'alel cux-o'tan, te yac awich'ic ochel tal ihcatsil ta ochibaletic yu'un Jerusalén ta sc'ahc'alel cux-o'tan, ya ca'be sc'ahc'al te ochibaletic yu'un te ya slajinlan te muc'ul nahetic yu'un Jerusalén, mayuc mach'a ya xhu' yu'un stup'el, xchi.