Eclesiastés 6 - Bible in Tzeltal Bachajón

¹ Ay bin chopol la jquil ta ye'tal ch'ulchan te ay ta stojol spisil ants-winiquetic:

² Ay mach'atic ya x'a'bot yu'un Dios c'ulejalil, biluquetic soc te ya x'ich'ot ta muc', mayuc falta yu'un spisil bintic ya sc'an yo'tan, pero ma x'a'bot te ya smulan te bintic ay yu'une, yantic mach'atic ya smulanic. Ha tojol nax, soc c'ax chopol.

³ Te winic, aunque ya yac' ho'winic (100) ta tuhl snich'nab soc bayel ha'bil ya xcuxaj, bayel ya xmamalub, teme ma ba ya ya'iybe yutsil te bintic lec, soc teme ma ba ya yich' muquele, ho'on ya cal te ha lec xan a te c'axem alale.

⁴ Como tojol nax ya xtal, soc ya xbaht ta yihc'al q'uinal, soc ya xmucot yu'un yihc'al q'uinal te sbihile.

⁵ Ma ba yiloj te c'ahc'ale, ma ba la sna'be sba. ¡Pero c'ax hich ya scux yo'tan a te bin ut'il te winique!

⁶ Aunque cheb buelta ta lajunwinic yoxbahc' (1,000) ha'bil cuxul, teme ma ba ya smulan te sbiluque, ¿ma bal pajaluc ya xbaht spisilic ta junax lugar?

⁷ Spisil te ya'tel te ants-winic ha yu'un te bin ya x'och ta ye, pero ma xc'ax yo'tan yu'un.

⁸ ¿Binti xan ay yu'un a te mach'a p'ij yo'tan ta stojol te mach'a mayuc sp'ijil yo'tan? ¿Bin ya sta xan a te pobre teme ya sna' stsahtayel sba ta yohlil te yantique?

⁹ Ha lec xan te bin ya yil te sit te bin ut'il te ya xc'ax bahel te bin ya sc'an yo'tan. Ha nix hich tojol nax soc ha snutsel te iq'ue.

¹⁰ Te bintic ay ta ora ini, nameyix la yich' a'beyel sbihil. Na'bil sba bin a te winique: Ma xhu' ya stsac sba soc te mach'a bayel xan yip.

¹¹ Ta banti ay bayel c'opetic, ya xp'ohl te bin tojol nax. Mayuc bin ya xloc' a.

¹² Como ¿mach'a ya sna' bin a te lec yu'un te ants-winic te jayeb c'ahc'al cuxul, te jayeb c'ahc'al scuxlejal te tojol nax, te hich ya xc'ax te bin ut'il axinal? ¿Soc mach'a ya xhu' ya ya'be sna' te winic te bin ya xc'oht ta pasel ta patil yu'un ta ye'tal te ch'ulchane?