Génesis 4 - Bible in Tzeltal Bachajón

Caín soc Abel

¹ Te Adán la sjoquin ta wayel te Eva te yihnam, hahch yal, hich ayin te Caín, soc hich la yal te Eva: Ta scuenta Jehová ayix jtuhl jquerem, xchi.

² Patil ayin yihts'in, Abel sbihil. Te Abel ha jcanan-tuminchij, yan te Caín la schahpan te lumq'uinal stuquel.

³ La sta yorahil te Caín la ya'be smahtanin Dios te sit sts'unub-yawal.

⁴ Yan te Abel la yac' te sba yal stuminchij te buen juhp'en. Lec yo'tan Dios yu'un te Abel soc te mahtanil la yac'.

⁵ Yan te Caín ma lecuc yo'tan Dios yu'un soc te mahtanil la yac'. Hich te Caín bayel ilin, yanij sit yelaw yu'un.

⁶ Te Dios hich la yalbe te Caín: ¿Bin yu'un ilinat soc bin yu'un yanijem asit awelaw?

⁷ Teme lec bin yac apas, ¿ma bal lecuc ac'oblal ya xc'ohat yu'un? Yan teme ma lecuc bin yac apas, ay ta ti'nahil te mulile; ha ya sc'anat, pero ha'at ya me atsal, xchi.

⁸ Te Caín la yalbe te Abel te yihts'in: Conic ta aquiltic, xchi. Te c'alal tey ayic a, te Caín la stsac te Abel te yihts'in, la smil.

⁹ Te Jehová la sjoc'obe te Caín: ¿Banti ay te awihts'in Abel? xchi. La sjac' te Caín: Ma xquil, ¿yu'un bal ho'on jcanantaywanejon yu'un te quihts'ine? xchi.

¹⁰ Te Dios hich la yalbe: ¿Bin la apas? Ha ya yalat tal c'alal ta lum te sch'ich'el te awihts'ine.

¹¹ Yo'tic bohlobix ac'oblal ta lumq'uinal te la yuch'be sch'ich'el awihts'in te la amile.

¹² Te c'alal yac achahpan te lumq'uinal, ma ba ya ya'batix te bintic ya xcol tey a; ha jbehyomat soc jyanlumat ya xc'axat ta q'uinal, xchi sc'oblal.

¹³ Te Caín la yalbe te Diose: C'ax muc' ya ca'iy te castigo, ma xcuhch cu'un.

¹⁴ Yo'tic yac atenonix loq'uel ta q'uinal, ya xloc'onix ta atojol, jbehyemon soc jyanlumon ya xc'ohon ta q'uinal, soc mach'ayuc a te ya stahon ya me smilon, xchi.

¹⁵ Halbot yu'un te Jehová: Teme ay mach'a ya smil te Caín, huqueb buelta ya xtohy castigo yu'un, xchi. Ha yu'un te Jehová la ya'be seña ta sbaq'uetal te Caín scuenta yu'un ma ba ya xmilot yu'un te mach'a ya xtahot yu'une.

¹⁶ Hich loc' ta stojol Dios te Caín, baht ta nahinel ta sq'uinal Nod te ay ta stojol banti ya xloc' tal c'ahc'al yu'un Edén.

Te ts'umbal Caín

¹⁷ Te Caín la sjoquin ta wayel te yihnam, hich hahch yal, Enoc sbihil. Soc la spas muc'ul pueblo, la ya'be sbihilin Enoc, ha te sbihil te snich'ane.

¹⁸ Ayin snich'an te Enoc, ha te Irad; ayin snich'an te Irad, ha te Mehujael; ayin snich'an te Mehujael, ha te Metusael; ayin snich'an te Metusael, ha te Lamec.

¹⁹ Te Lamec la yic' cheb yihnam, Ada sbihil te jtuhle, Zila sbihil te yane.

²⁰ Alaj te Ada, Jabal sbihil; ha tatil c'oht yu'un spisil te mach'atic snahinejic nahilpac' soc te ya'telinejic scoltesel chambahlametic.

²¹ Ay yihts'in, Jubal sbihil; ha tatil c'oht yu'un spisil te mach'atic ya stijic arpa soc amay.

²² Ha nix hich alaj te Zila, Tubal-Caín sbihil te yale; ha la ya'telin stenel taq'uin, la sna' spasel spisil te bin ya yich' pasel ta bronce soc hierro. Ay yihts'in-ach'ix te Tubal-Caín, Naama sbihil.

²³ Te Lamec ay la yalbe ta schebal te yihnam: Ada soc Zila, a'iybon awa'iyic jc'op; antsetic yu'un Lamec, ya me awa'iyic te bin ya cal: Ay jtuhl winic la jmil, yu'un la yehchenteson, la jmil jtuhl querem yu'un la smajon.

²⁴ Teme huqueb buelta ya xtohy castigo yu'un te mach'a ya smil te Caín, huqueb buelta ta lajlajuneb schanwinic (7x70) buelta ya xtohy castigo yu'un te mach'a ya smil Lamec, xchi ta c'op.

Te yoxebal yal-snich'an Adán soc Eva

²⁵ Te Adán la sjoquin xan ta wayel te yihnam, ayin yal te Eva, la ya'be sbihilin Set, yu'un hich la yal: Dios la ya'bon yan cal scuenta sjelol te Abel te milot yu'un Caín, xchi.

²⁶ Ayin snich'an te Set, Enós sbihil. Ha yorahil te hahch yalbeyic wocol ta stojol Jehová.