Éxodo 4 - Bible in Tzeltal Bachajón

¹ Ha yu'un hich la sjac' te Moisés: Ma ba ya sch'uhunonic soc ma xya'iybonic jc'op, ya wan yalbonic: Ma ba yac'oj sba ta ilel ta atojol te Jehová, xchihic wan.

² ¿Bin a te ay ta ac'ab? xchi te Jehová. Nahbate'el, xchi te Moisés.

³ Ch'oja ta lum, xchi sc'oblal. Hich la sch'oj ta lum, c'atp'uj ta chan; te Moisés loc' ta ahnel yu'un.

⁴ Te Jehová la yalbe te Moisés: Ac'a bahel ac'ab, tsaca ta sne, xchi. Hich la yac' bahel sc'ab, la stsac, cha'c'atp'uj xan ta nahbate'el ta sc'ab.

⁵ Hich la yal te Jehová: Tey me ya sch'uhunic a te yac'ojix sba ta ilel ta atojol te Jehová te Dios yu'un te ame'atatic, te Dios yu'un Abraham, te Dios yu'un Isaac, soc te Dios yu'un Jacob, xchi.

⁶ Hich la yal xan te Jehová: Otsesa ac'ab ta yutil ac'u' ta atahn, xchi. Hich la yotses sc'ab ta yutil sc'u'; c'alal la sloq'ues tal, yich'ojix c'a'el-chamel a, buen sac hich te bin ut'il me'sic.

⁷ La yal te Jehová: Cha'otsesa xan ac'ab ta yutil ac'u', xchi. Hich la scha'otses xan sc'ab ta yutil sc'u'; c'alal la sloq'ues, lequix ay a, hich te bin ut'il spisil te sbaq'uetale.

⁸ Hich la yal te Jehová: Teme ma ba ya sch'uhunat soc teme ma ba ya yich'ic ta cuenta te shahchibal seña, ya me sch'uhunic te schebal señahe.

⁹ Yan teme ma ba ya sch'uhunic te cheb señahetic ini soc teme ma ba ya ya'iybat te ac'ope, ya me alup te ha' ta muc'ul-ha', ya me amal ta lumq'uinal. Te ha' yac alup loq'uel ta muc'ul-ha', ya xc'atp'uj ta ch'ich' ta lumq'uinal, xchi.

¹⁰ Pero te Moisés la yalbe te Jehová: ¡Ay, Cajwal! Mayuc bin ora hu'em cu'un c'op ta lec, ni ta nahil to, ni ta ora ini te yacat ta c'op ta jtojol te awa'batone. Wocol ya xloc' jc'op soc ya schuc sba te cac', xchi.

¹¹ Hich la sjac' te Jehová: ¿Mach'a la spasbe ye te ants-winic? ¿Mach'a ya spas te uma' soc te cohc, te mach'a ya yil q'uinal soc te ts'o'sit? ¿Ma bal ho'ucon te Jehovahon?

¹² Ha yu'un bahan hiche, tey ayon a te ya xc'opojat soc ya ca'bat anop te bin yac awale, xchi.

¹³ Te Moisés hich la yal: ¡Ay, Cajwal! awocoluc, ticona bahel yan, xchi.

¹⁴ Ha yu'un te Jehová ilin ta stojol Moisés, hich la yalbe: ¿Ma bal yacuc jna'be sba te abanquil Aarón te levita, te ya xc'opoj ta lec stuquel? Ya xtal stahat bahel, soc bayel yutsil yo'tan yu'un te c'alal ya yilate.

¹⁵ Ha'at yac awalbe ya'iy te bin ya xc'oht yal; soc ya jcoltayex ta c'op ta achebalic, soc ya ca'beyex anopic te bin yac apasique.

¹⁶ Te Aarón ya sc'opon te pueblo ta acuenta; ha awe ya xc'oht, soc ha sjelolat Dios ya xc'ohat yu'un.

¹⁷ Soc ya me awich' bahel te nahbate'el ini te yac apas te jchahp a'teliletic a, xchi.

Moisés suht bahel ta Egipto

¹⁸ Hich suht bahel te Moisés ta sna te snihal-mamal Jetro, hich la yalbe: Ac'awon suhtel bahel ta banti ay te quermanotac ta Egipto, yu'un ya jc'an ya quil teme cuxulic to, xchi. Lamaluc me q'uinal yac awa'iy c'alal ya xbahat, xchi te Jetro.

¹⁹ Te Jehová la yalbe te Moisés ta Madián: Suhtan bahel ta Egipto, yu'un chamiquix spisil te mach'atic c'an smilat, xchi.

²⁰ Ha yu'un te Moisés la yic' bahel te yihnam soc te yal-snich'nab, la smohtes ta burro, suht bahel ta sq'uinal Egipto. Soc la yich' bahel ta sc'ab te nahbate'el yu'un Dios.

²¹ Te Jehová hich la yalbe te Moisés: Te c'alal ya xc'ohat ta Egipto, ya me apas ta stojol faraón spisil te jchahp a'teliletic te la jca'batix apas. Pero ya jtulantesbe yo'tan scuenta yu'un ma ba ya yac' bahel te pueblo.

²² Hich me xawalbe te faraón: Hich ya yal te Jehová: Ha jba-nich'an te Israel.

²³ La jcalbatix te ac'a loc'uc bahel te jnich'an scuenta yu'un ya sch'uhuntayon; pero ma la ac'an la awac' bahel, ha yu'un ya jmilbat te ba-alal awu'un, xchi.

²⁴ Jun buelta c'alal ayic ta be a te Moisés, tahot yu'un Jehová te banti ya xc'ax ahc'abal yu'unic, ya c'an milec yu'un.

²⁵ Ha yu'un te Séfora te yihnam la stsac tulan ton te ay ye, la sbojbe loq'uel snuhculel sni'il sc'unil te yale, la sch'ojbe ta ye'tal yoc Moisés, hich la yal: Melel jmamalalat ta scuenta ch'ich', xchi.

²⁶ Hich ihquitayot hilel yu'un Jehová te Moisés. Te Séfora la yal: Jmamalalat scuenta ch'ich', te xchihe ta scaj te circuncisión.

²⁷ Te Jehová hich la yalbe te Aarón: Bahan, taha tal te Moisés ta jochol taquin q'uinal, xchi. Ha yu'un baht te Aarón, c'oht sta te Moisés ta wits yu'un Dios soc la yuhts'uy.

²⁸ Ha yu'un te Moisés la yalbe ya'iy te Aarón spisil te sc'op Jehová te ticonot ta yalel yu'un soc spisil te jchahp a'teliletic te a'bot spase.

²⁹ Hich bahtic te Moisés soc Aarón, la stsobic spisil te mamaletic yu'un te snich'nab Israel.

³⁰ Te Aarón la yalbe ya'iyic spisil te bintic halbot yu'un Jehová te Moisés, soc la spas te jchahp a'teliletic ta stojol te pueblo.

³¹ La sch'uhun yo'tanic te pueblo, soc c'alal la ya'iyic te Jehová ya sna'be yo'bolil sbahic te snich'nab Israel soc yac yilbel te swocolic, la snijan sbahic soc la sch'uhuntayic.