Éxodo 30 - Bible in Tzeltal Bachajón

Scajtajib ta chiq'uel pom

¹ Ya me apas ta acacia-te' jun scajtajib banti ya yich' chiq'uel pom.

² Pajal ta chanxuhc, jun xuhc'ubil snahtil soc jun xuhc'ubil sjamalil, cheb xuhc'ubil stoyolil. Te xulubiletic junax ya yich' pasel soc.

³ Ya me apots ta puro oro te sba, te spat, soc te xulubiletic; soc ya me apasbe sch'ahlel ta oro ta sjoyobal.

⁴ Soc pasbeya cheb ch'ocowil ta oro ta ye'tal te sch'ahlel, ta scha'bunjehchel, te banti ya x'och te sq'uechojibal te ya yich' q'uechel bahel a.

⁵ Pasbeya sq'uechojibal ta acacia-te' soc ya me apots ta oro.

⁶ Ya me awac' te scajtajib ta chiq'uel pom ta stojol te tsalul pac' macal a te scaxahul Testigo-c'op, ta stojol te yawil stahel perdón te ay ta sba te Testigo-c'op, te banti ya jta jbahtic ta c'op.

⁷ Te Aarón tey me ya schic' pom a te sumet yic' ta jujun sab c'alal ya schahpan te tsumbil c'ahq'ue.

⁸ Te c'alal ya stsun te c'ahc' ta yihc'ubel q'uinal te Aarón ha nix hich ya me schic' te pom. Spisil ora ya me yich' pasel ta stojol Jehová yu'un te patil al-nich'anetique.

⁹ Ma me ayuc yan pom yac achic' tey a, o scohtol chic'bil mahtanil, o mahtanil harina, soc ma me xamal tey a te malbil mahtanile.

¹⁰ Jun buelta ta jujun ha'bil te Aarón ya me yac' ta sba te xulubetic te sch'ich'el te milbil mahtanil scuenta stojel mulil. Ya me spas te stojel mulil tey a jun buelta ta jujun ha'bil ta cajalcaj ats'umbalic. Ha mero ch'ultesbil yu'un Jehová, xchi.

Stojol sjelol scuxlejal

¹¹ Te Jehová la yalbe te Moisés:

¹² Te c'alal yac awahtay te snich'nab Israel, jujutuhl me ya ya'be Jehová te stojol sjelol scuxlejal te c'alal ya yich' ahtayel, scuenta yu'un ma ba ya xtal tulan chamel ta stojolic te c'alal yac awahtay.

¹³ Spisil mach'a ahtaybilix ya me yaq'uic j'ohlil siclo, hich te bin ut'il te siclo yu'un te ch'ul awilal. Te jun siclo ha jtahb gera yalal. Te j'ohlil siclo ha smahtan te Jehová.

¹⁴ Spisil te mach'atic ahtaybil te jtahb ya'bilalic bahel, ya me ya'beyic te smahtan te Jehová.

¹⁵ Ma ha'uc toyol xan ya yac' te jc'ulejetic, soc ma ha'uc peq'uel xan ya yac' te pobrehetic te bin ut'il te j'ohlil siclo te c'alal yac awa'beyic smahtan te Jehová scuenta stojol sjelol te acuxlejalique.

¹⁶ Ya me awich'be te snich'nab Israel te taq'uin ya yaq'uic scuenta stojol sjelol scuxlejalic, ya me awac' yu'un te a'tel ya yich' pasel ta Nahilpac' Templo yu'un tahojibal. Ha sna'ojibal te snich'nab Israel ta stojol Jehová, scuenta stojol sjelol te acuxlejalique, xchi.

Yawil ha' pasbil ta bronce

¹⁷ Te Jehová hich la yalbe xan te Moisés:

¹⁸ Soc ya me apas yawil ha' ta bronce soc scajtajib ta bronce te ya xtuhun yu'un te bin ya yich' poquel. Tey yac awac' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc ya me anojes ta ha'.

