Deuteronomio 9 - Bible in Tzeltal Bachajón

Dios ya slajinlan te nacionetic ta Canaán

¹ A'iya me awa'iy, Israel: yo'tic ya sohlat bahel ta Jordán, yu'un ya x'och aten loq'uel nacionetic te c'ax hich yipalic soc c'ax hich yipic a te bin ut'il ha'ate, ha muc'ul pueblohetic te joytaybilic ta ts'ahc c'alal ta ch'ulchan;

² muc'ul nahtil ants-winiquetic, ha sts'umbal te snich'nab Anac, te awa'iybeyej sc'oblal soc awa'iyejix te hich ay ta halel: ¿Mach'a ya xhu' yu'un te ya stsal sba soc te sts'umbal Anac? te xchihe.

³ Na'a me yo'tic te ha te Jehová te Dios awu'un te ya xnahilij bahel awu'un hich te bin ut'il c'ahc' te ya xlajinwan, te ya slajinlan te nacionetic soc ya ya'be spehc'an sbahic ta atojol. Ya me atenticlan loq'uel soc ya me alajinlan ta ora nax, hich te bin ut'il la yalbatix te Jehová.

⁴ Te c'alal la stenix loq'uel ta atojol a te Jehová te Dios awu'un, ma me hichuc yac anop ta awo'tan: Ta scuenta toj ca'tel la yic'on tal Jehová ta yu'untayel ha'i q'uinal ini, ma me xchihucat, como ta scuenta schopolil ya'telic te nacionetic ini te Jehová ya stenticlan loq'uel ta atojol.

⁵ Ma yu'unuc ta scaj stojil awa'tel o ta scaj stojil awo'tan te yac awu'untaybe te sq'uinalique, ha ta scaj chopol ya'telic te nacionetic ini te Jehová te Dios awu'un ya stenticlan loq'uel ta atojol, soc scuenta yu'un ya sc'ohtes ta pasel te bin jc'axel la yalbe ta jamal te atatic Abraham, Isaac soc Jacob.

⁶ Ha yu'un ya me ana' te ma ta scuentahuc stojil awa'tel te ya ya'bat awu'untay te lequil q'uinal ini te Jehová te Dios awu'un, como mero tulan awo'tan te ha'ate.

Israel la stoy sba ta stojol Dios ta wits Horeb

⁷ Na'a me, ma me xch'ay ta awo'tan te la awac' ilinuc te Jehová te Dios awu'un ta jochol taquin q'uinal. Te bin ora loc'at tal ta sq'uinal Egipto ha to c'alal ochat tal li' ta lugar ini atoyoj aba ta stojol Jehová.

⁸ Ta wits Horeb la awaq'uic ilinuc te Jehová, bayel ilin Jehová ta atojolic yu'un ya c'an slajinex ta jc'axel.

⁹ Te c'alal mohon bahel ta wits yu'un ya quich' tal te pehchel tonetic, ha te pehchel tonetic yu'un te chapbil-c'op la spas ta atojolic te Jehová, tey halajon a ta wits cha'winic (40) c'ahc'al soc cha'winic (40) ahc'abal, mayuc bin la jwe' soc ma ba la jcuch' ha'.

¹⁰ Te Jehová la ya'bon te cha'pehch tonetic te ts'ihbabil ta yal sc'ab te Diose; tey ts'ihbabil a spisil te c'opetic la yalbeyex Jehová ta wits ta yohlil c'ahc', ta yorahil te tsoblej.

¹¹ C'alal ts'acay te cha'winic (40) c'ahc'al soc cha'winic (40) ahc'abal, te Jehová la ya'bon te cha'pehch tonetic, ha te tonetic yu'un te chapbil-c'ope.

¹² Hich la yalbon te Jehová: Hahchan, cohan bahel ta ora, como te pueblo awu'un te la awic' loq'uel tal ta Egipto, bohlobenix. Ora nax la yihquitayic hilel te be te la jpasic ta mandar; la spasiquix loc'omba pasbil ta uhltesbil taq'uin, xchi.

¹³ Soc hich la yalbon xan te Jehová: La jquilix te pueblo ini, mero tulan yo'tanic.

