Génesis 33 - Bible in Tzeltal Bachajón

Lecub yo'tan Esaú soc Jacob

¹ La shach sit te Jacob la yil yac ta talel te Esaú soc jbahc' (400) ta tuhl winiquetic. Ha yu'un jchahpalchahp la yac' te alaletic ta stojol Lea soc Raquel soc te cheb criadahetic.

² Ha la yac' nahilijuc te criadahetic soc te yalatac, patil te Lea soc te yalatac, ta slajibal la yac' te Raquel soc José.

³ Te Jacob nahilij bahel, la snijan sba ta lum huqueb buelta ha to c'alal c'oht sta te sbanquile.

⁴ Pero te Esaú ahnimal baht sta tal soc la smech', la smey tal ta snuc' soc la yuhts'uy; oc' schebalic.

⁵ Te Esaú la shach sit, la yil te antsetic soc te alaletic, hich la sjoc'oy: ¿Mach'atic a ini? xchi. Ha te alaletic te Dios ya'beyej te a'bat awu'un, xchi te Jacob.

⁶ Tal te criadahetic soc yalatac, hul snijan sbahic.

⁷ Soc tal te Lea soc yalatac, la snijan sbahic. Patil tal te José soc Raquel, ha nix hich la snijan sbahic.

⁸ Hich la sjoc'oy te Esaú: ¿Bin anopoj yac apas yu'un te jchahpalchahp te la jtahticlan ta be? xchi. La sjac' te Jacob: Ha te lecucon ta sit cajwal ya xc'ohon, xchi.

⁹ La sjac' te Esaú: Quihts'in, ay tsobol cu'un. Hiluc awu'un te bin ay awu'un, xchi.

¹⁰ La yal te Jacob: Ma'uc, awocoluc, teme lecon ta asit ich'bon te amahtan cu'un, como te c'alal la jquilbat asit sjel ta ha la jquilbe sit a te Diose, te lequix awo'tan la awic'on ta atojol.

¹¹ Awocoluc, tsacbon te amahtan te la jquich'bat tal, yu'un lec yo'tan Dios ta jtojol, spisil ini ho'on cu'un, xchi. Te Jacob la yac' fuersa ta c'op, hich la stsac te Esaú.

¹² La yal te Esaú: Conic, ya xnahilijon bahel awu'un, xchi.

¹³ Pero la yal te Jacob: Cajwal, yac ana' te tutic to te alaletic soc te ay yalatac te tuminchijetic soc wacaxetic; teme ya xtenotic ta behel, ta junax c'ahc'al ya xcham spisil te tuminchijetique.

¹⁴ Ha yu'un, cajwal, nahilijan bahel yu'un te awa'bate, c'unc'un ya xbehenon bahel, ha chican bin ut'il ya xhu' yu'un te chambahlametic soc te alaletic, ha to ya xc'ohon ta Seir ta banti ay te cajwal, xchi.

¹⁵ La yal te Esaú: Ya ca'bat hilel ajoquin j'ohliluc te winiquetic te sjoquinejonic talel, xchi. Hich la yal te Jacob: Teyuc a, teme lecucon ta asit, cajwal, xchi.

¹⁶ Hich suht bahel ta Seir te Esaú.

¹⁷ Te Jacob behen bahel c'alal Sucot, tey c'oht spas sna a soc la spasbe snahin yaxna te schansbahlam; ha scuentahil te Sucot sbihil c'oht yu'une.

¹⁸ Te Jacob, c'alal suht tal ta Padan-aram, lec ay a c'oht ta muc'ul pueblo Siquem te ay ta sq'uinal Canaán; la stehc'an snahilpac' ta stojol te pueblo.

¹⁹ La sman jsehp q'uinal te banti la stehc'an te snahilpac', ha chombot yu'un te snich'nab Hamor te stat Siquem, ho'winic (100) ta sehp plata la stoj.

²⁰ La spasbe scajtajib ta chiq'uel mahtanil tey a, la ya'be sbihilin El-Elohe-Israel.