Isaías 20 - Bible in Tzeltal Bachajón

¹ Te bin ha'bil te tal te jtsobaw yu'un te soldadohetic ta Asdod, te ticombil tal yu'un te Sargón ajwalil yu'un Asiria, te la ya'be guerra te Asdod soc la stsal hilel,

² ta hich ora c'opoj Jehová ta scuenta Isaías te snich'an Amoz, hich la yal: Bahan, loq'uesa te ch'ixal pac' alapoj soc te atep ay ta awoc, xchi. Hich la spas te Isaías, mayuc sc'u' spac' soc mayuc step a te behen bahele.

³ La yal te Jehová: Hich te bin ut'il oxeb ha'bil mayuc sc'u' spac' soc mayuc step a te behen te ca'bat Isaías scuenta seña soc sc'atalul ta stojol Egipto soc Etiopía,

⁴ hich te ajwalil yu'un Asiria ya yic'ticlan bahel ta chuquel te egipciohetic soc te etiopiahetic, queremetic o mamaletic, mayuc sc'u' spaq'uic, mayuc stepic soc watal scho yitic ta scuenta sq'uexlal Egipto.

⁵ Ya xnihc yo'tanic soc ya sq'uexawic te mach'atic smuc'ulinej yo'tanic te Etiopía soc te la stoy sbahic yu'un te Egipto.

⁶ Ta hich ora hich ya yalic te mach'atic nahinemic ta ti'mar li'i: ¡Ilawil te bin c'oht ta pasel ta stojol te mach'a smuc'ulinej co'tantic, te la jc'ambetic coltayel yu'un ya scoltayotic loq'uel ta sc'ab te ajwalil yu'un Asiria! Ta ora ini, ¿bin ut'il ya xloc'otcotic ta ahnel? xchihic yu'un, xchi te Jehová.