¹⁹ Tey ya spoc yoc sc'abic a te Aarón soc te snich'nabe.

²⁰ Te c'alal ya x'ochic ta Nahilpac' Templo yu'un tahojibal ya me x'atinic, scuenta yu'un ma xchamic a. Soc te c'alal ya xnohpojic tal ta scajtajib ta chiq'uel mahtanil ta spasel ya'tel ta schiq'uel milbil mahtanil ta stojol Jehová,

²¹ ya me spoc yoc sc'abic scuenta yu'un ma xchamic a. Ha mandaril te stalel ya xhil yu'un Aarón soc sts'umbal ta cajalcaj bahel, xchi.

Ch'ul aceite yu'un yich'el ya'tel

²² Te Jehová la yalbe xan te Moisés:

²³ Ya me awich' te bin mero sumet yic': ho'winic scha'bahc' (500) siclo mero lequil mirra, lajuneb yoxlajunwinic (250) siclo canela te sumet yic', lajuneb yoxlajunwinic (250) siclo jalal te sumet yic',

²⁴ ho'winic scha'bahc' (500) siclo casia ha'mal, soc jun hin aceite yu'un oliva.

²⁵ Ya me apas a te aceite yu'un ch'ultesel, buen lequil aceite, hich te bin ut'il ya spas te mach'a ya sna' spasel perfume. Ha me te aceite yu'un ch'ultesel.

²⁶ Ya me amal ta Nahilpac' Templo yu'un tahojibal, ta scaxahul Testigo-c'op,

²⁷ ta mesa soc spisil te bintic ya xtuhun tey a, ta scajtajib c'ahc' soc spisil bintic ya xtuhun tey a, ta scajtajib ta chiq'uel pom,

²⁸ ta scajtajib scohtol chic'bil mahtanil soc spisil te bintic ya xtuhun tey a, soc ta yawil ha' soc te scajtajibe.

²⁹ Ya me ach'ultes, hich mero ch'ultesbil ya xc'ohtic. Biluc a te ya xtahot yu'un ch'ultesbil ya xc'oht.

³⁰ Ya me amal ta aceite te Aarón soc te snich'nab, a'beya yich' ya'telic scuenta yu'un sacerdotehetic cu'un ya xc'ohtic.

³¹ Hich me xawalbe te snich'nab Israel: Ha te ch'ul aceite cu'un scuenta ch'ultesel te ya xtuhun yu'un spisil ta cajalcaj bahel ats'umbalic.

³² Ma me ayuc nax mach'a ya yich' malbeyel ta sbaq'uetal, soc ma me xapas yan aceite te pajal soc. Ha me ch'ul aceite stuquel, ac'a c'ohtuc ta awo'tanic te ha ch'ultesbil.

³³ Mach'ayuc a te ya spas yan aceite te pajal soc, o teme ya smal mach'ayuc a, ya me yich' loq'uesel ta yohlil te pueblo yu'un, xchi.

Sc'oblal pom

³⁴ Te Jehová la yalbe xan te Moisés: Ich'a te bintic sumet yic', ha xuch'il te', ha'mal te sumet yic' soc gálbano, soc lequil pom, pajal yalal spisil;

³⁵ ya me apas ta pom te sumet yic', capbil ta lec, hich te bin ut'il mach'a ya sna' spasel perfume, mayuc ya'baquil, soc ch'ultesbil.

³⁶ Ya me ajuch' ta lec j'ohliluc, ya me awac' ta stojol te yawil Testigo-c'op te ay ta Nahilpac' Templo yu'un tahojibal, ta banti ya jta jbahtic. Mero ch'ultesbil me ya xc'oht awu'unic.

³⁷ Ma me xapasic yan pom awu'unic te hich pasbile; ha ch'ultesbil ya xc'oht awu'un ta stojol Jehová.

³⁸ Mach'ayuc a te ya spas yan te pajal soc yu'un ya smulambe yic', ya me yich' loq'uesel ta yohlil te pueblo yu'un, xchi.