Isaías 61 - Bible in Tzeltal Bachajón

Lequil c'op ta a'iyel sc'oblal colel yu'un Sión

¹ Ay ta jtojol te espíritu yu'un te Cajwaltic Jehová, yu'un ha la stsahon te Jehová. La sticonon bahel ta yalbeyel lec yach'il c'op te pobrehetic; ta spoxtayel te mach'atic pich'il yo'tanic, ta yalbeyel te ya xcolic ta libre te mach'atic ayic ta chuquel, soc ta yalbeyel te mach'atic chuquelic te jamalix te cárcel;

² la sticonon bahel ta spuquel ta halel te ya'bilal c'uxultayel yu'un te Jehová, soc te sc'ahc'alel ya'beyel spacol yu'un te Dios cu'untique: ta smuc'ubtesbeyel q'uinal ya'iyic spisil mach'atic ayic ta mel-o'tan,

³ ta yalel mandar ta stojol mach'atic ay swocolic ta Sión, te ya x'a'botic t'ujbil corona scuenta sjelol stanul c'ahc', te ya x'a'botic aceite yu'un tse'el-o'tanil scuenta sjelol mel-o'tan, soc te ya x'a'botic nahtil-c'u'ul yu'un yutsil q'uinal ya ya'iyic scuenta sjelol pich'il-o'tanil. Hich ya x'a'bot sbihilinic: Jihte'etic yu'un bin stojil ta pasel, Te bin ts'umbil yu'un Jehová, xchi, scuenta yu'un ya yac' ta ilel yutsilal a.

⁴ Ya scha'pasic te ts'ahquetic te namey jihnemic, ya scha'hachic xan te bintic nameyix la yich'ic jinele; ya scha'pasic te pueblohetic te jihnemic, ha te jinel yu'un bayel ta caj ts'umbalil.

⁵ Te jyanlumetic ya scanantayic te tuminchijetic awu'unic, ya x'a'tejic ta aq'uinal soc ta ts'usubiltic awu'unic.

⁶ Ha'ex sacerdotehex yu'un Jehová ya xc'oht abihilic, j'a'teletic yu'un te Dios cu'untic ya xc'oht te abihilique. Ya me awe'beyic te sc'ulejal te nacionetic, soc ya me xtohy ac'oblalic yu'un te yutsilalique.

⁷ Te bin ut'il te pueblo cu'un yich'ojic cheb buelta a q'uexlal soc pehc'anel, ha yu'un ta slumalic ya x'a'bot cheb buelta c'ulejalil, soc stalel ay me stse'elil yo'tanic.

⁸ Como ho'on, Jehovahon, c'ux ta co'tan te bin stojil ta pasel, ha ya quihlay te elec' soc te bin chopol ta pasele. Ha yu'un smelelil ya ca'be stojol sc'abic soc ya jchap c'op soc ta scuenta sbahtel q'uinal.

⁹ Te sts'umbalic ya xna'bot sbahic ta yohlil te nacionetic soc te spuhl ta yohlil te pueblohetic. Spisil te mach'atic ya yilic, ya me sna'ic te ha pueblo te yich'oj bendición yu'un Jehová.

¹⁰ Bayel yutsil co'tan ta stojol Jehová, ay yutsil yo'tan jch'uhlel ta stojol te Dios cu'une; como la ya'bon jlap sc'u'ulel colel soc la sjoytayon yu'un pac' scuenta bin stojil ta pasel, hich te bin ut'il lecolil te ya xnuhpun te ya sch'ahl sjol ta corona, hich te bin ut'il ach'ix te ya xnuhpun te ya sch'ahl sba ta sch'ahlelaletique.

¹¹ Hich te bin ut'il te lumq'uinal ya yac' loc'uc spuhl, soc te ts'umbil q'uinal ya yac' ch'ihyuc te bin ts'umbile, ha nix hich te Cajwaltic Jehová ya yac' puhlinuc te bin stojil ta pasel soc te yutsil c'oblalil ta stojol spisil te nacionetique.