Génesis 27 - Bible in Tzeltal Bachajón

Jacob a'bot te bendición yu'un Isaac

¹ Te c'alal mamalix a te Isaac soc te ma xyilix q'uinal yu'un bohlobenix te site, la sticon ta iq'uel te Esaú te sba-nich'an, hich la yalbe: Jnich'an, xchi. Li' ayoni, xchi te Esaú.

² Mamalonix, xchi te Isaac, ma jna' bin ora ya xchamon.

³ Ha yu'un ich'a bahel te awa'tejib, ha te at'ihmalte' soc te yawil ya'tejibal, bahan ta ha'maltic, tsacbon tal ti'bal.

⁴ Pasbon jwe'el hich te bin ut'il ya jmulan swe'el, ich'bon tal jwe', scuenta yu'un ya ca'bat hilel bendición te ma to xchamon, xchi.

⁵ Yac ta ya'iyel te Rebeca te bin yac ta yalbeyel Esaú te Isaac. Hich baht ta ha'maltic te Esaú ta snutsel te bin ya stsacbe tale.

⁶ Te Rebeca hich la yalbe te Jacob: La jca'iy bin la yalbe te abanquil Esaú te atate, te hich la yal:

⁷ Tsacbon tal ti'bal soc pasbon buen buhts'an we'elil yu'un ya jwe' soc ya ca'bat bendición ta stojol Jehová te ma to xchamon, xchi.

⁸ Ha yu'un ta ora ini, cal, ch'uhumbon te bin ya calbat.

⁹ Bahan ta banti ay te chambahlametic, tsacbon tal cha'coht lequil tut tentsunetic, ya jpasbe buhts'an ti'bal a te atat, hich te bin ut'il ya smulan.

¹⁰ Ya me apahchambe swe' te atat scuenta yu'un ya ya'bat bendición te c'alal ma to xcham a, xchi.

¹¹ Pero te Jacob la yalbe te Rebeca te snan: Te jbanquil Esaú bayel stsotsel ta scohtol, yan te ho'one mayuc jtsotsel.

¹² Ya wan spicon ya'iy te jtate, jlabanwanejon ya xc'ohon yu'un, hich chopol jc'oblal ya xc'oht, ma ha'uc ya quich' te bendición, xchi.

¹³ Hich la sjac' te snan: Cal, ho'on ac'a c'ohtuc ta jcuenta te chopol c'oblalil. Te ha'ate ch'uhuna te jc'ope, bahan ic'bon tal te bin la jcalbat, xchi.

¹⁴ Hich baht te Jacob, la stsac tal tentsunetic, la ya'be te snane. Hich te snan la spasbe ti'bal te mulambil yu'un te state.

¹⁵ Soc te Rebeca la yich'be tal te lequil sc'u' spac' te Esaú te sba-al te sq'uejojbe ta sna, la ya'be slap te Jacob te ihts'inale.

¹⁶ Soc la slap'be ta sc'ab soc ta snuc' te snuhculel tut tentsunetic,

¹⁷ la ya'be bahel te Jacob te buhts'an ti'bal soc pan te la schahpan.

¹⁸ Hich baht te Jacob ta stojol te stat, hich c'oht yalbe: Talon, jtat, xchi. La' me. ¿Mach'ahat a, jnich'an? xchi te Isaac.

¹⁹ Ho'on te Esaú te aba-nich'anon. La jpasix tal te bin la awalbon. Hahchan, huhcana aba, ti'an te ti'bal la jtsacbat talel, scuenta yu'un yac awa'bon a te bendición, xchi.

²⁰ Pero te Isaac la sjoc'obe te snich'an: ¿Bin ut'il ay a te la ata ta ora te ti'bale, jnich'an? xchi. Te Jehová te Dios awu'un, la scoltayon ta slehel, xchi te Jacob.

²¹ Te Isaac la yalbe te Jacob: Nohpojan tal ta jts'ehl, ya jpicat ca'iy teme melel te ha'at jnich'anat Esaú, xchi.

²² Te Jacob nohpoj tal ta sts'ehl te Isaac te stat, la spic ya'iy, hich la yal: Ha sc'op ya ca'iy te Jacob, pero ha nix sc'ab ya ca'iy te Esaú, xchi.

²³ Hich ma ba la sna'be sba mach'a a, yu'un bayel stsotsel sc'ab hich te bin ut'il sc'ab te Esaú. Hich la ya'be bendición.

²⁴ Te Isaac la scha'joc'obe: ¿Melel bal te ha'at jnich'anat Esaú? xchi. Ho'on, xchi te Jacob.

²⁵ Ha yu'un hich la yalbe: Ich'bon tal te ti'bal, ya jti' te bin la stsac tal te jnich'an, scuenta yu'un ya ca'bat bendición, xchi. Hich te Jacob la yich'be tal, te Isaac la sti' te ti'bal; soc la yich'be tal yuch' vino.

²⁶ Te Isaac te stat, hich la yalbe: La' me, jnich'an, uhts'uyawon, xchi.

