Génesis 15 - Bible in Tzeltal Bachajón

Abram halbot ta jamal yu'un Dios ya x'a'bot snich'an

¹ Ta patil te c'ohtix ta pasel ini, tal te sc'op Jehová ta stojol Abram ta scuenta nahalsitil, hich la yal: Ma xiwat, Abram, ho'on jcanantaywanejon awu'un, mero muc' ya xc'oht amahtan, xchi sc'oblal.

² La sjac' te Abram: Cajwal Jehová, ¿bin yac awa'bon te bin ut'il mayuc jnich'an? Te mach'a ya yich'bon te bintic ay cu'un, ha te Eliezer te talem ta Damasco, xchi.

³ Soc la yal xan te Abram: Ilawil, ma ba awa'beyejon jnich'an, ha yu'un te mach'a ya yich'bon te jbiluque ha te jtuhl a'bat te ayin ta jna, xchi.

⁴ Patil tal sc'op te Jehová ta stojol, hich halbot: Ma ha'uc te ya yich'bat hilel abiluc, ha ya yich'bat hilel abiluc te mero anich'an, xchi.

⁵ Hich la yic' loq'uel ta fuera soc la yalbe: Ilawil te ch'ulchan, ahtaya te eq'uetic teme ya xhu' awu'une, xchi. Soc la yalbe xan: Hich yipal ats'umbal ya xc'oht, xchi.

⁶ Te Abram la sch'uhun te Jehová, ha ac'ot ta cuenta yu'un te toj ay.

⁷ Hich halbot yu'un te Jehová: Ho'on Jehovahon te la jquic'at loq'uel tal ta Ur yu'un te caldeohetic yu'un ya ca'bat aq'uinalin te q'uinal ini, xchi.

⁸ Hich la sjac' te Abram: Cajwal Jehová ¿bin ut'il ya jna' teme ya quich' te q'uinale? xchi.

⁹ Halbot yu'un te Jehová: Ic'bon tal jcoht wacax te oxeb ya'bilal, jcoht yantsilel tentsun te oxeb ya'bilal, jcoht tat tuminchij te oxeb ya'bilal, jcoht xpuliwoc soc jcoht stsuhmut, xchi.

¹⁰ Hich te Abram la yic' tal spisil, la sjaticlan ta ohlil; te jujujaht jujuchohl la yac', jamal hil ta ohlil. Yan te mutetic ma ba la sjaticlan stuquel.

¹¹ Te mutetic te ya sti'ic ti'bal co tal ta sba te milbil chambahlametic, pero te Abram la stijticlan bahel.

¹² Yac ta mahlel c'ahc'al a c'uhb swayel te Abram, bayel xiw yo'tan yu'un mero ihc' baht te q'uinal ta stojol.

¹³ Hich te Jehová la yalbe te Abram: Na'a me te ya xnahin ats'umbal ta yan q'uinal, ya x'ochic ta mosohil tey a, jbahc' (400) ha'bil ya x'uts'inotic.

¹⁴ Pero ho'on ya ca'be stoj te nación te ya xmosohinotic yu'une; patil ya xloq'uic tal soc bayel sc'ulejalic.

¹⁵ Yan te ha'ate lamal awo'tan a yac atsob aba soc te chawinic ame'atat, mamalatix a yac awich' muquel.

¹⁶ Ta schancajal ats'umbal ya suhtic tal li'i, yu'un ma to sts'acay te smul te amorreohetique, xchi.

¹⁷ Mahlix c'ahc'al, ihc'ubix q'uinal a, chicnaj tut yawil c'ahc' te yac ta loq'uel sch'ahilel, soc tuxul c'ahc', c'axic ta yohlil te chambahlametic te jaticlambil ta ohlil.

¹⁸ Ha yorahil a te la schap sc'op soc Abram te Jehová, hich la yal: Ya ca'be ats'umbal te q'uinal ini, ya xhahch ta muc'ul-ha' yu'un Egipto c'alal ta muc'ul-ha' Éufrates;

¹⁹ ha te sq'uinal te ceneohetic, cenezeo, cadmoneo,

²⁰ heteo, ferezeo, refaita,

²¹ amorreo, cananeo, gergeseo soc te jebuseohetique, xchi.