Génesis 25 - Bible in Tzeltal Bachajón

Sts'umbal Abraham soc Cetura

¹ Te Abraham la sle yan yihnam, Cetura sbihil,

² te la yalatay te Zimram, Jocsán, Medán, Madián, Isbac soc Súa.

³ Te Jocsán ha stat te Seba soc Dedán. Te snich'nab te Dedán ha te asureohetic, letuseohetic, soc leumeohetic.

⁴ Te snich'nab te Madián ha te Efa, Efer, Hanoc, Abida soc Elda. Ta spisil ini ha te sts'umbal Cetura.

⁵ Te Abraham la ya'be hilel Isaac spisil te bintic ay yu'un.

⁶ Yan te yalatac te yan antsetic yu'un, la yac'ticlambe smahtanic. Pero te c'alal cuxul to a te Abraham la sticonlan loq'uel ta stojol Isaac, la sticonlan bahel ta q'uinal ta stojol banti ya xloc' tal c'ahc'al.

Cham te Abraham

⁷ Ho'lajuneb sbalunwinic (175) ha'bil cuxaj te Abraham.

⁸ Quehchaj yich'bel ic', cham te Abraham, mamalubenix ta lec, bayelix ya'bilal a; la sjoquin ta muquenal te sme'state.

⁹ Te snich'nab Abraham, ha te Isaac soc Ismael, la smuquic ta ch'en yu'un Macpela te ay ta sq'uinal Efrón snich'an Zohar te heteo-winic, te snuhp'usitayej sba soc Mamre;

¹⁰ ha te sq'uinal te snich'nab Het te la sman te Abraham. Tey mucot a te Abraham soc te Sara te yihname.

¹¹ C'alal chamenix a te Abraham, Dios la ya'be bendición te Isaac te snich'an. Tey nahin ta pozo ‘Te mach'a cuxul te ya yilon’ te xchi sbihile.

Sts'umbal Ismael

¹² Hich ay te sts'umbal Ismael te snich'an Abraham te la yalatay Agar te egipcia-ants, te scriada Sara.

¹³ Hich sbihilic te snich'nab Ismael te xmelmon bahel te bin ut'il ayinique: Te sba-nich'an Ismael, Nebaiot, Cedar, Adbeel, Mibsam,

¹⁴ Misma, Duma, Massa,

¹⁵ Hadar, Tema, Jetur, Nafis soc Cedema.

¹⁶ Ha'ic te snich'nab Ismael soc te sbihilic ta jujuchahp ta scuenta te sq'uinalic soc scampamentohic; lahchaytuhl ajwaliletic ta jujuchahp yu'unique.

¹⁷ Te Ismael huclajuneb shucwinic (137) ha'bil cuxaj; hich quehchaj yich'bel ic', cham, la sjoquin ta muquenal te sme'state.

¹⁸ Te sts'umbalic nahinic ta Havila c'alal ta Shur te ay ta stojol Egipto ta sbehlal Asiria. Tey nahinic a soc la scontrahinic te yermanotac.

Ayin Jacob soc Esaú

¹⁹ Hich ay sc'oblal te sts'umbal Isaac snich'an Abraham: Te Abraham ha stat te Isaac.

²⁰ Ay cha'winic (40) ya'bilal a te Isaac te la yic' yihnamin te Rebeca te yantsil-nich'an Betuel, te arameo-winic ta Padan-aram, soc te Rebeca ha yihts'in te Labán te arameo-winic.

²¹ Te Isaac la sc'opombe te Jehová yu'un te yihnam te ma x'alaj. Tsacbot sc'op yu'un Jehová, hich hahch yal te Rebeca te yihnam.

²² La yuts'in sbahic te cheb alaletic ta sch'uht, hich la yal te Rebeca: ¿Teme hich ay, bistuc cuxulon? xchi. Ha yu'un baht sjoc'obe te Jehová.

²³ Hich halbot yu'un: Cha'chahp nación ay ta ach'uht, cha'chahp pueblo te ya sjat sbahic c'alal awoloj a; te jchahpe c'ax hich ay yip a te bin ut'il te yane, te banquilal ya x'a'batinot yu'un te ihts'inale, xchi.

²⁴ Te c'alal la sta yorahil ya x'ayin yal, lo-alal la yalatay.

²⁵ Ha tsajal alal te nahil ayin, soc scohtol ay stsotsel hich te bin ut'il nuhcul te ay stsotsele, Esaú sbihil c'oht yu'unic.

²⁶ Patil ayin te yihts'ine, stsacojbe yit yoc te Esaú, Jacob sbihil c'oht yu'unic. Oxwinic (60) ya'bilal a te Isaac te c'alal alaj te Rebeca.

Esaú la schon sba-alalil

²⁷ Muc'ubic te alaletique. Te Esaú la sna' ta lec nutsojel, la smulan behel ta ha'maltic. Yan te Jacob, jlamal-o'tan winic, la smulan ayinel ta nahilpac'.

²⁸ Te Isaac ha c'ux ta yo'tan te Esaú, yu'un a'bot sti' te bin la stsac ta nutsojel. Yan te Rebeca ha c'ux ta yo'tan stuquel te Jacob.

²⁹ Ay la spay we'elil te Jacob; te Esaú luhben a suht tal ta behel ta ha'maltic,

³⁰ ha yu'un la yalbe te Jacob: Awocoluc, a'bon jwe' te paybil tsajal we'elil, yu'un ya xchamonix ta wi'nal, xchi. (Ha scuentahil te Edom sbihil c'oht.)

³¹ La sjac' te Jacob: Chombon yo'tic te aba-alalil, xchi.

³² La yal te Esaú: Chamelonix ta wi'nal, ¿bistuc cu'un hiche te jba-alalil? xchi.

³³ La yal te Jacob: Halbon ta jamal ha'i c'ahc'al ini, xchi. Ha yu'un la yal ta jamal, hich la schombe te Jacob te sba-alalile.

³⁴ Hich te Jacob la ya'be swe' pan soc te paybil lenteja-chenec'. Hich we', uch', hahch bahel, baht te Esaú. Hich mayuc sc'oblal c'oht ta yo'tan Esaú te sba-alalile.