Génesis 14 - Bible in Tzeltal Bachajón

Abram la scoltay ta libre Lot

¹ Ta yorahil te Amrafel ajwalil yu'un Sinar, te Arioc ajwalil yu'un Elasar, te Quedorlaomer ajwalil yu'un Elam, soc te Tidal ajwalil yu'un Goim,

² la ya'beyic guerra te Bera ajwalil yu'un Sodoma, te Birsa ajwalil yu'un Gomorra, te Sinab ajwalil yu'un Adma, te Semeber ajwalil yu'un Zeboim, soc te ajwalil yu'un Bela, ha te Zoar.

³ Spisil la stsob sbahic ta spamlej Sidim, ha te Mar Salado.

⁴ Lahchayeb ha'bil ayic ta a'batinel yu'un te Quedorlaomer, pero ta yoxlajunebal ha'bil hahch scoltay sbahic.

⁵ Ta schanlajunebal ha'bil tal te Quedorlaomer soc te ajwaliletic te jun yo'tan sbahic, la stsalic te refahetic ta Astarot Karnaim, te zuzetic ta Ham, te emetic ta Save-quiriataim,

⁶ soc te horeohetic ta wits Seir, c'alal ta spamlej Parán te nopol yiloj sba soc te jochol taquin q'uinal.

⁷ Tey suhtic a, c'ohtic ta En-mispat, ha te Cades, la sjimbeyic spisil te sq'uinal te amalequetic soc te amorreohetic te nahinemic ta Hazezon-tamar.

⁸ Loq'uic bahel te ajwaliletic yu'un Sodoma, Gomorra, Adma, Zeboim, soc te ajwalil yu'un Bela, ha te Zoar, la schahpan sbahic ta spamlej Sidim

⁹ ta ya'beyel guerra te Quedorlaomer ajwalil yu'un Elam, te Tidal ajwalil yu'un Goim, Amrafel ajwalil yu'un Sinar, soc Arioc ajwalil yu'un Elasar; chaneb ajwaliletic la stsal sbahic soc ho'eb ajwaliletic.

¹⁰ Ta spamlej Sidim ay bayel pozohetic yu'un chapapote. Te c'alal loq'uic ta ahnel te ajwaliletic yu'un Sodoma soc yu'un Gomorra, ay mach'atic ch'ayic ochel tey a, te yantique ahnic bahel ta wits.

¹¹ La spojbeyic bahel spisil sc'ulejal soc spisil swe'el te Sodoma soc te Gomorra, hich bahtic.

¹² Soc la yiq'uic bahel te Lot, te snich'ajun Abram, te nahinem ta Sodoma, soc spisil sbiluc, hich bahtic.

¹³ Pero ay jtuhl te loc' ta ahnel, c'oht yalbe ya'iy te Abram te hebreo-winic te nahinem ta banti ay te jihte' yu'un Mamre te amorreo-winique. Te Mamre ha yermano sba soc Escol soc Aner, te jun yo'tan sbahic soc Abram.

¹⁴ C'alal la ya'iy te Abram te ic'ot bahel ta chuquel te snich'ajun, la schahpambe ya'tejib yu'un guerra waxaclajuneb swaclajunwinic (318) ta tuhl a'batetic yu'un te ayinemic ta sna, la scholic bahel c'alal ta Dan.

¹⁵ Ta ahc'abal te Abram soc te a'batetic yu'un c'oht stsac sbahic soc te ajwaliletic, la snutsic bahel c'alal ta Hoba te ay ta norte yu'un Damasco.

¹⁶ Te Abram la yich'be te biluquetic yich'ojic bahel, soc te Lot te snich'ajun, soc sbiluc, te antsetic soc te yantic ants-winiquetique.

Melquisedec la ya'be bendición Abram

¹⁷ C'alal suht tal ta stsalel te Quedorlaomer soc te ajwaliletic sjoquinejic, te Abram loc' ta tahel yu'un te ajwalil yu'un Sodoma ta spamlej yu'un Save, ha te Spamlej yu'un te Ajwalil sbihil.

¹⁸ Ha yu'un te Melquisedec, ajwalil yu'un Salem soc sacerdote yu'un te Dios te mero toyol ay, la yich'be tal pan soc vino,

¹⁹ soc la ya'be bendición te Abram, hich la yal: Bayeluc me yutsil sc'oblal te Abram yu'un te Dios te mero toyol ay, ha te mach'a la spas te ch'ulchan soc te bahlumilal:

²⁰ soc bayeluc me yutsil sc'oblal te Dios te mero toyol ay, te la ya'batix ta ac'ab te acontratac, xchi. Te Abram la ya'be smahtanin te Melquisedec jun ta slajunebal spisil te sbiluque.

²¹ Te ajwalil yu'un Sodoma la yalbe te Abram: A'bon te ants-winiquetic, ha'at yac awich' te biluquetique, xchi.

²² Pero te Abram la sjac'be sc'op te ajwalil yu'un Sodoma: Jc'axel calojix ta jamal ta stojol Jehová te Dios te mero toyol ay, te la spas te ch'ulchan soc te bahlumilal,

²³ ma ba ya quich' ni jlihcuc hilera ni jlihcuc schuhquil tepil, ma ba ya quich'bat te bintic ay awu'un, scuenta yu'un ma ba yac awal: Ho'on la jcac' c'ulejubuc te Abram, ma xchihucat.

²⁴ Ha nax la jquich' te bintic la swe'ic te queremetique. Te winiquetic te c'ohon soc, ha te Aner, Escol soc Mamre, ac'a yich'ic jayeb ya xc'oht ta scuentahic stuquelic, xchi.