Isaías 54 - Bible in Tzeltal Bachajón

Sbahtel q'uinal ay sc'uxul yo'tan Dios ta stojol Israel

¹ ¡awonan yu'un yutsil q'uinal, jma'alat, ha'at te ma ba alajat! ¡Hahchan ta c'ayoj, awonan soc yutsil q'uinal, ha'at te mayuc bin ora te alajate! como ha bayel xan yalatac te mach'a ihquitaybil te bin ut'il te mach'a ay smamalal, xchi te Jehová.

² Muc'ubtesa te yawil te nahilpac' awu'un, lima xan bahel te pac' te banti nahinemat; ma me xacom aba, nahtubtesa te schuhquil, a'beya xan yip te ts'apbil te'etic awu'une.

³ Como ya xpuhcat bahel ta wa'el soc ta q'uexam; te ats'umbal ya me yu'untayic te nacionetic, soc ya me xnahinic ta pueblohetic te jocholique.

⁴ Ma me xiwat, ma ba ya xhilat ta q'uexlal; ma me xaxi' q'uexlaltesel, como ma ba yac awich' pehc'anel; ya me xch'ay ta awo'tan te q'uexlal yu'un aqueremil soc ma ba yac ana'ix te ihlayel yu'un te ame'ba'al.

⁵ Como ha amamalal te Jpaswanej awu'un, ha Jehová te scuentahinej spisil te sbihile; te J'ac'aw ta libre awu'un, ha te Ch'ul Dios yu'un Israel, te Dios yu'un spisil te q'uinal, xchi te sbihile.

⁶ La yic'at te Jehová hich te bin ut'il jtuhl ants te ch'aybil soc te ay ta mel o'tan; hich te bin ut'il te mach'a mero ach'ix to a te nuhpun te p'ajbil c'oht, xchi te Dios awu'une:

⁷ Ta jts'ihn nax la jch'ayat hilel, pero soc bayel sc'uxul co'tan ya jcha'ic'at.

⁸ Jts'ihn nax hahch quilimba, buelta nax la jnac' jsit ta atojol; pero soc sc'uxul co'tan te sbahtel q'uinal ay ya jna'bat yo'bolil aba, xchi te Jehová te J'ac'aw ta libre awu'une.

⁹ Hich c'ohem ya ca'iy te bin ut'il ta yorahil Noé, te c'alal la jcal ta jamal te mayuquix bin ora ya xmulot xan ta ha' te bahlumilale. Hich nix caloj ta jamal te ma ba ya x'ilinonix ta atojol, ma ba ya cutatix.

¹⁰ Aunque ya sjel yawil te witsiltic, soc te ya xnihc te tsehletic, ma ba ya yihquitayat te sc'uxul co'tan, soc ma ba ya xjihn te chapbil c'op cu'un scuenta lamal-o'tanil, xchi te Jehová te ya sna'bat yo'bolil aba.

¹¹ ¡Ha'at te ay awocol, te majbilat ta tulan ic' soc mayuc smuc'ul awo'tan! ilawil, ya cac' te tonetic awu'un ta sba te t'ujbil ihc'al ton soc ya cac' te yich'o-ip awu'un ta sba yaxal ton.

¹² Ya jpas ta t'ujbil tonetic te toyol bahlal ts'ahquetic awu'un, ya jpas ta ihc'al tsajal tonetic te puertahetic awu'un, spisil te ts'ahquetic awu'un ya jpas ta yantic t'ujbil tonetic.

¹³ Spisil te awal-anich'nabic ya yich'ic nohptesel yu'un te Jehová, soc ya xp'ohl te lamal quinal ya ya'iyic te awal-anich'nabique.

¹⁴ Yac awich' ch'alel ta bin toj ta pasel; namal ya xhil awu'un te uts'inele, mayuc bin yac axi'; namal ya xhil awu'un te tulan xiwel, ma ba ya xnohpoj tal ta atojol.

¹⁵ Teme ay mach'a ya xtal ya'bat guerra, ma ta jcuentahuc te ya spase; te mach'a ya xtal ya'bat guerra, ya me xyahlic ta atojol.

¹⁶ Ilawil, ho'on la jchicnajtes te jten-taq'uin te ya shuhxibe sc'ahc'al te ac'aletic soc ya spas a'tejibal yu'un te ya'tele; soc ho'on la jchicnajtes te jlajinwanej yu'un ya xlajinwan.

¹⁷ Mayuc a'tejibal yu'un guerra te ya xhu' ya stsalat, soc ya xhu' awu'un scomel te mach'a ya slehat ta c'op. Ha ini te bin ya yich'ic te a'batetic yu'un Jehová, ha ini te tsalaw te ya c'abe, xchi te Jehová.