Génesis 44 - Bible in Tzeltal Bachajón

Te copa yu'un José

¹ Te José hich la yalbe te mayordomo yu'un: Nojesbeya ta we'elil te scostalic te winiquetic ini, chican te hich yipal ya xhu' yu'unic scuchel bahel, soc a'beya te staq'uinic ta scostalic ta jujutuhl.

² Soc te copa cu'un te pasbil ta plata otsesbeya ta sti'il scostal te xute, soc te stojol te trigo yu'une, xchi. Te mayordomo hich la spas te bin ut'il halbot yu'un te José.

³ C'alal sacub q'uinal, ac'otic bahel soc te sburrohique.

⁴ Loq'uelic to bahel ta pueblo a te winiquetic, ma to namaluc sbahelic a, te José la yalbe te mayordomo yu'un: Bahan, nutsa te winiquetique. Te c'alal yac ata, hich me ya xc'oht awalbe: ¿Bin yu'un la asutp'inic ta bin chopol te bin leque? ¿Bin yu'un la awelc'ambonic te copa pasbil ta plata?

⁵ ¿Ma bal ha'uc te yuch'ib te cajwal, soc te ay bin ya xhu' sna'bel a? Ma lecuc te bin la apasic, xchihat me ta stojolic, xchi.

⁶ Te mayordomo c'alal c'oht sta te winiquetic, hich c'oht yalbe ya'iyic te bin halbot bahele.

⁷ Hich la sjoc'oyic: ¿Bin yu'un hich ya yal te cajwaltique? Mayuc hich jpasojcotic te awa'batotcotique.

⁸ Te taq'uin la jta ta jcostalcotic la jquich'cotic suhtel tal ta sq'uinal Canaán. ¿Bin ut'il c'an quelc'ancotiquix bahel ta sna awajwal te plata o te oro?

⁹ Mach'ayuc a'batil awu'un te yich'oj ya xtahot te copa yac awale, ac'a yich' milel, soc te ho'otcotic ac'a smosohinotcotic te cajwaltique, xchihic.

¹⁰ Hich la yal te mayordomo: Ac'a c'ohtuc ta pasel te bin yac awalique. Te mach'a yich'oj ya xtahbote, ha me ya x'och ta mosohil cu'un, yan te ha'exe, mayuc amulic ya xhilex, xchi sc'oblalic.

¹¹ Ha yu'un ora nax la scotesic ta lum te scostalic, tuhlultuhl la sjamic.

¹² Hich hahch sle, hahch ta banquilal ha to c'alal ta xut. Tahot te copa ta scostal te Benjamín.

¹³ Te winiquetic la sch'i' sc'u'ic yu'un; tuhlultuhl la smohtesbe yihcats te sburrohic, suhtic bahel ta pueblo.

¹⁴ Tal te Judá soc te yermanotac ta sna te José te tey to c'oht stahic a, la squejan sbahic ta stojol.

¹⁵ Hich halbotic yu'un te José: ¿Bin yu'un te hich la apasique? ¿Yu'un bal ma xana'ic te winic hich te bin ut'il ho'on ya sna' na'ojel? xchi.

¹⁶ Ha yu'un la yal te Judá: ¿Bin c'an calcotic, cajwal? ¿Bin c'an calcotic yu'un, o bin ya xhu' ya jcoltay jbahcotic a? Dios la yac' ta na'el te smulic te a'batetic awu'une. A'batotcotiquix awu'un, cajwal, soc te mach'a yich'oj a tahot te copa, xchi.

¹⁷ Hich la sjac' te José: Ma hichuc ya jpas. Te mach'a winiquil yich'oj a tahot te copa, ha a'bat cu'un ya xc'oht. Te ha'exe jun awo'tan suhtanic bahel ta stojol te atatique, xchi.

Judá c'opoj yu'un Benjamín

¹⁸ Ha yu'un te Judá nohpoj tal ta stojol, hich la yalbe: Ay, cajwal, awocoluc, ac'a sc'oponat ta achiquin te a'bat awu'un, ma me xawilintay te awa'bate, como te ha'ate pajal c'ohemat soc faraón.

¹⁹ Te cajwal la sjoc'obe te a'batetic awu'un: ¿Ay bal atatic o awihts'inic? xchihat.

²⁰ La jcalcotic ta stojol te cajwal: Ay jtatcotic, mamalix, soc ay querem quihts'intcotic te ayin c'alal mamalix a te jtatcotic, soc ay sbanquil te chamenix, ha nax hil stuquel te junax snanic soque; soc c'ux ta o'tanil yu'un te stat, xchihotcotic.

²¹ Soc hich la awalbe te a'batetic awu'un: Ic'bonic tal yu'un ya quilbe sit, xchihat.

²² Pero la jcalbecotic te cajwal: Te querem ma xpitot yu'un stat; teme piht yu'une, ya me xcham yu'un, xchihotcotic.

²³ Pero la awalbe te a'batetic awu'un: Teme ma ba ya sjoquinex tal te awihts'inic, ma xhu' yac awilbonic xan jsit, xchihat.

²⁴ Te c'alal c'ohotcotic ta stojol te jtat, te a'bat awu'un, la jcalbecotic ya'iy te bin la yal te cajwale.

²⁵ Hich la yal te jtatcotic: Suhtanic bahel, manahic tal jtebuc we'elil, xchi.

²⁶ Pero la jcalbecotic: Ma xhu' ya xbohotcotic. Teme ya sjoquinotcotic bahel te quihts'incotic, ya xbohotcotic, como ma xhu' ya quilbecotic xan sit yelaw te winic teme ma ba ya sjoquinotcotic bahel te jxutul-ihts'incotic, xchihotcotic.

²⁷ Ha yu'un te jtatcotic te a'bat awu'un, hich la yalbotcotic: Ana'ojic te cheb jnich'nab la ya'bon te quihname;

²⁸ te jtuhle loc' bahel ta jtojol, te ya cale laj ta butsticlanel, c'alal ora mayuc quilbeyej sit.

²⁹ Teme yac apojbonic bahel te jtuhl xane, teme ay ya sta uts'inel, ta acuentahic ya xcohon bahel soc sacal jol soc mel-o'tan ta yawil chamen winiquetic, xchi.

³⁰ Ha yu'un teme ya suhton xan bahel ta stojol te a'bat awu'un, ha te jtat, teme ma ba sjoquinejon te querem, te bin ut'il jun scuxlejal ya ya'iy sba soc,

³¹ teme ma ba ya yil te quereme, ya me xcham yu'un. Ha ta scuenta te a'batetic awu'un ya xco bahel soc sacal sjol soc mel-o'tan te jtatcotic ta yawil chamen winiquetic.

³² Te a'baton awu'un hilem ta jcuenta te querem ta stojol te jtat, yu'un hich la jcalbe hilel: Teme ma ba ya suht tal cu'un, ho'on me ya jcuch te mulil spisil ora ta stojol te jtat, xchihon.

³³ Ha yu'un awocoluc, ac'a jelolin hilel te querem ta mosohil awu'un, cajwal. Te quereme ac'a sjoquin suhtel te sbanquiltac.

³⁴ Como ¿bin ut'il c'an suhtucon bahel ta stojol te jtat teme ma ba ya sjoquinon suhtel te quereme? Ma xhu' cu'un, yu'un ma jc'an ya quil ya xtal swocol te jtate, xchi.