Génesis 40 - Bible in Tzeltal Bachajón

José la yalbe sc'oblal cheb wayichil

¹ Ta patil, te jc'asesej-copa soc te jpas-pan yu'un te ajwalil yu'un Egipto la sta smulic ta stojol te yajwalic, ha te ajwalil yu'un Egipto.

² Te faraón la yilintay schebal te ya'bat, ha te jcuentahinwanej yu'un sc'asesel-copa soc te jcuentahinwanej yu'un jpas-panetic.

³ La yotses ta cárcel ta sna te capitán yu'un soldadohetic te ya scanantayic ajwalil, ta cárcel te banti ay te José.

⁴ Te capitán la ya'be ta sc'ab José yu'un ya yac' sba ta a'batinel yu'unic; halajic ta cárcel.

⁵ Ta schebalic, te jc'asesej-copa soc te jpas-pan yu'un te ajwalil yu'un Egipto, te ayic ta cárcel, la ya'iyic wayich ta junax ahc'abal; yantic sc'oblal a te bin la swayichtayic ta tuhlultuhl.

⁶ Sacub q'uinal, tal te José, la yil te ayic ta mel-o'tan.

⁷ La sjoc'obe te mach'atic ay ya'telic ta stojol faraón, te sjoquinejic ta cárcel ta sna te yajwal: ¿Bin yu'un te yanijem asit awelawic? xchi.

⁸ Hich la yalic: Yu'un la jca'iycotic wayich, pero mayuc mach'a ya sna'be scuentahil, xchihic. Te José la yalbe: ¿Ma bal ha'uc yu'un Dios te ya yac' ta na'beyel scuentahil? Halbonic ca'iy te awayichic, xchi.

⁹ Hich te jcuentahinwanej yu'un te jc'asesej-copa hahch yalbe ya'iy te José te swayiche: Ta jwayich la jquil ay sch'oxal ts'usub ta jtojol;

¹⁰ ay oxeb sc'ab te ch'oxe; puhlin, nichin soc yijub sit yilel te ts'usube.

¹¹ Quich'oj ta jc'ab te copa yu'un faraón, la jtsac te ts'usub, la jpits'be ya'lel ta copa yu'un faraón, la jca'be ta sc'ab, xchi.

¹² José hich la yalbe: Hich ay scuentahil te awayiche: Te oxeb sc'ab, ha oxeb c'ahc'al c'ohem.

¹³ Li' ta oxeb c'ahc'al te faraón ya ya'bat xan awich' awa'tel; yac awa'be xan ta sc'ab te copa yu'un, hich te bin ut'il awa'telinej spasel ta nahil to.

¹⁴ Na'awon me te c'alal c'ohtix ta acuenta a te bin lec, awocoluc taluc me sts'ujulil awo'tan, c'opombon te faraón te yacuc xloc'on ta na ini.

¹⁵ Yu'un elc'ambilon tal ta sq'uinal te hebreohetic, soc mayuc bin jpasoj te ac'bilon ta chuquel yu'un, xchi.

¹⁶ Te jcuentahinwanej yu'un jpas-panetic, c'alal la yil te lec c'oht te scuentahil, hich la yalbe te José: Ha nix hichon, ta jwayich la jquil ay oxeb moch cajal ta jol nojel ta saquil pan.

¹⁷ Te moch te ahc'ol ay, yich'oj bayel ta chahp panetic yu'un faraón, pero tal ta biq'uel yu'un mutetic te bintic ay ta moch cajal ta jol, xchi.

¹⁸ Hich la yal te José: Hich ay scuentahil: Te oxeb mochetic, oxeb c'ahc'al c'ohem.

¹⁹ Li' ta oxeb c'ahc'al te faraón ya xot'bat loq'uel ajol, ya yac'at ta jihpanel ta te', ya xlaj ta ti'el ta mutetic te abaq'uetal, xchi sc'oblal.

²⁰ Ta yoxebal c'ahc'al c'oht sc'ahc'alel te loc' ya'bilal te faraón, la spas q'uin yu'un spisil te a'batetic yu'une. La ya'be stehc'anlan sbahic te jcuentahinwanej yu'un te sc'asesej-copa soc jcuentahinwanej yu'un te jpas-panetic ta stojol te a'batetic yu'une.

²¹ La ya'be xan yich' ya'tel te jc'asesej-copa, hich hahch yac' xan ta sc'ab faraón te copa.

²² Yan te mach'a scuentahinej te jpas-panetic, la sjihpan ta te', hich te bin ut'il la yalbe scuentahil te José.

²³ Pero te jcuentahinwanej jc'asesej-copahetic ma ba la sna'ix te José, ch'ay ta yo'tan.