Ester 7 - Bible in Tzeltal Bachajón

Laj te Amán

¹ Te ajwalil soc te Amán bahtic ta we'el te schahpanej te ajwalil-ants Ester.

² Ta schebal c'ahc'al, te c'alal yacalic ta yuch'el vino a, te ajwalil la sjoc'obe te ajwalil-ants Ester: ¿Bin a te yac ac'an, ajwalil-ants Ester? ya me x'a'botat. ¿Bin ya sc'an awo'tan? Aunque j'ohlil ban c'alal jcuentahinej, ya x'a'botat, xchi.

³ La sjac' te Ester: Ay ajwalil, teme lecon ta awo'tan soc teme lec ya ya'iy te ajwalil, ac'a cuxajucon, ha te bin ya jc'ambate; soc ac'a cuxajuc te pueblo cu'un, ha te bin ya sc'an te co'tane.

⁴ Como te ho'on soc te pueblo cu'un quich'ojcotiquix chonel scuenta lajinel ta jc'axel. Te ha'uc la jquich'cotic chonel scuenta mosohil, mayuc bin ya cal yu'un te hichuque; pero te lajel cu'uncotic ma xhu' ta suhtbeyel te bin ya xch'ay yu'un te ajwalil, xchi.

⁵ Te Asuero la sjoc'obe te ajwalil-ants Ester: ¿Mach'a a soc banti ay te mach'a la ya'bat amel awo'tan yu'un te hich ya spase? xchi.

⁶ ¡Te jcontra soc te jlajinwanej ha te chopol Amán ini! xchi te Ester. Ha yu'un te Amán bayel xiw ta stojol te ajwalil soc te ajwalil-ants.

⁷ Hahch te ajwalil ta banti yaquic ta we'el, bayel ilinem a loc' bahel ta ts'umbil nichimetic ta sna ajwalil. Pero hil te Amán yu'un yalbeyel wocol yu'un scuxlejal ta stojol te ajwalil-ants Ester, como la yil te bin chopol ya xpasbot yu'un te ajwalil.

⁸ Te c'alal suht tal te ajwalil ta ts'umbil nichimetic ta sna ajwalil soc och bahel ta stsahlul na banti yaquic ta we'el, te Amán nijilix a te banti metsel te Ester. Ha yu'un la yal te ajwalil: ¿Yu'un bal yac ac'an yac atsac te ajwalil-ants li' ta jna? xchi. Te c'alal hich la yal te ajwalil, la smucbeyic sit te Amán.

⁹ Te Harbona, te eunuco te ya x'a'tej ta stojol te ajwalil, hich la yal: Ta sna te Amán ay chapalix ts'apbil te' yu'un jihpanel te ha lajuneb yoxwinic (50) xuhc'ubil stoyolil te Amán la schahpan yu'un Mardoqueo, te mach'a lec bin la yalbe sc'oblal te ajwalil, xchi. Jihpanahic tey a, xchi te ajwalil.

¹⁰ Hich la sjihpanic te Amán ta ts'apbil te' te ha nix la schahpan te ha yu'un sc'oblal te Mardoqueo. Hich lahmaj yilimba te ajwalil.