Génesis 41 - Bible in Tzeltal Bachajón

José la yalbe scuentahil swayich faraón

¹ C'axix cheb ha'bil a, la ya'iy wayich te faraón: Ay ta ti' muc'ul-ha' la ya'iy;

² la yil loc' tal ta ha' huqueb wacaxetic, buen t'ujbilic soc juhp'enic, ochic ta we'el ta aquiltic.

³ Patil loc' tal ta ha' huqueb xan wacaxetic, xiweltic sba ta ilel soc yahubenic; tey c'oht scohtan sbahic ta banti ayic te t'ujbil wacaxetic ta ti' muc'ul-ha'.

⁴ Te huqueb wacaxetic te xiweltic sba ta ilel soc yahubenic la sbic'ticlanic te huqueb t'ujbil wacaxetic te buen juhp'enique. Hich ora wihc' sit te faraón.

⁵ Cha'way xan, hahch ta wayich: La yil huc-chej trigo, buen t'ujbil soc bayel sit te yac ta colel ta junax ste'el.

⁶ Patil la yil yan huc-chej trigo, jay soc taquijem yu'un te q'uixin ic'.

⁷ Te huc-chej jayal trigo la sbic' te lequil trigo. Hich ora wihc' xan sit te faraón, la sna' te ha wayichil.

⁸ C'alal sacub q'uinal bayel bin tal ta yo'tan yu'un, ha yu'un la sticonlan ta iq'uel spisil te jna'ojeletic soc te p'ijil winiquetic ayic ta Egipto; la yalbe ya'iyic te swayich, pero mayuc mach'a la sna'be scuentahil.

⁹ Ha yu'un te jc'asesej-copa la yalbe te faraón: La jna'ix te falta cu'un.

¹⁰ Ay jun buelta te faraón la yilintay te a'batetic yu'une, la yotsesotcotic ta cárcel ta sna te capitán yu'un soldadohetic te ya scanantayic ajwalil, chebon soc te mach'a scuentahinej te jpas-panetique.

¹¹ Jchebalcotic ay jwayichcotic ta junax ahc'abal; te jujun wayichil ayic scuentahil.

¹² Joquinejcotic jtuhl hebreo te ya'bat capitán yu'un soldadohetic te ya scanantayic ajwalil. La jcalbecotic ya'iy te jwayichcotic, la yal ca'iycotic te bin scuentahil te jujun jwayichcotique.

¹³ Te bin nix ut'il la yal ca'iycotic, hich nix c'oht ta pasel a. Te ho'one la jcha'ich' xan ca'tel, te yane jihpanot ta te' stuquel, xchi.

¹⁴ Ha yu'un te faraón la sticon ta iq'uel te José. Ahnimal la sloq'uesic tal ta cárcel, la sloq'ues yisim, la slap yan sc'u', tal ta stojol faraón.

¹⁵ Te faraón hich la yalbe te José: Ay jwayich, pero mayuc mach'a ya yalbon scuentahil. La jca'iybat ac'oblal te yac ana' yalbeyel scuentahil wayichiletic, xchi.

¹⁶ Te José hich la sjac'be sc'op te faraón: Te ho'one mayuc bin ya jna'; pero Dios me ya ya'be sna' scuentahil te faraón, xchi.

¹⁷ Hich te faraón la yalbe te José: Ta jwayich sjel te teq'uelon ta ti' muc'ul-ha' la jquil,

¹⁸ soc loc' tal ta ha' huqueb wacaxetic te buen juhp'enic soc t'ujbilic ta ilel, ochic ta we'el ta aquiltic.

¹⁹ Patil loc' tal yan huqueb wacaxetic, yahubenic soc xiweltic sbahic, mayuc hich quiloj ta spahmal sq'uinal Egipto.

²⁰ Te yahuben soc xiweltic sba wacaxetic la sbic'ticlanic te huqueb juhp'en wacaxetic te nahil loq'uic tal.

²¹ Aunque la sbic'ticlanic ma chicanuc ta ilel, stalel yahubenic hilel hich nix te bin ut'il ta nahil to. Hich wihc' jsit.

²² La jquil yan buelta ta jwayich te loc' tal huc-chej trigo ta junax ste'el, buen t'ujbil soc bayel sit.

²³ Patil loc' tal yan huc-chej trigo, jayic soc luhbajem ya'binal, taquijemic yu'un te q'uixin ic'.

²⁴ Te huc-chej jayal trigo la sbic'ticlanic te huc-chej lequil trigo. La jcalbeyix ya'iyic te jna'ojeletic pero mayuc mach'a la sna'be scuentahil, xchi.

²⁵ Te José la yalbe te faraón: Junax sc'oblal te swayich te faraón. Dios la ya'be sna' te faraón bin ya xc'oht ta pasel ta patil.

²⁶ Te huqueb t'ujbil wacaxetic, huqueb ha'bil c'ohem; soc te lequil trigo, ha nix hich huqueb ha'bil c'ohem; junax sc'oblal te wayichile.

²⁷ Ha nix hich te huqueb yahuben wacaxetic te patil loq'uic tal, huqueb ha'bil c'ohem; soc te huc-chej trigo te taquijemic yu'un te q'uixin ic', ha seña huqueb ha'bil wi'nal.

²⁸ Hich te bin ut'il la jcalbe te faraón: Dios la ya'be sna' te faraón te bin ya xbaht spas.

²⁹ Ya xtal huqueb ha'bil te bayel bintic ay ta spahmal sq'uinal Egipto.

³⁰ Patil ya xtal huqueb ha'bil wi'nal. Ya xch'ay ta yo'tanic mach'atic ayic ta sq'uinal Egipto te bayel bintic ay ta nahil to. Te wi'nal ya me slajin te q'uinale.

