Esdras 6 - Bible in Tzeltal Bachajón

¹ Ha yu'un te ajwalil Darío la yal mandar ta lehel ta sq'uejojibal hunetic te banti ya yich' q'uejel te c'ulejalil tey ta Babilonia.

² La yich' tahel ta sna ajwalil ta Ecbatana te ay ta jsehp q'uinal yu'un Media, ta jun libro te hich ts'ihbabil: Sna'ojibal:

³ Ta shahchibal ha'bil ya'tel ta ajwalil te Ciro, ha nix te ajwalil Ciro la yal ta mandar sc'oblal te sna Dios te ay ta Jerusalén te ac'a yich' cha'pasel te Na te banti ya yich' a'beyel milbil mahtaniletic, soc ac'a yich' pasel te yich'o-ip; ha oxwinic (60) xuhc'ubil stoyolil soc oxwinic xuhc'ubil sjamalil;

⁴ soc oxchohl muc'ul tonetic soc jchohl yach'il te'etic. Te stojole ya me xloc' ta yawil sc'ulejal ajwalil.

⁵ Ha nix hich te biluquetic pasticlambil ta oro soc ta plata yu'un te sna Dios, te la sloq'ues ta templo ta Jerusalén te Nabucodonosor, ac'a yich' suhtel ta yawil ta templo te ay ta Jerusalén, ac'a yich' aq'uel ta sna Dios, xchi.

⁶ Ha yu'un, Tatnai, gobernador ta jehch muc'ul-ha', soc Setar-boznai soc amohloltac ta gobernadoril te ayex ta jehch muc'ul-ha', loc'anic bahel tey a.

⁷ Ma me xcomic te a'tel ta sna Dios. Te gobernador yu'un te judiohetic soc te mamaletic yu'unic ac'a scha'pasic xan te sna Dios ta yawil.

⁸ Ho'on ya cal ta mandar te bin yac apasic ta stojol te mamaletic yu'un te judiohetic ta scuenta scha'pasel te sna Dios: Ta yawil c'ulejalil yu'un te ajwalil banti ya yich' aq'uel te pataniletic ta jehch muc'ul-ha' ya me yich' tojel ta mero yorahil te winiquetic ini scuenta yu'un ma ba ya xquehchaj a te a'tele.

⁹ Soc te bintic yan ya xtuhun: ha torohetic, tat tuminchijetic o jcolel tuminchijetic scuenta scohtol chic'bil mahtaniletic ta stojol te Dios ta ch'ulchan, soc trigo, ats'am, vino soc aceite, chican bin ya sc'anic te sacerdotehetic ta Jerusalén, ya me x'a'botic jujun c'ahc'al, ma ba ya spas falta,

¹⁰ scuenta yu'un ya ya'beyic milbil mahtaniletic te lec yo'tan yu'un te Dios ta ch'ulchan, soc te yacuc sc'opombeyic Dios yu'un te ajwalil soc te yal-snich'nabe.

¹¹ Soc ha nix caloj mandar teme ay mach'a ya sjin te halbil mandaril ini, ac'a yich' tasbeyel loq'uel jch'ix sts'amte'el sna soc ac'a yich' johc'anel a, soc jc'axel jimbil ya xhil te sna yu'un.

¹² Soc te Dios te la yac' nahinuc te sbihil tey a, ac'a sjin spisil ajwalil o pueblo te ya shach sc'ab ta syanijtesel te mandar o ta sjinel te na yu'un Dios ini te ay ta Jerusalén. Ho'on, Darío, calojix mandar. Ac'a yich' pasel ta ora, xchi.

¹³ Hich te Tatnai, gobernador yu'un te q'uinal ta jehch muc'ul-ha', soc te Setar-boznai soc te smohloltac, ora nax la spasic te bin yaloj ta mandar te ajwalil Darío.

¹⁴ Hich te mamaletic yu'un te judiohetic la spasic te a'tel soc lec c'ohtic, hich te bin ut'il halbotic yu'un te jalwanejetic Hageo soc Zacarías snich'an Ido. Hu' yu'unic scha'pasel te Templo ta scuenta smandar te Dios yu'un Israel, soc ta scuenta smandar te Ciro, te Darío soc te Artajerjes, ajwaliletic yu'un Persia.

¹⁵ Te Templo hu' ta pasel ta yoxebal c'ahc'al ta u Adar, ta swaquebal ha'bil yochel ta ajwalil a te Darío ajwalil yu'un Persia.

¹⁶ Te snich'nab Israel, te sacerdotehetic, levitahetic soc te mach'atic suhtemiquix tal ta chuquel, mero tse'el yo'tanic la spasic q'uin yu'un yaq'uel ta stojol Dios te Templo.

¹⁷ Ta scuenta yaq'uel ta stojol Dios, la yaq'uic ho'winic (100) jcolel torohetic, lajunwinic (200) tat tuminchijetic, jbahc' (400) jcolel tuminchijetic, soc lahchayeb (12) tat tentsunetic scuenta stojel mulil yu'un Israel, hich te bin ut'il jujuchahp sts'umbal Israel.

¹⁸ La schahpanic te sacerdotehetic te ya sjelticlan sbahic ta chahpalchahp, soc te levitahetic ta chahpalchahp yu'un ya spasic ya'telic ta stojol Dios ta Jerusalén, hich te bin ut'il ts'ihbabil ta libro yu'un Moisés.

¹⁹ Te mach'atic suhtemiquix tal ta chuquel la spasic te Q'uin Pascua ta schanlajunebal (14) c'ahc'al ta shahchel u.

²⁰ Te sacerdotehetic soc te levitahetic slecubtesejix sbahic ta junax, spisilic lecubtesbilic a. Te levitahetic la smilic te tuminchijetic yu'un te Q'uin Pascua yu'un spisil te mach'atic suhtemic tal ta chuquel, soc yu'un te smohlolic ta sacerdotehil, soc nix la smilic scuenta yu'unic.

²¹ Spisil te snich'nab Israel te suhtemiquix tal ta chuquel la swe'ic soc spisil te mach'atic parte la yac' sbahic ta stojol te bin bohloben sc'oblalic yu'un te nacionetic yu'un ya slehic te Jehová te Dios yu'un Israel.

²² Huqueb c'ahc'al mero tse'el yo'tanic la spasic te Q'uin yu'un Pan te ma ba yich'oj levadura, como te Jehová la yac'ticlambe tse'el yo'tanic, soc la ya'beyix lecub yo'tan ta stojol te ajwalil yu'un Asiria yu'un ya scoltay ta a'tel ta scha'pasel te sna Dios, ha te Dios yu'un Israel.