Éxodo 10 - Bible in Tzeltal Bachajón

C'ulub

¹ Te Jehová la yalbe te Moisés: Ochan ta stojol faraón, yu'un la jtulantesbe yo'tanic soc te a'batetic yu'une, yu'un ya ca'be yilic te jchahp a'teliletic cu'un,

² soc yu'un yac awalbe te awal-anich'anic soc te amamataquic te bin la jpas ta Egipto soc sc'oblal te jchahp a'teliletic la jpas ta yohlilic; hich yac ana'ic a te ho'on Jehovahon, xchi.

³ Ha yu'un te Moisés soc Aarón bahtic ta stojol faraón, hich la yalbeyic: Te Jehová te Dios yu'un te hebreohetic, hich la yal: ¿Bin to ora yac apehc'an aba ta jtojol? Ac'a loq'uel te pueblo cu'un, yu'un ya xbaht sch'uhuntayonic.

⁴ Teme ma xawac' loq'uele, pajel ya jticon tal c'ulubetic ta aq'uinal;

⁵ ya slim sbahic ta lumq'uinal ha to c'alal ma chicanuc ya xhil te lume. Ya swe'ic te bintic hilem yu'un te bat soc ya swe'ic spisil te'etic yac ta colel ta aq'uinal.

⁶ Ya xnoj ta anahic soc ta snahic te a'batetic awu'un soc ta snahic spisil te egipciohetic, te mayuc hich yilojic te ame'atatic soc te antiguo ame'atatic te c'alal chicnajic ta q'uinal c'alal ora, xchi. Hich la sut sba, loc' bahel ta stojol faraón.

⁷ Ha yu'un te a'batetic yu'un faraón hich la yalbeyic: ¿Ban c'alal ya ya'botic jwocoltic te winic ini? Ac'a bahel te winiquetic scuenta yu'un ya sch'uhuntayic te Jehová te Dios yu'unique. ¿Yu'un bal ma to xana' te jihnemix te Egipto? xchihic.

⁸ Ha yu'un te Moisés soc Aarón ic'otic xan tal ta stojol faraón, hich halbotic yu'un: Bahanic, ch'uhuntayahic te Jehová te Dios awu'unique. ¿Mach'atic a te ya xbahtic? xchi.

⁹ La sjac' te Moisés: Ya xbohotcotic soc te alaletic, me'el-mamaletic soc ach'ix-queremetic cu'uncotic, soc te tuminchijetic, tentsunetic soc wacaxetic cu'uncotic, yu'un ha q'uin cu'uncotic ta stojol Jehová, xchi.

¹⁰ Hich la yal ta baba c'op te faraón: ¡Ac'a sjoquinat te Jehová awu'unique! ¿Bin ut'il c'an caq'uex bahel soc te alaletic awu'unique? ¡Ilawil, chican te ay bin chopol anopoj ta awo'tanic!

¹¹ Ma hichuc; ha nax ac'a bahticuc te winiquetic ta sch'uhuntayel te Jehová, te hich yaquex ta sc'anel, xchi. Hich tenotic loq'uel ta stojol te faraón.

¹² Ha yu'un te Jehová la yalbe te Moisés: Toya mohel ac'ab ta stojol te sq'uinal Egipto scuenta yu'un ya xtal c'ulubetic te ya spuc sbahic ta sq'uinal Egipto soc ya slajinic spisil te bin hilem yu'un te bat, xchi.

¹³ Hich te Moisés la stoy mohel te snahbate' ta stojol te sq'uinal Egipto; te Jehová la yac' tal ic' ta banti ya xloc' tal c'ahc'al ta sjunal c'ahc'al soc sjunal ahc'abal. Te c'alal sacub q'uinal, te ic' la yic' tal te c'ulubetique.

¹⁴ La spuc sbahic te c'ulubetic ta spahmal sq'uinal Egipto, mayuc hich yipal c'axem ta spahmal sq'uinal Egipto ta nahil to o ta patil.

¹⁵ La slim sbahic ta lum ta spahmal q'uinal, ihc'ub q'uinal yu'un; la slajinic spisil te ha'mal ta q'uinal soc spisil te sit te' te hilemic yu'un te bat. Mayuc hil syaxal te'etic o ha'maletic ta spahmal sq'uinal Egipto.

¹⁶ Ha yu'un te faraón ora la sticon ta iq'uel te Moisés soc Aarón, hich la yalbe: La jta jmul ta stojol Jehová te Dios awu'unic soc ta atojolic.

¹⁷ Ha yu'un ya calbeyex wocol, pasbonic perdón yu'un jmul junuc xan buelta, soc c'opombonic a te Jehová te Dios awu'unic te yacuc sloq'uesbon ta jtojol te wocol scuenta lajel ini, xchi.

¹⁸ Loc' bahel te Moisés ta stojol faraón, la sc'opon te Jehová.

¹⁹ Ha yu'un te Jehová la yac' tal mero tulan ic' ta stojol banti ya xmahl c'ahc'al te la yic' bahel te c'ulubetic, la yac'ticlan ochel ta Mar Rojo; ma ba hil jcohtuc c'ulub ta spahmal sq'uinal Egipto.

²⁰ Pero te Jehová la stulanubtesbe yo'tan te faraón, hich ma ba la yac' bahel te snich'nab Israel.

Yihc'al q'uinal

²¹ Te Jehová la yalbe te Moisés: Toya mohel ac'ab scuenta yu'un ya x'ihc'ub q'uinal ta sq'uinal Egipto, hich yihc'al ya xc'oht te bin ut'il ya xhu' ta tsaquel ya'iyel, xchi.

²² Hich te Moisés la stoy mohel sc'ab, hich tal mero yihc'al q'uinal ta spahmal sq'uinal Egipto oxeb c'ahc'al.

²³ Mayuc mach'a la yil te spat-xuhc, mayuc mach'a loc' bahel te oxeb c'ahc'ale. Pero spisil te snich'nab Israel ay sacal q'uinal ta banti nahinemic.

²⁴ Ha yu'un te faraón la yac' ta iq'uel tal te Moisés, hich la yalbe: Bahan, ch'uhuntayahic te Jehová; soc ic'ahic bahel te alaletic awu'unic, pero ya xhil te tuminchijetic, tentsunetic soc te wacaxetic awu'unic, xchi.

²⁵ Hich la sjac' te Moisés: Ya me awa'botcotic te chambahlametic yu'un milbil mahtaniletic soc scohtol chic'bil mahtaniletic te ya ca'becotic Jehová te Dios cu'uncotique.

²⁶ Ya quic'cotic bahel te chambahlametic cu'uncotic, ma ba ya xhil jcohtuc, yu'un ya xtuhun cu'uncotic scuenta sch'uhuntayel Jehová te Dios cu'uncotic, yu'un ma to jna'cotic bin ya ca'becotic ta sch'uhuntayel te Jehová ha to c'alal ya xc'ohotcotic tey a, xchi.

²⁷ Pero te Jehová la stulanubtesbe yo'tan te faraón, ma ba la sc'an la yac' bahel.

²⁸ Te faraón la yalbe te Moisés: Loc'an bahel ta jtojol. Tsahtaya me aba te ma ba yac awilbon xan te jsit quelaw, yu'un te bin c'ahc'alil te yac awilbon xan te jsit quelaw, ya me xlajat, la yut.

²⁹ Hich la sjac' te Moisés: ¡Lec te bin la awal! Ma ba ya quilbatix xan asit awelaw, xchi.