³¹ Mayuc ta na'el yu'unic te bayel bintic ay ta nahil to, ta scaj te c'ax tulan wi'nal te ya xtale.

³² Te bin ut'il cheb buelta la ya'iy wayich te faraón, ha ya yal te Dios me ya yac' c'ohtuc ta pasel, soc nopol ya xc'ohtix ta pasel yu'un.

³³ Ha yu'un ac'a sle te faraón mach'a ay bin ya sna' soc p'ij yo'tan, ac'a yich' ya'tel ta sq'uinal Egipto.

³⁴ Hich me ya spas te faraón: ac'a yotses mach'atic ya scuentahinic te q'uinal, te ya yich'ic jun ta yo'ebal te bin ya sitin ta sq'uinal Egipto ta huqueb ha'bil te bayel bintic ya yac'.

³⁵ Ac'a stsobic spisil te bin ya sitin ta sc'axel te lequil ha'biletic ya xtale, ac'a sq'uejic te trigo ta scuenta smandar faraón yu'un swe'el te pueblohetic, soc ac'a scanantayic.

³⁶ Q'uejbil ya xhil te we'elil yu'un te nación yu'un te huqueb ha'bil wi'nal te ya xtal ta sq'uinal Egipto. Hich ma ba ya xcham ta wi'nal a te mach'atic ayic ta q'uinal, xchi.

José a'bot ya'tel ta scuentahinel Egipto

³⁷ Lec la ya'iy te faraón soc te a'batetic yu'une.

³⁸ Ha yu'un te faraón la yalbe te a'batetic yu'un: ¿Banti c'an jtatic te mach'a hich yo'tan te bin ut'il te winic ini, te yich'oj te espíritu yu'un te Diose? xchi.

³⁹ Te faraón la yalbe te José: Te bin ut'il Dios la ya'bat ana' spisil ini, mayuc mach'a hich ya sna' soc te hich ay sp'ijil yo'tan te bin ut'il te ha'ate.

⁴⁰ Ha'at me yac acuentahimbon te jna soc ya me awal mandar ta stojol te pueblo cu'une. Ha nax ta huctajibal cu'un te ho'on xanix toyolon awu'un.

⁴¹ Te faraón hich la yalbe xan te José: Ya ca'bat acuentahin spahmal te sq'uinal Egipto, xchi.

⁴² Ha yu'un la sloq'ues te sch'ocow ay ta sc'ab, la ya'be ta sc'ab te José, la ya'be slap t'ujbil c'u'ul pasbil ta lino, la ya'be yuhan t'ujbil uhalil pasbil ta oro;

⁴³ la yac' mohuc ta schebal carreta yu'un, soc ay mach'atic nahilijic bahel yu'un te la yalic ta aw: ¡Quejana abahic! xchihic. Hich te José la scuentahin spahmal te sq'uinal Egipto.

⁴⁴ Soc te faraón hich la yalbe te José: Ho'on faraón, mayuc mach'a ya shach yoc sc'ab ta spahmal sq'uinal Egipto teme ma ha'ucat yac awal, xchi.

⁴⁵ Te faraón la ya'be yan sbihil te José: Zafnat-panea c'oht yu'un, soc la ya'be yihnamin te Asenat te yantsil-nich'an Potifera te sacerdote ta On. Hich loc' bahel ta spahmal sq'uinal Egipto te José.

⁴⁶ Ay lajuneb scha'winic (30) ya'bilal a te José te c'alal ac'ot ta stojol faraón te ajwalil yu'un Egipto. Te José loc' bahel ta stojol faraón, la yocliy spahmal te sq'uinal Egipto.

⁴⁷ Te huqueb ha'bil te bayel bintic ay, c'ax bayel sitin te ts'unub-awalil.

⁴⁸ Te José la stsob spisil te we'elil ta huqueb ha'bil te bayel bintic ay ta sq'uinal Egipto, la sq'uej ta jujun pueblo te jayeb we'elil loc' ta sq'uinal ta sjoyobal.

⁴⁹ Te José la stsob trigo hich yipal te bin ut'il shi'al mar, ma ba hu' ta ahtayel yu'un yipal.

⁵⁰ C'alal ma to xhahch wi'nal a, ayin cheb snich'nab te José, ha te la yalatay te Asenat te yantsil-nich'an Potifera te sacerdote ta On.

⁵¹ Te sba-nich'an te José la ya'be sbihilin Manasés, yu'un hich la yal: Dios la yac' ch'ayuc ta co'tan spisil jwocol soc spisil mach'atic ay ta sna te jtat, xchi.

⁵² La ya'be sbihilin te schebal snich'an Efraín, yu'un hich la yal: Dios la yac' sitinon ta q'uinal te banti ay jwocol, xchi.

⁵³ Hich ts'acay te huqueb ha'bil te bayel bintic ay ta sq'uinal Egipto.

⁵⁴ Hahch te huqueb ha'bil wi'nal, hich te bin ut'il la yal te José. Hahch wi'nal ta spisil nacionetic, yan ta sq'uinal Egipto ay we'elil stuquel.

⁵⁵ C'alal hahch ya'iyic wi'nal ta sq'uinal Egipto, te ants-winiquetic la sc'ambeyic we'elil te faraón. Hich te faraón la yalbe spisil te egipciohetic: Bahanic ta stojol José, pasahic te bin ya yalbeyex, xchi.

⁵⁶ C'alal ay wi'nal ta spahmal sq'uinal Egipto, te José la sjamticlambe te snahul trigo, la schombe te egipciohetic, yu'un bayelix wi'nal ta sq'uinal Egipto.

⁵⁷ Spisil te nacionetic tal smanic trigo ta Egipto ta stojol José, yu'un ayix bayel wi'nal ta spahmal q'uinal.