Isaías 16 - Bible in Tzeltal Bachajón

¹ C'alal Sela ta jochol taquin q'uinal ticonahic bahel tuminchijetic ta stojol te ajwalil yu'un te q'uinal, ta wits yu'un te yantsil-nich'an Sión.

² Hich te bin ut'il mutetic te xiwen loq'uel ta spechech, hich ay te yantsil-nich'nab Moab ta tec'o-ha'etic yu'un te muc'ul-ha' Arnón.

³ Coltayawotic ta sna'el, chahpana; ta ohlil c'ahc'al hich ac'a c'ohtuc awaxinal te bin ut'il ahc'abal; nac'a te mach'atic loq'uemic ta ahnel, ma me xawac' ta c'abal te j'ahneletic.

⁴ Ac'a sjoquinat ta nahinel te mach'atic yu'un Moab te loq'uemic ta ahnel; ha'ucat ahnibalat yu'unic ta stojol te jlajinwanej. Como ya xlaj te j'uts'inwanej, ay slajibal te jlajinwanej, te jts'o'aw ta teq'uel ya xch'ay ta q'uinal.

⁵ Ya yich' yip te huctajibal ta scuenta c'uxul-o'tanil, soc ya xhuhcaj tey a ta nahilpac' yu'un David te jchahpanwanej te stalel jun yo'tan, te ya sle stojil chahpanel soc ora ya spas te bin toj ya sc'an pasele.

⁶ La jca'iybetic sc'oblal te stoybahil te Moab, c'ax muc' te stoybahil, te yich'oj sba ta muc' soc te bayel stoyoj sbahe; pero mayuc scuentahil te bintic ya yal ta lot.

⁷ Ha yu'un yac ta ahcan te Moab, spisilic ya yoq'uetayic te Moab. C'ux obol abahic te ya x'ahcanajex yu'un te taquijtesbil sit ts'usub yu'un Kir-hareset.

⁸ Te q'uinaletic yu'un Hesbón taquijemic, ha nix hich te ts'usubiletic yu'un Sima. Te ajwaliletic yu'un te nacionetic la sts'o'ts'o'teclanic te tsahbil ts'usubiletic te c'ohemic c'alal Jazer soc spucoj sbahic bahel c'alal ta jochol taquin q'uinal. Puhquic bahel te ts'usubiletic yu'un c'alal ta mar.

⁹ Ha scuentahil te hich ya x'oc'on te bin ut'il ya x'oc' te Jazer yu'un te ts'usubiletic yu'un Sibma. Ya jt'usesat ta ya'lel jsit, Hesbón soc Eleale, yu'un ya xc'oht aw yu'un guerra ta stojol te sit awal-ts'unubil awu'unic.

¹⁰ Loq'uesbilix te tse'el-o'tanil soc te yutsil-o'tanil ta stojol te lequil q'uinal; mayuc mach'a ya xc'ayojin o te ya x'awon yu'un yutsil yo'tan ta ts'usubiletic; mayuc mach'a ya sts'o' ta teq'uel te vino ta banti ya yich' ts'o'ts'o' teq'uel; la jcom te aw scuenta tse'el-o'tanil.

¹¹ Ha yu'un hich ya stij sba co'tan te bin ut'il arpa, yu'un te Moab, ya jmel co'tan yu'un te Kir-hareset.

¹² Te Moab c'alal luhbenix a ya xc'oht stehc'an sba ta toyol awilaletic, te c'alal ya xtal ta ch'ul awilal yu'un ta sc'oponel te dios yu'unic, mayuc ta cuenta ya xc'oht.

¹³ Ha te c'op ini te la yal Jehová sc'oblal Moab;

¹⁴ pero yo'tic hich ya yal te Jehová: Li' ta oxeb ha'bil, hich te bin ut'il ya yahtay jtuhl j'a'tel-winic, p'ajbil ya xc'oht te yutsilal Moab soc spisil te ants-winiquetic yu'une. Mayuc tsobolic te cuxul ya xhilic, soc mayuc yipic, xchi te Jehová.