Éxodo 22 - Bible in Tzeltal Bachajón

Mandariletic yu'un suhtesbeyel sjelol

¹ Teme ay mach'a ya yelc'an j'a'tel-wacax o tuminchij, teme ya smil o ya schon, ho'coht j'a'tel-wacax ya suht scuenta sjelol te wacaxe, soc chancoht tuminchij ya suht scuenta sjelol te tuminchije.

² Teme tahot j'elec' te yac ta ochel ta na a, teme ehchentesot soc teme cham, te mach'a ehchenteswan ma ba ya smulin teme chame.

³ Yan teme ta c'ahc'alel, te mach'a milawan ya me smulin teme chame. Te j'elec' ts'acal me ya stoj te bin yelc'anej. Teme mayuc bin ay yu'un, ya me yich' chonel yu'un te yeleq'ue.

⁴ Teme tahot te cuxul to a te yeleq'ue, teme wacax, burro, o tuminchij, ya me stoj cheb buelta.

⁵ Teme ay mach'a ya ya'be sle swe'el schansbahlam ta aquiltic o ta ts'usubil, teme ya yac' ochel ta sts'usubil yan, ya me sjeltaybe te mero lec bin ya xloc' ta sc'al o ta ts'usubil yu'une.

⁶ Teme ay ya shach c'ahc', teme ya stsac bahel c'ahc' te ch'ixileltic, teme ya schic' trigo te tomajtic o ay to ta yawil, o teme ya xlaj ta c'ahq'uel te bin ts'umbile, te mach'a la shach c'ahc' ya me stoj te bintic ya xlaj ta c'ahq'uel.

⁷ Teme ay mach'a ya ya'be sq'uej taq'uin o yan sbiluc te spat-xuhc, teme och j'elec' ta sna te winic, teme tahot te j'elec', ya me stoj cheb buelta.

⁸ Teme ma ba tahot te j'elec', te yajwal na ya me x'ic'ot bahel ta stojol juecetic scuenta yu'un ya xchicnaj teme ha nix la yich'be te sbiluc te spat-xuhque.

⁹ Spisil te bin ya yich' ich'el scuenta lo'loywanej, teme wacax, burro, tuminchij, c'u'ul, o biluc a te ya xch'aye, teme ay mach'a ya yal: Ho'on cu'un, teme xchihe, schebalic ya x'ic'otic bahel ta stojol juecetic. Te mach'a ya xtahbot smul yu'un te juecetic, cheb buelta ya stojbe te spat-xuhque.

¹⁰ Teme ay mach'a ya ya'be scanantay spat-xuhc te sburro, swacax, stuminchij, o biluc chambahlamil, teme ay ya xcham, o ehchenaj, o baht ta elc'anel te mayuc mach'a la yile,

¹¹ ya me yalic ta jamal ta stojol Jehová schebalic te ma ha'uc la yich'be te sbiluc te spat-xuhque; hich ya xc'oht ta yo'tan te yajwal, soc mayuc bin ya stoj te yane.

¹² Yan teme baht ta elc'anel, ya me stojbe te yajwale.

¹³ Teme laj ta ti'el ta ti'awal chambahlam, ya me yac' ta ilel te bin hilem, ma ba ya stojbe te bin lajeme.

¹⁴ Teme ay mach'a ya smajambe schansbahlam te spat-xuhc, teme ma ba tey ay a te yajwal te ya x'ehchenaj o te ya xchame, ya me stojbe.

¹⁵ Yan teme tey ay a te yajwale, ma ba ya stojbe. Yan teme tojbil, ha nax ya stoj te bin ut'il smajanej.

Yantic mandariletic

¹⁶ Teme ay mach'a ya slo'loy ach'ix te ma to macbiluc, teme ya sjoquin ta wayel, ya me yac' mahtanil te jayeb ya xc'ambot, soc ya me yic' yihnamin.

¹⁷ Yan teme ma ba ya yac' te stat te ya xnuhpun soc, ya me yac' te jayeb taq'uin ya xc'ambot hich te bin ut'il stojol ach'ixetic.

¹⁸ Te j'ac'-chamel-ants ma me xawac' cuxajuc.

¹⁹ Mach'ayuc a te ya scuch sba soc chambahlam, ya me yich' milel.

²⁰ Te mach'a ya ya'be milbil smahtan yantic diosetic, teme ma ha'uc ya ya'be stuquel te Jehová, ya me yich' milel.

²¹ Ma me xawuts'in jyanlum soc ma me xawa'be swocol, como jyanlumex ayinex ta sq'uinal Egipto.

²² Ma me xawuts'inic me'ba' ants o me'ba' alal.

²³ Teme yac awuts'in, soc teme ya sc'oponon, ya me ca'iybe te sc'ope;

²⁴ ya me xtihl te quilimba, ya jmilex ta espada soc ya xhil ta me'ba' te awihnamic soc anich'nabique.

²⁵ Teme yac awa'be smajan ataq'uin jtuhl te ay ta yohlil te pueblo cu'un, ha te pobre sjoquinejat, ma me hichucat te bin ut'il mach'a ya sc'an sjol staq'uin, ma me xac'ambe sjol.

²⁶ Teme yac awich'be hilel scuenta prenda te sc'u'-spac' apat-axuhc, ya me asutbe ta xtibiltay,

²⁷ como ha nax te ya smuc sba a, ha sc'u' te ya smuc a te sbaq'uetale. ¿Bin ya smuquix sbaq'uetal ta wayel a? Te c'alal ya yawtayon ya me ca'iybe sc'op, como ho'on Jc'uxultaywanejon.

²⁸ Ma me xabohlc'optay te Dios soc ma me xabohlobtesbe sc'oblal te príncipal yu'un te alumale.

²⁹ Ma me patiluc yac awa'bon jmahtanin te sit ats'unub-awawal soc te ya'lel ats'usub. Ya me awa'bon te ba-alal querem awu'une.

³⁰ Ha nix hich yac apas soc awacax soc atuminchij; huqueb c'ahc'al ya sjoquin sme', ta swaxaquebal c'ahc'al ya me awa'bon.

³¹ Ch'ultesbil winiquetic cu'un ya xc'ohex. Ha yu'un ma me xati'ic chambahlam te laj ta ti'el yu'un ti'awal chambahlametic; ya me ach'ojbe bahel sti' te ts'i'etique.