Gálatas 2 - Bible in Tzeltal Bachajón

¹ Schanlajunebalix (14) ha'bil a, cha'bohon xan ta Jerusalén soc te Bernabé, soc la jquic' bahel joquin te Tito.

² Mohon bahel tey a yu'un te bin a'boton quil yu'un Dios, soc scuenta yu'un ma tojoluc yacon ta ahnimal o ma tojoluc ahnimajon, hich la jc'opon ta stuquelic te mach'atic muc' sc'oblalic, la jcalbe ya'iyic te lec yach'il c'op te yacon ta yalel ta yohlil te jyanlumetique.

³ Te Tito te sjoquinejon, te ha griego, ma ba la sujic te ya yich' circuncisión,

⁴ aunque muquen ochic ta cohlilcotic yu'un ya yotsesotic ta mosohil te mach'atic sp'isoj sbahic te ha quermanotactic yu'un ya stsahtayic bin ut'il ay te libre ayotic ta scuenta Cristo Jesús.

⁵ Pero jc'axel ma ba la jquich'becotic ta cuenta te sc'opic, scuenta yu'un ya xhil ta atojolic te smelelil te lec yach'il c'ope.

⁶ Pero te mach'atic hich ya'iyel te ay sc'oblalic (ma yu'unuc ay sc'oblal ta co'tan bin ut'il ayic; Dios ma tsahbiluc nax mach'a ay sc'oblal yu'un), te mach'atic ay sc'oblalic mayuc bin yach'il la ya'bonic jna'.

⁷ Ha la yilic te a'bilon ca'tel ta yalel te lec yach'il c'op ta stojol te mach'atic ma ba yich'ojic circuncisión, hich te bin ut'il te Pedro a'bot ya'tel ta stojol te mach'atic yich'ojic circuncisión.

⁸ Como te Dios te a'tej ta stojol Pedro scuenta jpuc-c'op ya xc'oht yu'un te mach'atic yich'ojic circuncisión, ha nix hich a'tej ta jtojol scuenta yu'un ya x'a'tejon ta stojol te jyanlumetique.

⁹ Te Jacobo, Cefas soc te Juan, te ich'bilic ta cuenta te ha yoyal te iglesia, c'alal la yilic te a'tel te a'bibilon, la ya'botcotic swa'el-c'abic ho'on soc te Bernabé scuenta seña te jmohlol jbahtic ta a'tel, scuenta yu'un ho'otcotic ya xbohotcotic ta stojol te jyanlumetic, yan stuquelic ya xbahtic ta stojol te mach'atic yich'ojic circuncisión.

¹⁰ Ha nax la yalbotic wocol te yacuc jna'cotic te pobrehetic, te hich nix ay sc'oblal ta co'tan te ya jpase.

Pablo la stij ta c'op Pedro ta Antioquía

¹¹ Pero te c'alal tal ta Antioquía te Pedro, la jsitin ta c'op, yu'un ma lecuc bin la spas.

¹² Yu'un te c'alal ma to xc'ohtic a te mach'atic ticombilic tal yu'un te Jacobo, la sjoquinlan ta we'el te jyanlumetic; pero te c'alal c'ohtic, hahch spit sba soc parte la yac' sba, yu'un la xi' te mach'atic ayic ta scuenta te circuncisión.

¹³ Soc te yantic judíohetic la sjoquinic te chebal-o'tanil ini, ha nix hich te Bernabé ic'ot bahel yu'un te chebal-o'tanil yu'unique.

¹⁴ Pero te c'alal la jquil te ma stojiluc yac spasbelic te bin ya yal te smelelil c'op yu'un te lec yach'il c'op, hich la jcalbe te Pedro ta comonsitil: Teme ha'at judíohat hich ya xcuxajat te bin ut'il jyanlumetic, ma hichuc te bin ut'il judío, ¿bin yu'un yac asuj te jyanlumetic te hich ya xcuxajic te bin ut'il te judíohetique? xchihon.

¹⁵ Te ho'otcotic, te judíohotcotic ta cayinabtic to, te ma ba jmulawilotic ta yohlil te jyanlumetique,

¹⁶ jna'ojcotic te ma ba toj ya x'ilot yu'un Dios te winic ta scuenta spasel bin ya yal te Ley, pero ta scuenta sch'uhunel te Jesucristo, ha nix hichotcotic jch'uhunejcotic te Jesucristo scuenta yu'un toj ya x'ilototcotic ta scuenta sch'uhunel te Cristo, ma ha'uc ta scuenta spasel bin ya yal te Ley, como mayuc mach'a toj ya x'ilot yu'un Dios ta scuenta spasel bin ya yal te Ley.

¹⁷ Teme ya jlehtic bin ut'il toj ya x'ilotic ta scuenta Cristo, pero teme chican te ha nix hich jmulawilotic, ¿yu'un bal ha ya yac' ta pasel mulil te Cristo? ¡Ban c'an hichuc!

¹⁸ Como teme ha nix ya jcha'pas te bintic la jinticlan, ha jc'axun-mandar ya xc'ohon abi.

¹⁹ Ta scuenta te Ley chamenonix ta stojol te Ley, scuenta yu'un ya xcuxajon ta stojol te Diose.

²⁰ Pajal lajon ta cruz soc Cristo, hich ma ba cuxulonix te ho'one, ha cuxulix Cristo ta co'tan; soc te jcuxlejal ta ora ini ta scuenta ch'ich'-baq'uet, ha ya xcuxajon ta scuenta sch'uhunel co'tan ta stojol te Snich'an Dios, te c'uxon ta yo'tan soc te la yac' sba ta jcuenta.

²¹ Ma ba ya jp'ajbe te yutsil yo'tan te Diose; como teme lec ya xc'ohotic ta stojol Dios ta scuenta te Ley, tojol cham Cristo abi.