Génesis 43 - Bible in Tzeltal Bachajón

Benjamín ic'ot bahel ta Egipto

¹ Bayel te wi'nal ta q'uinal.

² C'alal laj swe'belic te trigo te la yich'ic tal ta Egipto, hich halbotic yu'un te static: Suhtanic bahel, manahic tal jtebuc jwe'eltic, xchi.

³ Hich la sjac' te Judá: Jamal la yalbotcotic te winic: Ma xhu' yac awilbonic xan jsit teme ma ba la awiq'uic tal awihts'inic, xchi.

⁴ Teme yac aticon bahel sjoquinotcotic te quihts'incotic, ya xcohotcotic xan bahel ta smanel tal we'elil.

⁵ Yan teme ma ba yac aticon bahel, ma ba ya xbohotcotic, como te winic hich la yalbotcotic: Ma xhu' yac awilbonic xan jsit quelaw teme ma ba yac awiq'uic tal te awihts'inique, xchi.

⁶ Ha yu'un hich la yal te Israel: ¿Bin yu'un c'ax ma lecuc bin la apasbonic, ha te la awalbeyic te winic te ay to yan awihts'inique? xchi.

⁷ Hich la sjaq'uic: Te winic la sjoc'obotcotic bin ut'il ayotcotic soc spisil mach'atic ay cu'uncotic, hich la yal: ¿Cuxul to bal atatic? ¿Ay to bal yan awihts'inic? xchi. La jac'becotic te sc'ope. ¿Bin ut'il c'an jna'cotic teme ya yalbotcotic: Ic'ahic tal awihts'inic? xchihic.

⁸ Ha yu'un te Judá la yalbe te Israel te stat: Ticona sjoquinon bahel te quereme, ya xbohotcotiquix scuenta yu'un hich ya xcuxajotic, ma ba ya xchamotic, ha'at soc te cal-jnich'ancotique.

⁹ Ho'on ya jcuentahin te quereme, ho'on yac awa'bon jmulin. Teme ma ba ya quic' suhtel tal soc teme ma ba ya cac' stehc'an xan sba ta atojol, ho'on ya jmulin spisil ora ta atojol.

¹⁰ Te manchuc la jcom jbahcotic, schebalix buelta suhtelucotic tal a te hichuque, xchi.

¹¹ Ha yu'un hich la sjac' te Israel te static: Teme hich ya sc'an pasele, pasahic hiche. Ich'ahic bahel ta acostalic te bin lec ya xloc' ta q'uinal, a'beyahic smahtanin te winic jtebuc bálsamo-te', jtebuc chab, te bintic sumet yic', mirra, nuez soc almendra.

¹² Soc ich'ahic bahel taq'uin scuenta cheb buelta, soc te taq'uin la suhtbeyex tal ta acostalic; yu'un wan howiy.

¹³ Soc ic'ahic bahel te awihts'inic, bahanic, suhtanic bahel ta stojol te winique.

¹⁴ Te Dios te spisil ya xhu' yu'un ac'a sc'uxultayex te winic soc te yacuc scoltaybotic tal te yan awermanohic soc te Benjamín. Teme ya xpojboton te jnich'nab, hichuc abi, xchi.

¹⁵ Hich te winiquetic la yich'ic bahel te mahtanil soc te taq'uin scuenta cheb buelta, soc la yiq'uic bahel te Benjamín; cohic bahel ta Egipto, c'oht stehc'an sbahic ta stojol José.

¹⁶ C'alal la yil te José te sjoquinejic te Benjamín, la yalbe te mayordomo yu'un te sna: Ic'a bahel ta na te winiquetic ini, mila jcohtuc wacax, chahpana, yu'un ya xwe'on soc ta ohlil c'ahc'al yo'tic, xchi.

¹⁷ Hich la spas te winic te bin halbot yu'un te José, la yic' bahel te winiquetic ta sna te José.

¹⁸ Ha yu'un te winiquetic och xiwel ta yo'tanic yu'un c'alal ic'otic ochel ta sna José, hich la yalbe sbahic: Ha la yic'otic tal li'i ta scaj te taq'uin te suht bahel ta jcostaltic ta shahchibal, yu'un ya slehbotic jmultic, ya stsacotic soc ya smosohinotic soc te burrohetic cu'untic, xchihic yu'un.

¹⁹ Ha yu'un nohpojic bahel ta stojol te mayordomo yu'un te sna José, la sjuquic ta c'op ta yochibal te na,

²⁰ hich la yalbeyic: Ay, cajwal, te ho'otcotic ta mero melel xtalucotcotic ta shahchibal ta smanel we'elil,

²¹ pero te c'alal c'ohotcotic te banti wayinajibal-na la jamcotic te jcostalcotic, tey ay a te jtaq'uincotic ta tuhlultuhl ta jcostalcotic, ts'acal ay. La jcha'ich'cotic tal.

²² Soc la jquich'cotic tal yan taq'uin yu'un ya jmancotic xan we'elil a. Ma jna'cotic mach'a la yotses te jtaq'uincotic ta jcostalcotic, xchihic.

²³ Hich la sjac': Ma xamel awo'tanic, ma xiwex. Te Dios awu'unic soc te Dios yu'un atatic la ya'beyex ta acostalic te taq'uine; ho'on la jtsacbeyex te ataq'uinique, xchi. La yic' tal ta stojolic te Simeón.

²⁴ Te winic la yic' ochel ta sna te José, la yich'be tal ha' yu'un ya spoc yoquic a, soc a'bot swe'el te sburrohique.

²⁵ Te winiquetic la schahpanic te mahtanil, yu'un te ya xtal ta ohlil c'ahc'al te José, yu'un la ya'iyic te tey ya xwe'ic a.

²⁶ C'alal och tal ta sna te José la ya'beyic te mahtanil te yich'ojic tal, soc la squejan sbahic ta stojol.

²⁷ Ha yu'un la sjoc'oy ya'iy te José teme lec ayic, soc la sjoc'oy: Te atatic, te mamal la awalbonic, ¿cuxul to bal, lec bal ay? xchi.

²⁸ Lec ay te jtatcotic, te a'bat awu'une; cuxul to, xchihic. La snijan sbahic, la yich'ic ta muc'.

²⁹ Te José la shach sit, la yil te Benjamín te yihts'in, te jun snan soc, la sjoc'oy ya'iy: ¿Ha bal axutul-ihts'inic ini te la awalbonic ca'iy? xchi. Soc la yal xan: Sts'ujetat me ta yo'tan Dios, querem, xchi.

³⁰ Ha yu'un te José ahnimal loc' bahel, yu'un yan baht q'uinal la ya'iy yu'un te la yil te yihts'ine, baht sle banti oc'. Och bahel ta banti ya xway, tey oc' a.

³¹ Patil la spoc sit, cha'loc' tal, la spas tulan soc hich la yal: Ich'ahic tal te we'elile, xchi.

³² Parte a'bot swe'el te José, parte yu'un te yantique, soc parte yu'un te egipciohetic te la sjoquinic ta we'el, como te egipciohetic ma xhu' ya sjoquin sbahic ta we'el soc te hebreohetic, yu'un ilobtic sba ya ya'iyic te egipciohetique.

³³ Xmelmon la yich'ic huhcanel ta stojol, hahch ta ba-alal c'alal ta xut. Mero xcham yo'tanic te winiquetic, talel c'axel la yilbe sba sitic.

³⁴ Te José la spucticlambe te we'elil ay ta smesa; pero te bin a'bot te Benjamín ha ho'eb buelta c'axem a te bin ut'il a'bot te yantique. Hich we' uch'ic, tse'el yo'tanic soc.