Ester 9 - Bible in Tzeltal Bachajón

Judiohetic ya slajinic scontratac

¹ Ta yoxlajunebal (13) c'ahc'al yu'un te slahchayebal (12) u, ha te u Adar, te ha sc'ahc'alel te sc'oblal ya yich' pasel te mandaril yu'un te ajwalil, ha nix sc'ahc'alel te scontratac te judiohetic yac smahliybelic te ya stsalic te judiohetic, pero ma hichuc c'oht ta pasel; te judiohetic la stsalic te mach'atic p'ajotic yu'unique.

² Te judiohetic la stsob sbahic ta pueblohetic ta spisil ta jsehp q'uinal yu'un te ajwalil Asuero, yu'un ya ya'beyic guerra te mach'atic chapalic ya xlanijotic yu'unic. Mayuc mach'a la scomic, como spisil te pueblohetic u'untayotic yu'un xiwel.

³ Soc spisil te príncipaletic, te schebal ajwaliletic, gobernadoretic soc te mach'atic ay ya'telic ta stojol te ajwalil la scoltayic te judiohetic, como la xi'ic te Mardoqueo.

⁴ Como te Mardoqueo mero muc' sc'oblal ta sna te ajwalil, soc puhc sc'oblal ta spisil ta jsehp q'uinal. Xquechcon ta muc'ubel sc'oblal te Mardoqueo.

⁵ Te judiohetic la smilic ta espada spisil te scontrahic, jc'axel la slajinic soc hich la spasbeyic te scontrahic te bin ut'il la sc'an yo'tanic.

⁶ Ta Susa te capital te judiohetic la smilic soc la slajinic ho'winic scha'bahc' (500) ta tuhl winiquetic.

⁷ Soc la smilic te Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai soc Vaizata,

¹⁰ ha te lajuntuhl snich'nab Amán snich'an Hamedata, te scontra te judiohetique. Pero ma ba la yich'beyic te biluquetic yu'unique.

¹¹ Ta sc'ahc'alel nix a, la ya'iy te ajwalil te jaytuhl lajemic ta Susa banti nahinem te ajwalil.

¹² Te ajwalil hich la yalbe te ajwalil-ants Ester: Te judiohetic la smiliquix ho'winic scha'bahc' (500) winiquetic soc te lajuntuhl snich'nab Amán ta Susa te capital. ¿Bintic wan la spasic ta yantic jsehp q'uinaletic yu'un te ajwalil? ¿Bin a te yac ac'an? ya me x'a'botat ¿Bintic xan ya sc'an awo'tan? ya me yich' pasel, xchi.

¹³ La sjac' te Ester: Teme lec ya ya'iy te ajwalil, hich ac'a spasic pajel te judiohetic ta Susa te bin ut'il la spasic nax ta scuenta te ley. Soc ac'a yich'ic jihpanel ta te' te sbaq'uetalic te lajuntuhl snich'nab Amán, xchi.

¹⁴ Te ajwalil la yal mandar te hich ya yich' pasele. La yich' halel ta mandar ta Susa, hich la sjihpambeyic sbaq'uetalic te lajuntuhl snich'nab Amán.

¹⁵ Te judiohetic te ayic ta Susa la stsob xan sbahic ta schanlajunebal (14) c'ahc'al yu'un te u Adar, la smilic ho'lajunwinic (300) ta tuhl winiquetic ta Susa, pero ma ba la yich'beyic te biluquetic yu'unique.

¹⁶ Te yantic judiohetic te ayic ta jujusehp q'uinal yu'un te ajwalil ha nix hich la stsob sbahic yu'un ya scoltay scuxlejalic, soc yu'un ya scontrahinic te scontrahique; la smilic balunpic soc j'ohlil swaxacbahc' (75,000) ta tuhl scontrahic, pero ma ba la yich'beyic te biluquetic yu'unique.

¹⁷ Hich c'oht ta pasel ta yoxlajunebal (13) c'ahc'al ta u Adar, ta schanlajunebal (14) c'ahc'al ta u nix la scux yo'tanic, la spasic q'uin soc tse'el yo'tanic yu'un.

