Daniel 12 - Bible in Tzeltal Bachajón

Yorahil slajibal

¹ Ta hich ora ya xhahch te Miguel, te muc'ul príncipal te ya scanantay te pueblo awu'une. Ha yorahil bayel wocol, mayuc hich c'ohem ta pasel c'alal hahchemic nacionetic c'alal ta hich ora. Pero ta hich ora ya x'ac'ot ta libre te pueblo awu'un, spisil te mach'atic ts'ihbabil sbihilic ta libro.

² Tsobol te mach'atic wayalic ta ts'ubil lum ya xhahchic: ay mach'atic ya yich' scuxlejalic scuenta sbahtel q'uinal, te yantic ya xbahtic ta q'uexlal soc ta p'ajel sbahtel q'uinal.

³ Te mach'atic ay sp'ijil yo'tanic hich ya xtihl sts'anabul te bin ut'il sts'anabul te syaxal ch'ulchan; te mach'atic ya sp'ijubteslan tsobolic ta bin toj ta pasel hich ya xc'ohtic te bin ut'il te eq'uetic sbahtel q'uinal.

⁴ Pero ha'at, Daniel, maca te c'opetic, a'beya sello te libro ha to c'alal yorahil slajibal. Ay tsobolic te ya xtal xbahtic ta bayuc, soc ya xp'ohl te bintic ay ta na'el, xchi te Gabriel.

⁵ Ho'on te Daniel la jquil ay cha'tuhl yantic te tec'ajtic, jtuhl ta jehch muc'ul-ha', jtuhl ta yan jehch.

⁶ Te jtuhle, hich la yalbe te mach'a sc'u'inej lino pac' te ay ta sba te muc'ul-ha': ¿Bin ora ya sta yorahil slajibal te bintic jchahp ya xc'oht ta pasel ini? xchi.

⁷ Te winic sc'u'inej lino pac', te ay ta sba te muc'ul-ha', la shach mohel ta stojol ch'ulchan te swa'el-c'ab soc te sq'uexam-c'ab, la jca'iy te la yal ta jamal ta scuenta te mach'a cuxul sbahtel q'uinal, te ya xhalaj jun tiempo, cheb tiempo soc ohlil tiembo. Ha ya xc'oht ta pasel spisil ini te c'alal ya xquehchaj ta lajimbeyel yip te ch'ul pueblo, xchi.

⁸ La jca'iy, pero ma ba la jna'be scuentahil. Ha yu'un hich la joc'obe: Tatil, ¿bin yilel ya xc'oht te slajibal te bintic ay ini? xchihon.

⁹ Hich la sjac': Bahan, Daniel, como spisil te c'opetic ini macalix soc yich'ojic sello ha to c'alal yorahil slajibal.

¹⁰ Ay tsobolic te lecubtesbil soc pocbil ya xc'ohtic; yan te mach'atic chopolic stalel schopol ya xhilic, soc mayuc ni jtuhluc te mach'a chopol yo'tan te ya sna'be scuentahil, pero te mach'atic p'ij yo'tanic ya me sna'beyic scuentahil.

¹¹ C'alal ya yich' comel ta aq'uel te chic'bil mahtanil scuenta jujun c'ahc'al ha to c'alal ya xtehc'anot te bin ilobtic sba te ya xjinawan, ha lajuneb yo'winic schanbahc' (1,290) c'ahc'al.

¹² Bayel me yutsil te mach'a ya smahliy soc te ya xc'ax yu'un ho'lajuneb shucwinic schanbahc' (1,335) c'ahc'al.

¹³ Pero te ha'ate, ya xbahat c'alal ta slajibal acuxlejal, yac acux awo'tan, soc ta slajibal c'ahc'al ya xhahchat yu'un yac awich' te bin ya xc'oht ta acuenta, xchi.