Génesis 6 - Bible in Tzeltal Bachajón

Chopol yo'tanic te ants-winiquetic

¹ Te c'alal bin ora hahch sp'ohl sbahic te ants-winiquetic ta sba te bahlumilal soc te ayin yantsil-nich'nabic,

² te yal-snich'nab Dios la yilic te buen t'ujbilic te yantsil-nich'nab ants-winiquetic, hich la yic' yihnaminic te banti la smulanique.

³ La yal te Jehová: Ma spisiluc ora ya x'a'tej te espíritu cu'un ta stojol te ants-winiquetic como ha ch'ich'-baq'uet nax; wacwinic (120) nax ha'bil ya cuxajic, xchi sc'oblalic.

⁴ Ha yorahil a te ay muc'ul nahtil ants-winiquetic ta bahlumilal, soc nix ta patil te c'alal la sta sbahic te snich'nab Dios soc te yantsil-nich'nab ants-winiquetic, te ayin yal-snich'nabic. Ha'ic te mach'atic ich'bilic ta muc' te puhquem sc'oblalic ta namey.

⁵ La yil te Jehová te bayel bintic chopol yac spasbelic te mach'atic ayic ta bahlumilal, soc te spisil ora ma lecuc te bintic ya snopticlan ta yo'tanic.

⁶ Te Jehová la smel yo'tan yu'un te la spas te ants-winiquetic; tal sc'uxul ta yo'tan.

⁷ Ha yu'un la yal te Jehová: Ya me jlajin ta sba te bahlumilal spisil ants-winiquetic te pasbil cu'un, spisil chambahlametic, te bintic ya stas sba ta behel, soc te mutetic ya xwihlic ta toyol, como ya jsuht jc'op yu'un te la jpasticlan, xchi.

⁸ Yan te Noé lec ilot yu'un Jehová stuquel.

Noé la spas barco

⁹ Hich ay sc'oblal te yorahil Noé. Toj ta winiquil te Noé; ha nax te lec yo'tan stuquel ta yohlil te ants-winiquetic ta hich ora. Behen soc Dios te Noé.

¹⁰ Ayin oxtuhl snich'nab te Noé: ha te Sem, Cam, soc Jafet.

¹¹ Mero bohlob te bahlumilal ta stojol Dios, ha nojel ta uts'inwanej.

¹² Dios la yil te c'ax bohlob te bahlumilal, yu'un ta spisilic bohlobtesbil yu'unic bintic la spasic ta q'uinal.

¹³ Ha yu'un Dios la yalbe te Noé: La jnopix te ya jlajin spisil bintic cuxajtic, yu'un ha ta scuentahic te nojel ta uts'inwanej te q'uinale. Ha yu'un pajal ya jlajin te q'uinal soc spisil bintic cuxajtic.

¹⁴ Pasa jun barco ta gofer-te', tsahlatsahl me yac apas, soc ya me apac' ta xuch' ta yutil soc ta spat.

¹⁵ Hich me yac apas te barco: ha ho'lajunwinic (300) xuhc'ubil snahtil, lajuneb yoxwinic (50) xuhc'ubil sjamalil soc lajuneb scha'winic (30) xuhc'ubil stoyolil te barco.

¹⁶ Pasbeya sventanahul te barco, jxuhc'ubil ma xloc' ta nopol sba; a'beya spuertahul ta jehch nax; soc oxcaj yac apas.

¹⁷ Ya cac' tal puhlel ta bahlumilal, ya xlaj spisil te bintic cuxajtic ta ye'tal ch'ulchan. Spisil ya xlaj bintic ay ta bahlumilal.

¹⁸ Pero ha'at ya xc'oht ta acuenta te chapbil-c'op cu'un, ya me x'ochat ta barco soc anich'nab, awihnam, soc yihnam anich'nab.

¹⁹ Spisil bintic cuxajtic, chebcheb yac awic'ticlan ochel ta barco ta jujuchahp, stat soc yantsilel, scuenta yu'un pajal ya xcuxajat soc.

²⁰ Spisil ta chahp mutetic, spisil ta chahp chambahlametic soc spisil ta chahp bintic ya stas sbahic ta lum, cha'cha'coht ta jujuchahp ya sjoquinat ochel scuenta yu'un cuxul ya xhilic.

²¹ Soc tsoba ochel spisil ta chahp we'eliletic, yu'un yac awe'ic, xchi sc'oblal.

²² Te Noé la spas spisil hich te bin ut'il pasot ta mandar yu'un Dios.