¹⁸ Pero te judiohetic te ayic ta Susa la stsob sbahic ta yoxlajunebal (13) soc ta schanlajunebal (14) c'ahc'al yu'un te u, la scux yo'tanic ta yo'lajunebal (15) c'ahc'al, la spasic q'uin soc tse'el yo'tanic yu'un.

¹⁹ Ha scuentahil te judiohetic te ayic ta tut pueblohetic te mayuc sts'ahcul ya spasic q'uin soc yutsil yo'tanic ta schanlajunebal (14) c'ahc'al ta u Adar, soc talel c'axel ya ya'be sbahic smahtanic.

Q'uin Purim

²⁰ Te Mardoqueo la sts'ihbay ta hun te bin c'oht ta pasel soc la sticonlambe cartahetic spisil te judiohetic te ayic ta spisil ta jsehp q'uinal yu'un te ajwalil Asuero, te nopol soc te namal ayique.

²¹ La spasticlan ta mandar te jujunuc ha'bil ya spasic q'uin ta schanlajunebal (14) soc ta yo'lajunebal (15) c'ahc'al ta u Adar,

²² como ha sc'ahc'alel te judiohetic lahmajix q'uinal yu'un te scontratac, como ha yuhil te c'atp'uj ta tse'el-o'tanil te mel-o'tan, te oq'uel c'atp'uj ta yutsil q'uinal. La yal te ya me spasic q'uin soc yutsil me q'uinal ya ya'iyic, soc talel c'axel ya ya'be sbahic smahtanic soc ya ya'beyic smahtanic te pobrehetique.

²³ Te judiohetic la sch'uhunic spasel, te ha nix hahchemiquix ta spasel, hich te bin ts'ihbabil yu'un te Mardoqueo.

²⁴ Como te Amán snich'an Hamedata, sts'umbal Agag, te scontra te judiohetic, snopoj te ya slajin spisil te judiohetic, la stuhun te Pur, ha te seña ta na'el, yu'un ya sjinic soc jc'axel ya slajinic.

²⁵ Pero c'alal c'oht ta stojol ajwalil te Ester, la yal mandar ta carta te ajwalil te ac'a suhtuc ta stojol Amán te bin chopol schapoj ta scontrahinel te judiohetic; soc ac'a yich' jihpanel ta te' soc te snich'nabe.

²⁶ Ha scuentahil te Purim sbihil c'oht te c'ahc'aletic, yu'un yich'ojbe te sbihil pur. Ta scaj te bintic la yal ta carta, soc te bintic la yilic soc te bin c'oht ta stojolic,

²⁷ te judiohetic la yalic te ha costumbre ya xhil yu'unic soc sts'umbalic, soc spisil mach'atic te jun c'oht soc, te mayuc bin ora ya yihquitayic spasel te cheb c'ahc'al ini ta jujun ha'bil, hich te bin ut'il ts'ihbabil hilel.

²⁸ La yalic te ay ta na'el te c'ahc'aletic ini soc ya me spasic q'uin ta cajalcaj sts'umbalic, ta jujuchahp sna, ta jujusehp q'uinal soc ta jujun pueblo; te c'ahc'aletic ini yu'un Purim ma ba ya ch'ay ta yo'tanic scanantayel, soc te sts'umbalic ma me ayuc bin ora ya xch'ay ta yo'tanic.

²⁹ Te ajwalil-ants Ester yantsil-nich'an Abihail, soc te judio Mardoqueo, ta scuenta te tulan a'tel yich'ojic, la sts'ihbayic te schebal carta ini sc'oblal Purim.

³⁰ La yich' ticombeyel cartahetic spisil te judiohetic te ayic ta huqueb shucwinic (127) ta sehp q'uinaletic yu'un te ajwalil Asuero, yich'oj c'opetic yu'un lamal q'uinal soc te bin smelelil,

³¹ yu'un ya yich' halbeyel te ya me xc'oht te sc'ahc'alel Purim ta hich ora, hich te bin ut'il yaloj ta mandar te judio Mardoqueo soc te ajwalil-ants Ester ta stojolic, soc hich te bin ut'il ha'ic nix la schahpanic soc te sts'umbalic scuenta sna'ojibal te bin ora quehchaj te scomel we'el soc te oq'uel yu'unique.

³² Te mandar yu'un Ester ha nix la yalbe tulan sc'oblal te q'uin Purim, soc la yich' ts'ihbayel ta libro.