Éxodo 26 - Bible in Tzeltal Bachajón

Nahilpac' Templo

¹ Ya me apas te Nahilpac' Templo ta lajunlihc lino-pac' jalbil soc yax, chi'in-yax soc tsajal estambre, ya me apas soc querubinetic te buen t'ujbil pasbile,

² waxaqueb scha'winic (28) xuhc'ubil snahtil te jujulihc, soc chaneb xuhc'ubil sjamalil; pajal sp'isol te jujulihc.

³ Ho'lihc pac' ya snuhp'ticlan sbahic ta ts'isel, hich nix te yan ho'lihc xane.

⁴ Ya me awotsesbe syaxal xojbenal ta snahtil sti'il te slajibal pac' yu'un te sbahchahpal paq'ue. Hich nix yac apas ta snahtil sti'il te scha'chahpale.

⁵ Lajuneb yoxwinic (50) xojbenal yac awotses ta sba lihquil pac'; soc lajuneb yoxwinic (50) xojbenal yac awotses ta snahtil sti'il te jlihc pac' te ay ta scha'chahpale. Nuhp'ulnuhp' ya xc'oht te xojbenale.

⁶ Pasa lajuneb yoxwinic (50) ganchohetic ta oro te yac awac'ticlambe stsac sba scha'chahpal a, hich junax ya xc'oht a te Nahilpac' Templo.

⁷ Soc ya me apas buluchlihc paq'uetic ta stsotsel tentsun yu'un smuhquil te Nahilpac' Templo.

⁸ Te snahtil te jujulihc lajuneb scha'winic (30) xuhc'ubil, soc chaneb xuhc'ubil sjamalil; junax sp'isol te buluchlihc.

⁹ Parte xanup'ticlan ho'lihc pac', soc parte xanup'ticlan te waclihc xane. Te swaquebal pac' ya me apux tal ta sti'il te Nahilpac' Templo.

¹⁰ Ya me awotses lajuneb yoxwinic (50) xojbenal ta snahtil sti'il te slajibal pac' yu'un te sbahchahpal, soc lajuneb yoxwinic (50) xojbenal ta snahtil sti'il te slajibal pac' yu'un te scha'chahpale.

¹¹ Soc pasa lajuneb yoxwinic (50) ganchohetic ta bronce te yac awotses ta xojbenaletic; ya me awac'ticlan stsac sba scha'chahpal scuenta yu'un junax ya xc'oht a te smahquile.

¹² Te j'ohlil jlihc te ya spas sobra ya xlihcaj cohel ta spat te Nahilpac' Templo.

¹³ Te jun xuhc'ubil te ya spas sobra ta jujun sti'il te paq'uetic ya me xlihcaj cohel ta jujujehch scuenta smahquil te Nahilpac' Templo.

¹⁴ Soc ya me apasbe smuhquil te nahilpac' ta snuhculel tat tuminchij bombil ta tsaj, soc ta nuhculetic ta sba.

¹⁵ Ya me aloq'ues tablahetic ta acacia-te' yu'un te Nahilpac' Templo te toj ya yich' tehc'anele.

¹⁶ Te jujun tabla lajuneb xuhc'ubil snahtil soc j'ohlil scheb xuhc'ubil stahn.

¹⁷ Ay chebcheb slawuxte'el ta jujun tabla, yu'un ya stsac sba soc a te yane. Hich me xapas spisil te tablahetic yu'un te Nahilpac' Templo.

¹⁸ Pasa jtahb tablahetic ta stojol sur yu'un te Nahilpac' Templo.

¹⁹ Pasa cha'winic (40) scajtajib ta plata ta ye'tal te jtahb tablahetic: chebcheb scajtajib yu'un te cheb slawuxte'el ta ye'tal te jujun tabla.

²⁰ Ta yan jehch te Nahilpac' Templo, ta stojol norte, ya me apas jtahb tablahetic

²¹ soc cha'winic (40) scajtajib ta plata: chebcheb scajtajib ta ye'tal jujun tabla.

²² Ta spat te Nahilpac' Templo, ta stojol banti ya xmahl c'ahc'al, pasa waqueb tablahetic.

²³ Soc cheb tablahetic yac apas yu'un te jujun xuhc ta spat te Nahilpac' Templo;

²⁴ ya me slac' sbahic ta ye'tal c'alal ta toyol ta banti ya x'och te sch'ocowile. Hich nix te yan cheb tablahetic; hich ay te schebal xuhc.

²⁵ Ha yu'un ay waxaqueb tablahetic soc ay waclajuneb (16) scajtajib ta plata; chebcheb scajtajib ta ye'tal te jujun tabla.

²⁶ Ya me apasbe ho'ch'ix sc'atal-te'el ta acacia-te' yu'un te tablahetic ta jehch te Nahilpac' Templo,

²⁷ ho'ch'ix sc'atal-te'el yu'un te tablahetic ta yan jehch te Nahilpac' Templo, soc ho'ch'ix ste'el yu'un te tablahetic ta spat, ta stojol smahlib c'ahc'al.

²⁸ Te sc'atal-te'el te ya xc'ax ta ohlil yu'un te tablahetic ya xc'oht ta jujun sti'il.

²⁹ Ya me apots ta oro te tablahetic soc ya me apasbe sch'ocowil ta oro te banti ya sohl te sc'atal-te'el, soc ya me apots ta oro te sc'atal-te'ele.

³⁰ Ya me achahpan te Nahilpac' Templo hich te bin ut'il a'botat awil ta wits.

³¹ Ya me apas jlihc tsalul pac' ta yax, chi'in-yax soc tsajal estambre soc lequil ts'otbil lino. T'ujbil me ya yich' ch'alel ta ts'isel ta querubinetic.

³² Ya me ajohc'an soc ganchohetic pasbil ta oro ta chaneb yoyal pasbilic ta acacia-te' soc potsbilic ta oro te ayic ta scajtajib pasbilic ta plata.

³³ Ya me ajohc'an te tsalul pac' ta ye'tal te ganchohetic. Ta yutil te pac' ya me awac' te scaxahul Testigo-c'op. Hich te tsalul pac' ya yac' te jtsahl ya xc'oht te Ch'ul Awilal soc jtsahl ya xc'oht te Mero Ch'ul Awilal.

³⁴ Ya me awac' te yawil stahel perdón ta sba te scaxahul Testigo-c'op te ay ta Mero Ch'ul Awilal.

³⁵ Ta fuera yu'un te tsalul pac', ta stojol norte, ya me awac' te mesa, soc ya me awac' te scajtajib c'ahc' ta stojol sur te snuhp'usitayej sba soc te mesa.

³⁶ Ya me apas pac' ta yax, chi'in-yax soc tsajal estambre soc lequil ts'otbil lino scuenta sti'il te Nahilpac' Templo, ha ya'tel te mach'a ya sna' sts'isel.

³⁷ Pasbeya ho'eb yoyal ta acacia-te', ya me apots ta oro soc te sganchohile; soc ya me apasbe ho'eb scajtajib ta uhltesbil bronce.