¹⁴ Ma me xacomon te ya jlajinlan soc te ya jtup'be sbihilic ta ye'tal ch'ulchan. Yan te ha'ate ya cac' te muc'ul nación ya xc'ohat te c'ax hich yip soc te c'ax hich yipalic a te bin ut'il te pueblo ini, xchi.

¹⁵ Hich suhton cohel tal ta wits te yac ta tihlel a, quich'oj tal ta jc'ab te cha'pehch tonetic yu'un te chapbil-c'op.

¹⁶ La jquil te la atahix amulic ta stojol Jehová te Dios awu'unique; apasojiquix sloc'omba jcolel toro ta uhltesbil taq'uin, la awihquitayic hilel ta ora te be la spasex ta mandar te Jehová.

¹⁷ Ha yu'un la jtsac te cha'pehch tonetic, la jch'oj cohel ta schebal jc'ab, la jwuyticlan ta acomonsitic.

¹⁸ Patil la jpahcan jba ta stojol Jehová cha'winic (40) c'ahc'al soc cha'winic (40) ahc'abal, hich te bin ut'il ta nahil to; mayuc bin la jwe' soc ma ba la jcuch' ha', ta scaj spisil amulic la apasic, ha te bin chopol la apasic ta stojol Jehová te la awaq'uic ilinuc yu'une.

¹⁹ Como la jxi'be te yilimba soc sc'ahc'al yo'tan te Jehová ta atojolic te ya c'an slajinex ta jc'axel a. Pero te Jehová la ya'iybon xan te jc'ope.

²⁰ Soc bayel ilin Jehová ta stojol Aarón, ya c'an slajin ta jyahlel. Ha nix hich la jc'opombe Dios yu'un te Aarón ta hich ora.

²¹ Patil la jtsac te bin la ata amulic a, ha te jcolel toro la apasic, la jchic' ta c'ahc', la juch' ta lec ha to buen ts'ubiltic c'oht; la jch'oj bahel ta ha' ta uc'um te ya xco tal ta wits.

²² Ha nix hich ta Tabera, ta Masah soc ta Kibrot-hataava la ahachbeyic yilimba te Jehová.

²³ Soc c'alal la sticonex loq'uel ta Cades-barnea te Jehová, te hich la yal: Mohanic bahel, u'untayahic te q'uinal te la jca'beyex, te xchihe, ha nix hich la atoy abahic, ma ba la ach'uhumbeyic smandar te Jehová te Dios awu'unic, ma ba la awac' sch'uhunel awo'tanic ta stojol soc ma ba la ach'uhumbeyic te sc'ope.

²⁴ Mero toyol awac'oj abahic ta stojol Jehová yalel te c'alal la jna'beyex abahique.

²⁵ Hich la jpahcan jba ta stojol Jehová; cha'winic (40) c'ahc'al soc cha'winic (40) ahc'abal la jpahcan jba, como yaloj te Jehová te jc'axel ya slajinex.

²⁶ Hich la jcal ta sc'oponel te Jehová: Ay, Cajwal Jehová, ma me xalajin te pueblo awu'un, te bin ay awu'un te la acoltay loq'uel ta scuenta smuc'ul awu'el, te la aloq'ues tal ta Egipto ta scuenta yip ac'ab.

²⁷ Na'a me te awa'bat Abraham, Isaac soc Jacob; ma me xawich'be ta cuenta te stulanil yo'tan te pueblo ini soc te sbohlil soc te smule.

²⁸ Ma me hichuc ya yalic te mach'atic ayic ta q'uinal banti la aloq'uesotcotic talel: Te bin ut'il te Jehová ma ba hu' yu'un yotsesbel tey ta q'uinal te la yalbe ya ya'be, o te bin ut'il la yihlay, hich la sloq'ues tal scuenta yu'un ya smilticlan ta jochol taquin q'uinal, ma me xchihuquic.

²⁹ Ha pueblo awu'un, ha te bin ay awu'un te la aloq'ues tal ta smuc'ul yip awu'el soc ta scuenta ac'ab ahachoj, xchihon.