Daniel 5 - Bible in Tzeltal Bachajón

Te bin ts'ihbabil ta pahc'

¹ Te ajwalil Belsasar la spas muc'ul q'uin yu'un lajunwinic yoxbahc' (1,000) ta tuhl príncipaletic yu'un, soc la yuch' vino ta stojolic.

² C'alal u'untayot yu'un te vino, te Belsasar la sticon ta ich'el tal te vasohetic pasbilic ta oro soc ta plata te ich'otic talel ta templo ta Jerusalén yu'un te Nabucodonosor te stat, yu'un ya yuch'ic vino a te ajwalil soc te príncipaletic, te antsetic yu'un soc te yan antsetic yu'une.

³ Hich la yich'ic talel te vasohetic pasbilic ta oro te loq'uemic tal ta templo yu'un Dios te ay ta Jerusalén, la yuch'ic vino a te ajwalil soc te príncipaletic, te antsetic yu'un soc te yan antsetic yu'une.

⁴ La yuch'ic vino soc la yalbeyic yutsil sc'oblalic te diosetic te pasbilic ta oro, ta plata, ta bronce, ta hierro, ta te' soc ta ton.

⁵ Ta yorahil nix chicnaj yal sc'ab winic te la sts'ihbay ta repello ta pahc' yu'un te sna ajwalil, nopol ta yawil c'ahc'. Te ajwalil la yil te c'abal te yac ta ts'ihbajele.

⁶ Sacalub yu'un soc och xiwel ta yo'tan, laj yip yacan soc la stahticlan sba sjol yacan yu'un.

⁷ Tulan awon te ajwalil te ya me yiq'uic tal te jpas-señahetic, caldeohetic soc te jna'ojeletique; te ajwalil hich la yalbe te p'ijil winiquetic yu'un Babilonia: Te mach'a ya yil te bin ts'ihbabil ini soc ya ya'bon jna' te bin sc'oblale, ya x'a'bot slap chi'in-yaxal c'u'ul, ya x'a'bot yuhan cadena pasbil ta oro, soc ha yoxebal ajwalil ya xc'oht ta ban c'alal jcuentahinej, xchi.

⁸ Hich ochic tal spisil te p'ijil winiquetic yu'un te ajwalil, pero ma ba hu' yu'unic yilel te bin ts'ihbabil o te ya ya'beyic sna' te ajwalil te bin sc'oblale.

⁹ Ha yu'un och bayel xan xiwel ta yo'tan te ajwalil Belsasar soc sacalub, soc te príncipaletic yu'un ma ba la sna'ic bin ya spasic.

¹⁰ Te ajwalil-ants, c'alal la ya'iy te bin la yal te ajwalil soc te príncipaletic yu'un, och tal ta banti ay te q'uin, hich la yal: ¡Ac'a cuxajuc sbahtel q'uinal te ajwalil! Ma me xiwat soc ma me sacalub asit awelaw.

¹¹ Li' ta banti yac awa'iy cuentahinwanej ay jtuhl winic te ay ta yo'tan te espíritu yu'un te ch'ul diosetic, soc ta yorahil atat chicnaj te ya sna' q'uinal, ay bin ya sna' soc ay sp'ijil yo'tan hich te bin ut'il te sp'ijil yo'tan te diosetique. Te ajwalil Nabucodonosor, te atat, la ya'be ya'tel ta jtsobaw yu'un spisil te jpas-señahiletic, jmonawetic, caldeohetic soc jna'ojeletic,

¹² como c'ax lec xan te espíritu yich'oj, bayel xan ya sna' bintic ay ta na'el, soc ya xhu' yu'un sna'beyel scuentahil wayichiletic, yalbeyel sc'oblal chuhcul c'opetic soc schahpanel te bintic wocol ta chahpanel; ha te Daniel, te a'bot yan sbihil Beltsasar yu'un te ajwalile. Ticona ta iq'uel tal te Daniel, ha ya ya'bat ana' te bin ya yal te bin ts'ihbabil, xchi.

¹³ Ha yu'un la yiq'uic tal ta stojol ajwalil te Daniel. Hich halbot yu'un te ajwalil: ¿Ha'at bal te Daniel te ic'otat loq'uel tal ta Judea yu'un te jtate?

¹⁴ La jca'iybat ac'oblal te ay ta awo'tan te espíritu yu'un te ch'ul diosetic, te yac ana' q'uinal, ay bin yac ana' soc te ay bayel sp'ijil awo'tan.

