Ester 5 - Bible in Tzeltal Bachajón

Ester la yic' ta we'el te ajwalil soc Amán

¹ Ta yoxebal c'ahc'al te Ester la slap te sc'u' scuenta ajwalil-ants, tal stehc'an sba ta yutil yamaq'uil te sna ajwalil, ta stojol te jtsahl yu'un ajwalil. Hucul ta shuctajib a te ajwalil ta stsalul sna ajwalil, ta stojol te yochibal.

² Te ajwalil, te c'alal la yil te ajwalil-ants Ester te ay ta amac', lec c'oht ta yo'tan, la shach ta stojol Ester te sbastón pasbil ta oro ay ta sc'ab. Ha yu'un te Ester nohpoj bahel, la spicbe sni'il te sbastón.

³ Hich la yal te ajwalil: ¿Bin apas, ajwalil-ants Ester? ¿Bin yac ac'an? Ya ca'bat j'ohliluc te ban c'alal jcuentahinej, xchi.

⁴ La sjac' te Ester: Teme lec ya ya'iy te ajwalil, ac'a taluc yo'tic te ajwalil soc te Amán ta we'el te chahpambil cu'un, xchi.

⁵ La yal te ajwalil: Suja abahic, ic'ahic tal te Amán yu'un ya jpascotic te bin la yal te Ester, xchi. Hich tal te ajwalil soc te Amán ta we'el uch'el te chapal yu'un te Ester.

⁶ Te c'alal yaquic ta yuch'el vino a, te ajwalil la sjoc'obe te Ester: ¿Bin a te yac ac'ane? ya me x'a'botat. ¿Bin ya sc'an awo'tan? Aunque j'ohlil te ban c'alal jcuentahinej, ya me x'a'botat, xchi.

⁷ La sjac' te Ester: Hich ay te bin ya jc'an:

⁸ Teme lecon ta yo'tan te ajwalil, teme lec ya ya'iy te ajwalil te ya ya'bon te bin ya jc'ambe, ac'a taluc te ajwalil soc te Amán yan buelta ta we'el te ya jchahpambe; pajel ya calbe te ajwalile, xchi.

⁹ Te Amán buen tse'el yo'tan a loc' bahel. Pero te c'alal la yil te Mardoqueo te ay ta yochibal sna te ajwalil, te ma ba la stehc'an sba ni lajuc snihc sba te banti ay, mero ilin ta stojol te Mardoqueo.

¹⁰ Pero la scom sba, soc te c'alal c'oht ta sna la sticon ta iq'uel tal te yamigotac soc te Zeres te yihnam,

¹¹ la yalbe ya'iyic sc'oblal te yutsil sc'ulejal, te bayel ta tuhl te snich'nab, soc spisil te bin ut'il tohytesbot sc'oblal yu'un te ajwalil, soc bin ut'il c'ax hich ac'ot ta ich'el ta muc' a yu'un te príncipaletic soc te a'batetic yu'un te ajwalil.

¹² Soc la yal xan te Amán: Te ajwalil-ants Ester mayuc mach'a yan la yic' ta we'el soc te ajwalil, ha nax te ho'one. Soc ha nix hich te pajel ya yic'on ta we'el yan buelta soc te ajwalil.

¹³ Pero spisil ini, mayuc stuc c'ohem ya ca'iy te c'alal ya quil te judio Mardoqueo te hucul ta yochibal sna te ajwalil, xchi.

¹⁴ Te Zeres te yihnam soc spisil te yamigotac hich la yalbeyic: Ac'a yich' pasel ts'apbil te' te ha lajuneb yoxwinic (50) xuhc'ubil stoyolil, pajel yac ac'ambe te ajwalil te ya yich' jihpanel tey a te Mardoqueo. Hich me tse'el awo'tan ya x'ochat ta we'el soc a te ajwalil, xchihic. Lec la ya'iy te Amán, hich la yac' ta chahpanel.