²⁷ Hich nohpoj tal te Jacob, la yuhts'uy te state. Te Isaac la ya'iybe yic' te sc'u' spac', la ya'be bendición, hich la yal: A'iya awa'iy, ha yic' te jnich'ane, hich yic' te bin ut'il ha'maltic te a'bibil bendición yu'un Jehová.

²⁸ Dios ac'a ya'bat tal ts'ujul ta ch'ulchan, soc ac'a ya'bat te sit ya yac' te lumq'uinal, soc bayel trigo soc vino.

²⁹ Ac'a yac' sbahic ta a'batinel awu'un tsobol ants-winiquetic, soc ac'a snijan sbahic ta atojol te nacionetique. Ac'a yajwalinat awermanotac, ac'a snijan sbahic ta atojol te yalatac te anane. Bohlubuc me sc'oblal te mach'a ya sbohlobtesbat ac'oblal, soc lecuc me sc'oblal te mach'a ya ya'bat bendición, xchi.

³⁰ Lajel to yo'tan te Isaac ta ya'beyel bendición a te Jacob, loq'uel to bahel a te Jacob ta stojol te stat, hul tal ta nutsojel te Esaú te sbanquile.

³¹ Ha nix hich la spas buhts'an ti'bal, la yich' tal ta stojol te stat, hich la yalbe: Hahchan, jtat, ti'a te ti'bal la stsac tal te anich'an, scuenta yu'un yac awa'bon bendición, xchi.

³² Halbot yu'un te Isaac ha te stat: ¿Mach'ayat a? xchi. Ho'on Esaú te aba-nich'anon, xchi.

³³ Te Isaac bayel nihc yu'un, hich la yalbe: ¿Mach'a a hiche te xtaluquix, te la yich' tal te nutsbil ti'bal, la ya'bon soc la jti' spisil te c'alal ma to xtalat a? La jca'beyix bendición, ya me xc'oht ta stojol te bendición, xchi.

³⁴ C'alal la ya'iybe te sc'op stat te Esaú tulan awon scuenta muc'ul c'uxul mel-o'tan, hich la yal: A'bon bendición ec, jtat, xchi.

³⁵ La yal te stat: Pero xtaluc slo'loyonix awihts'in, ha la yich'batix te abendición, xchi.

³⁶ La yal te Esaú: Ha nix yu'un Jacob sbihil a. Schebalix buelta slo'loybelon a. Nahil la spojbon te jba-alalil, yo'tic la spojbonix te bendición te sc'oblal ya quich', xchi. Soc la yal: ¿Ma bal ayuc bendición q'uejbil awu'un te yac awa'bon? xchi.

³⁷ Te Isaac la yalbe te Esaú: La jcaq'uix te ha awajwal ya xc'oht, soc la jcaq'uix ya'batin spisil yermanotac; la jca'beyix trigo soc vino; ¿bin xan ya ca'bat ha'at, jnich'an? xchi.

³⁸ Te Esaú la sjac'be sc'op te stat: ¿Ha nax bal jun bendición ay te yac awac', jtat? A'bon bendición ec, jtat, xchi. Tulan awon ta oq'uel te Esaú.

³⁹ Ha yu'un la yal te Isaac: Namal ya xhil awu'un te yaxal q'uinal soc te ts'ujul ya xco tal ta ch'ulchan.

⁴⁰ Ta scuenta te espada awu'un ya xcuxajat, soc yac awac' aba ta a'batinel yu'un te awihts'ine; pero te bin ora awich'ojix awip a, yac aloq'ues ta anuc' te yugo yu'une, xchi.

Jacob ahn loq'uel ta stojol Esaú

⁴¹ Te Esaú la sp'aj te Jacob yu'un te bendición a'bot yu'un te state, hich la yal ta yo'tan: Nopol sta yorahil mel-o'tan yu'un te ya xcham te jtate, tey ya jmil a te quihts'in Jacob, xchi.

⁴² Halbot ya'iy te Rebeca te bin la yal te Esaú te sba-al, ha yu'un la sticon ta iq'uel tal Jacob te ihts'inal, hich la yalbe: A'iya awa'iy, te abanquil Esaú ha smuc'ul yo'tan te snopoj te ya smilat.

⁴³ Ha yu'un, cal, ch'uhuna te bin ya calbat: Hahchan, bahan ta ahnel ta banti ay te jbanquil Labán ta Harán.

⁴⁴ Joquina cheb oxeb c'ahc'al ha to c'alal ya xlaj te yilimba te abanquile.

⁴⁵ Te c'alal lajix a te yilimba te abanquil ta atojol soc te ch'ayix ta yo'tan te bin la apasbe, ya jticonat ta iq'uel tal. ¿Bistuc ya xch'ayex cu'un achebalic ta junax c'ahc'al? xchi.

⁴⁶ Te Rebeca hich la yalbe te Isaac: Wocol cuxulon ta scaj te yantsil-nich'nab Het. Teme Jacob ya yic' yihnamin jtuhl sts'umbal Het, ha te ach'ixetic yu'un te q'uinal li'i, tojol te cuxulon, xchi.