Esdras 4 - Bible in Tzeltal Bachajón

Ya yaq'uic quehchajuc a'tel ta Templo te jcontrahetic

¹ Te c'alal la ya'iyic te scontratac te Judá soc Benjamín te yaquic ta scha'pasel te templo yu'un Jehová Dios yu'un Israel te mach'atic suhtemiquix tal ta chuquel,

² talic ta stojol te Zorobabel soc te jtsobawetic yu'un jujuchahp sna sme'static, hich la yalic: Ya jcoltayexcotic ta spasel, como yac jlehbelcotic te Dios awu'unic, hich te bin ut'il te ha'exe, soc ha yac ca'bebelcotic milbil mahtaniletic c'alal ta yorahil Esarhadón ajwalil yu'un Asiria te la yic'otcotic tal li'i, xchihic.

³ Pero te Zorobabel, te Jesúa soc te yantic jtsobawetic yu'un jujuchahp sna sme'static ta Israel hich la yalic: Ma spas te ya joquin jbahtic ta spasel te sna te Dios cu'uncotic. Ta jtuquelcotic ya jpascotic te sna Jehová te Dios yu'un Israel, hich te bin ut'il la spasotcotic ta mandar te Ciro ajwalil yu'un Persia, xchihic.

⁴ Ha yu'un te mach'atic ayic tey a hahch schebantesbeyic yo'tanic te pueblo yu'un Judá, la xiwtesic scuenta yu'un ma ba ya x'a'tejic xan a.

⁵ La stojic j'ac'-o'taniletic ta scontrahinel te manchuc ya spasic te bin ay ta yo'tanic spasel, te jayeb tiempo ay ta ajwalil ta Persia te Ciro ha to te c'alal ay ta ajwalil ta Persia te Darío.

⁶ Ta shahchibal ya'tel ta ajwalil te Asuero la slehbeyic smulic te mach'atic nahinemic ta Judá soc ta Jerusalén.

⁷ Te Bislam, Mitrídates, Tabeel soc te yantic smohloltac la sts'ihbabeyic carta te Artajerjes ta yorahil te ay ta ajwalil yu'un Persia. Ts'ihbabil ta arameo-c'op te carta soc c'asesbil ta sc'opic.

⁸ Te Rehum te gobernador soc Simsai te secretario la sts'ihbabeyic carta te ajwalil Artajerjes ta scontrahinel Jerusalén.

⁹ Ta hich ora la sts'ihbayic te carta te Rehum te gobernador, Simsai te secretario, soc te yantic smohloltac, ha te juecetic, gobernadoretic soc te mach'atic ay ya'telic, soc te mach'atic talemic ta Persia, Erec, Babilonia soc Susa, ha te elametic,

¹⁰ soc te yantic pueblohetic te ic'otic loq'uel ta slumalic yu'un te Asnapar te ay muc' sc'oblal soc te ay yutsilal, te la yac'ticlan ta nahinel ta pueblohetic ta sq'uinal Samaria soc ta yan lugaretic ta jehch muc'ul-ha'.

¹¹ Hich ya yal te carta te la sticonic bahel: Ajwalil Artajerjes, ya spatbat awo'tan te a'batetic awu'un ta jehch muc'ul-ha'.

¹² Ac'a sna te ajwalil te bin ut'il te judiohetic te loq'uic tal te atojol, te hulic tal ta jtojolcotic, c'ohtic ta Jerusalén soc yac scha'pasbelic xan te pueblo te stoyoj sba soc te chopole. Yac shachbelic te ts'ahquetic soc yac scha'pasbelic te yich'o-ip.

¹³ Soc ac'a sna' te ajwalil teme ya yich' cha'pasel te pueblo soc teme ya yich' hachel te ts'ahquetic, ma ba ya stojix spatanic soc yantic pataniletic awu'un; hich ya xch'ay te taq'uin te ya yich'ic te ajwaliletique.

¹⁴ Te bin ut'il cuxulotcotic tey ta sna ajwalil, ha yu'un ma jc'ancotic te ya xpehc'aj sc'oblal te ajwalil. Ha scuentahil te la jca'becotic sna' te ajwalil,

¹⁵ scuenta yu'un ya yich' lehel ta libro yu'un sna'ojibal te ame'atatique. Tey ta libro yu'un te sna'ojibal ya me ata te ha stoyoj sba te pueblo, te ya yuts'in te ajwaliletic soc te yantic jsehp q'uinaletic, soc ta namey tal tey hahchem a te toybahile. Ha scuentahil te la yich' jinel yu'un.

¹⁶ Ya ca'becotic sna' te ajwalil teme ya yich' xan cha'pasel te pueblo ini soc teme ya scha'hach xan te ts'ahcule, te q'uinal ay ta jehch muc'ul-ha' ma awu'unuc ya xhil, xchihic ta carta.

¹⁷ Te ajwalil hich la sticombe bahel suhtib: Ya jpatbeyex awo'tanic soc lamaluc me q'uinal yac awa'iyic, gobernador Rehum, secretario Simsai soc te yantic amohloltac te nahinemic ta Samaria, soc te yantic te ayic ta jehch muc'ul-ha'.

¹⁸ Te carta te la aticombonic tal, la yich' ilel ta jtojol, jamal la yich' c'asesel.

¹⁹ La jcal mandar te ya yich' lehel ta antiguo hunetic, la yich' tahel te ta namey tal la stoy sba soc la shach c'op ta stojol ajwaliletic te pueblo ini.

²⁰ Soc chicnaj ajwaliletic ta Jerusalén te bayel yipic, te hu' yu'untaybelic te q'uinal ay ta jehch muc'ul-ha' Éufrates, te la yich'ic tojbeyel spatanic soc yantic pataniletic.

²¹ Ha yu'un pasa ta mandar te winiquetic te ma ba ya yich' cha'pasel te pueblo ha to c'alal ya cal xan mandar.

²² Ch'uhunahic spasel te bin la jcalbeyex. ¿Bin yu'un ya xtohy xan swocol ta uts'inel te ajwaliletic? xchi te carta.

²³ Te c'alal la yich' ilel te carta yu'un te ajwalil Artajerjes ta stojol te Rehum, Simsai te secretario soc te smohloltac, ora bahtic ta Jerusalén ta stojol te judiohetic, tulan la scomic soc yipic te ya'telique.

²⁴ Hich quehchaj te a'tel ta sna Dios te ay ta Jerusalén, ha to c'alal ta schebal ha'bil ya'tel ta ajwalil a te Darío ajwalil yu'un Persia.