Éxodo 38 - Bible in Tzeltal Bachajón

¹ Ha nix hich la spas ta acacia-te' te scajtajib scohtol chic'bil mahtanil, pajal schanxuhcul, ho'eb xuhc'ubil jujun xuhc, soc oxeb xuhc'ubil stoyolil.

² La spasbe xulubiletic ta schanxuhcul te junax pasbilic soc te scajtajib, la spots ta bronce.

³ Soc la spas spisil te bintic ya xtuhun ta scajtajib ta chiq'uel mahtanil: ha te calderohetic, palahetic, muc'ul tazahetic, trinchehetic, soc yawilic ac'al; spisil la spasticlan ta bronce.

⁴ La spasbe te bin jalbil ta bronce, la yac' ta ye'tal te lehchel yu'un, ta yohlil stoyolil.

⁵ Soc la spasbe sch'ocowil ta bronce ta jujun xuhc te bin jalbil ta bronce te banti ya xc'ax te sq'uechojibal.

⁶ La spas ta acacia-te' te sq'uechojibal soc la spots ta bronce.

⁷ La xijbe sohlel te sq'uechojibal ta sch'ocowil ta jujujehch te scajtajib, yu'un ya yich' q'uechel bahel a. Te scajtajib hochol ta yutil soc pasbil ta tabla.

⁸ La spas te yawil ha' soc te scajtajib ta bronce, ha la stuhun te espejohetic yu'un te antsetic yac'oj sbahic ta a'batinel ta yochibal te Nahilpac' Templo yu'un tahojibal.

Te yamaq'uil Nahilpac' Templo

⁹ Soc la spas te amac'. Ta stojol sur, ho'winic (100) xuhc'ubil te spac'al jalbil ta ts'otbil lino.

¹⁰ Ay jtahb (20) yoyal soc jtahb scajtajib pasbilic ta bronce; te ganchohetic soc sc'atal-te'el pasbilic ta plata.

¹¹ Ta stojol norte ha nix hich ho'winic (100) xuhc'ubil spac'al; ay jtahb yoyal soc jtahb scajtajib pasbil ta bronce; te ganchohetic soc sc'atal-te'el pasbilic ta plata.

¹² Ta stojol banti ya xmahl c'ahc'al lajuneb yoxwinic (50) xuhc'ubil spac'al; lajuneb yoyal soc lajuneb scajtajib; te ganchohetic soc sc'atal-te'el pasbilic ta plata.

¹³ Ta stojol banti ya xloc' tal c'ahc'al lajuneb yoxwinic (50) xuhc'ubil spac'al.

¹⁴ Ta xuhc ho'lajuneb (15) xuhc'ubil spac'al soc oxeb yoyal soc oxeb scajtajib;

¹⁵ ha nix hich ta yan xuhc, ta jujujehch yu'un te yochibal te amac', ho'lajuneb (15) xuhc'ubil spac'al soc oxeb yoyal soc oxeb scajtajib.

¹⁶ Spisil te paq'uetic ta sjoyobal te amac' pasbilic ta ts'otbil lino.

¹⁷ Te scajtajib oyetic pasbilic ta bronce; te ganchohetic soc sc'atal-te'el pasbilic ta plata; soc te sjol te oyetic potsbilic ta plata; spisil te oyetic yu'un te amac' ay sch'ocowiletic pasbilic ta plata.

¹⁸ Te pac' ta yochibal te amac' t'ujbil ch'albil ta ts'isel ta yax, chi'in-yax soc tsajal estambre, soc ts'otbil lino; ha jtahb (20) xuhc'ubil snahtil soc ho'eb xuhc'ubil stoyolil, pajal soc spac'al te amac'.

¹⁹ Ay chaneb yoyal soc chaneb scajtajib pasbilic ta bronce; te ganchohetic soc sc'atal-te'el pasbilic ta plata, soc te sni'il oyetic potsbilic ta plata.

²⁰ Pasbilic ta bronce spisil te ts'acticlambil yich'o-ip yu'un te Nahilpac' Templo soc yu'un te amac' ta sjoyobal.

Bintic tuhun yu'un spasel Nahilpac' Templo

²¹ Hich ay yipal te bintic tuhun yu'un te Nahilpac' Templo, ha te nahilpac' yu'un te Testigo-c'op, te la yich' ahtayel ta scuenta smandar Moisés te la spasic te levitahetic te ha cuentahimbil yu'un Itamar snich'an te sacerdote Aarón.

²² Te Bezaleel snich'an Uri, te snich'an Hur, sts'umbal Judá, la spas spisil te bintic halbot ta mandar yu'un Jehová te Moisés;

²³ soc joquinot yu'un te Aholiab snich'an Ahisamac, te sts'umbal Dan, ha te ya sna' stenel taq'uin soc te ya sna' schahpanel bin yilel ta sp'isel, soc sch'ahlel ta ts'isel yax, chi'in-yax soc tsajal estambre, soc t'ujbil lino.

²⁴ Spisil te oro te tuhun yu'un te a'tel, ta spisil te a'tel yu'un te ch'ul awilal, ha te oro ac'ot ta mahtanil, ha baluneb scha'winic (29) talento soc lajuneb shuclajunwinic scha'bahc' (730) siclohetic yalal, hich te bin ut'il te siclo yu'un ch'ul awilal.

²⁵ Te plata te la yich' tsobel yu'un te mach'atic ochemic ta censo yu'un te pueblo, ay ho'winic (100) talento soc ho'lajuneb sbalunwinic yo'bahc' (1,775) siclohetic yalal, hich te bin ut'il te ciclo yu'un te ch'ul awilal;

²⁶ j'ohlil siclo la yac' jujutuhl, hich te bin ut'il te siclo yu'un te ch'ul awilal, spisilic te ochic ta censo te stahojic jtahb ya'bilal bahel, ay ho'lajuneb schanwinic ta pic soc lajuneb yoxwinic sbalunbahc' (603,550) ta tuhl.

²⁷ Soc ay ho'winic (100) talento plata la yich' uhltesel yu'un te scajtajib te ch'ul awilal soc te scajtajib te tsahlul paq'ue; ho'winic (100) talento yu'un ho'winic scajtajib, jujun talento yu'un jujun scajtajib.

²⁸ Te ho'lajuneb sbalunwinic yo'bahc' (1,775) ciclohetic plata la yich' pasel a te ganchohetic yu'un te oyetic, la spotsticlambe sjol a te oyetic soc la spas a te sch'ocowiletique.

²⁹ Te yalal te bronce te la yaq'uic ta mahtanil, ha lajuneb schanwinic (70) talentos soc wacbahc' (2,400) siclohetic

³⁰ te la yich'ic pasel a te scajtajibic te sti'il te Nahilpac' Templo yu'un tahojibal, te scajtajib ta chiq'uel mahtanil pasbil ta bronce, te bin jalbil ta bronce soc spisil te bintic ya xtuhun yu'un te scajtajib ta chiq'uel mahtanil,

³¹ te jujuntic scajtajib te amac' ta sjoyobal, te jujuntic scajtajib te yochibal te amac', spisil te ts'acticlambil yich'o-ip yu'un te Nahilpac' Templo soc spisil te ts'acticlambil yich'o-ip yu'un te amac' ta sjoyobal.