¹⁵ Te p'ijil winiquetic soc te jmonawetic la yich'ic iq'uel tal ta jtojol yu'un ya yilic te bin ts'ihbabil ini soc ya yalbonic bin sc'oblal, pero ma ba hu' yu'unic ya ya'bonic jna' te sc'oblale.

¹⁶ Pero ca'iyej te ya xhu' awu'un yalbeyel sc'oblal soc schahpanel bintic chuhcul ta chahpanel. Teme ya xhu' yac awil te bin ts'ihbabil li'i soc te yac awalbon te sc'oblale, ya x'a'botat alap chi'in-yaxal c'u'ul, ya x'a'botat awuhan cadena pasbil ta oro, soc ha yoxebal ajwalil ya xc'ohat ta ban c'alal jcuentahinej, xchi.

¹⁷ Hich te Daniel la sjac'be te ajwalil: Hilan soc te mahtaniletic awu'un, a'beya yantic. Ya quil te bin ts'ihbabil soc ya ca'bat ana' te sc'oblale.

¹⁸ Ajwalil, te Dios te mero toyol ay la ya'be ya'tel ta ajwalil te atat Nabucodonosor, la ya'be te smuc'ul c'oblal, yutsil sc'oblal soc smuc'ul yutsilal.

¹⁹ Ta scuenta te smuc'ul c'oblal te a'bot yu'une, spisil te pueblohetic, nacionetic soc c'opiletic xiwic soc nihquic ta stojol. La smil te mach'a la sc'an la smil, soc la yac' cuxajuc te mach'a la sc'an la yac' c'axuc; la stoybe sc'oblal te mach'a la sc'an la stoybe sc'oblal, soc la spehc'an te mach'a la sc'an la spehc'an.

²⁰ Pero c'alal la stoy sba soc te tulan la yac' sba yu'un te stoybahil, la yich' loq'uesel ta shuctajib soc la yich' pojbeyel te yutsilale.

²¹ La yich' loq'uesel ta stojol te ants-winiquetic, te spensar hich c'oht te bin ut'il te spensar chambahlam, soc la sjoquin ta nahinel te ha'mal burrohetique. A'bot swe' ha'mal hich te bin ut'il wacax, t'ux sbaq'uetal ta sts'ujulil ch'ulchan, ha to c'alal la sna' te Dios te mero toyol ay ha toyol xan ya'tel ta stojol ban c'alal scuentahinej winiquetic, soc te ya ya'be ya'tel ta cuentahinwanej te mach'a ya sc'an ya ya'be.

²² Pero ha'at, Belsasar te snich'anat, ma ba la apehc'an aba aunque ana'oj spisil ini.

²³ La atoy aba ta stojol te Ajwalil yu'un te ch'ulchan; la aticon ta ich'el tal ta atojol te vasohetic yu'un te templo yu'un; ha'at soc te príncipaletic, te antsetic awu'un soc te yan antsetic awu'un la awuch'ic vino a; soc la awalbe yutsil sc'oblal te diosetic te pasbilic ta plata, oro, bronce, hierro, te' soc ton, te ma xyilic q'uinal, ma xya'iyic c'op, soc mayuc bin ya sna'ic; ma ba la awich' ta muc' te Dios te ay ta sc'ab te acuxlejal soc spisil te behetic awu'une.

²⁴ Ha yu'un te la sticon tal ta atojol te c'abal te la sts'ihbay te c'opetic ini.

²⁵ Hich ay te bin ts'ihbabil: MENE, MENE, TEKEL, PARSIN, xchi.

²⁶ Hich ay te sc'oblale: MENE: Dios la yahtaybat te sc'ahc'alel awa'tel ta ajwalil, la ya'be slajibal, xchi.

²⁷ TEKEL: la awich' p'isbeyel awalal ta balanza, chicnaj te ya spas falta, xchi.

²⁸ PARSIN: te ban c'alal acuentahinej jatem soc ya x'a'bot ta scuenta te medohetic soc persahetic, xchi.

²⁹ Hich te Belsasar la yal mandar te ya x'a'bot slap chi'in-yaxal c'u'ul te Daniel, te ya x'a'bot yuhan cadena pasbil ta oro soc te ya yich' puhquel ta halel te ha yoxtuhlul ajwalil ya xc'oht te ban c'alal scuentahinej te ajwalile.

³⁰ Ha nix ta ahc'abal laj ta milel te Belsasar te ajwalil yu'un te caldeohetique.

³¹ Te Darío talem ta Media, la yu'untay te ban c'alal scuentahinej, ay cheb schanwinic (62) ya'bilal a.