Daniel 11 - Bible in Tzeltal Bachajón

¹ Ta shahchibal yochel ta ajwalil te Darío, te talem ta Media, la jca'be yip yo'tan soc la jcoltay.

Te ajwaliletic ta norte soc ta sur

² Yo'tic ya ca'bat ana' te bin smelelil. Ya to xchicnaj oxeb ajwaliletic ta Persia, te schanebal c'ax hich jc'ulej ya xc'oht a te bin ut'il spisil te yantique. Te c'alal ya sta yip ta scuenta sc'ulejal, ya shachbe yo'tan spisilic ta scontrahinel te nación Grecia.

³ Patil ya xhahch ajwalil te bayel yip te ya xcuentahinwan ta scuenta bayel yip, soc ya spas te bin ya sc'an yo'tan.

⁴ Pero te c'alal hahchemix a, ya me yich' jimbeyel te ban c'alal scuentahinej soc ya yich' puhquel ta schanchahpal te ic' yu'un te ch'ulchan; ma ba ya x'a'bot te sts'umbal soc ma ba ya stahbe c'ohel yip te bin ut'il te yu'une, como ya me yich' bulel loq'uel, ha ya x'a'bot ta scuenta yantic.

⁵ Te ajwalil ta stojol sur, bayel yip ya xc'oht, pero ay jtuhl príncipal yu'un te c'ax hich yip ya xc'oht a te bin ut'il te yip te ajwalile, bayel yip ya xc'oht soc muc' ban c'alal ya scuentahin.

⁶ C'alal ya xc'ax ha'biletic ya schap sc'opic, te yantsil-nich'an te ajwalil ta stojol sur ya xtal ta stojol te ajwalil ta stojol norte yu'un ya yac' lamal q'uinal. Pero ma ba ya xhalaj te yip te ants, soc ma ba ya xhalaj te yip te ajwalil, como te ants ya x'ac'ot ta c'abal soc te mach'atic ic'bilic tal yu'un, soc te yal soc te mach'atic coltayot yu'un ta hich ora.

⁷ Pero ay jtuhl sts'umbal te ants te ya xhuhcaj ta shuctajib. Ya xtal soc soldadohetic yu'un ta ya'beyel guerra te ajwalil ta norte, ya x'och bahel ta ahnibal ts'ahc yu'un, ya ya'be guerra soc ya stsal.

⁸ Soc ya me yich'ic bahel ta Egipto te diosetic yu'unic, ha te loc'ombahetic yu'unic te pasbilic ta uhltesbil taquin, soc yantic biluquetic pasticlambil ta oro soc ta plata. Ay ha'bil te ma ba ya ya'be guerra te ajwalil ta norte.

⁹ Hich te ajwalil ta norte ya me yochintay te ban c'alal scuentahinej te ajwalil ta sur, patil ya suht bahel ta sq'uinal.

¹⁰ Pero te snich'nab te ajwalil ta norte ya schahpan sbahic yu'un guerra, ya stsobic bayel soldadohetic. Ora ya xtal hich te bin ut'il snojel ha', ya xc'ax bahel; patil ya suht tal ta ya'beyel guerra c'alal ta ahnibal ts'ahc yu'un te ajwalil ta sur.

¹¹ Ha yu'un te ajwalil ta sur bayel ya x'ilin, ya xloc' tal ya'be guerra te ajwalil ta norte, te ha ya stsob bayel soldadohetic, pero ya stsalotic yu'un te ajwalil ta sur.

¹² Te c'alal tsalbilix yu'un te tsobol soldadohetic, ya stoy sba soc ya smilticlan bayel ta mil, pero ma ba ya xhalaj te yipe.

¹³ Te ajwalil yu'un norte ya scha'tsob yan soldadohetic yu'un, c'ax hich yipal a te bin ut'il ta nahil to. C'alal ya xc'ax cheb oxeb ha'bil ya xcha'baht xan ya'be guerra soc bayel soldadohetic te chapalic ta leque.

¹⁴ Ta hich ora ay tsobolic te ya xhahch scontrahinic te ajwalil ta sur. Te chopol winiquetic ta alumal ya xhahchic, scuenta yu'un ya yaq'uic c'ohtuc ta pasel te bin chicnaj ta nahalsitil, pero ma xc'oht ta pasel yu'unic.

¹⁵ Ya xtal te ajwalil ta norte, ya sbut'be hahchel lum ta sjoyobal te ts'ahc, ya me yu'untay te muc'ul pueblo te ay yip te sts'acule. Te soldadohetic ta sur ma xhu' smacbelic, ni ha'uc te tsahbil soldadohetic yu'un, como mayuc yipic ta scomel.

¹⁶ Te mach'a tal ta contrahinel ya me spas te bin ya sc'an yo'tan, mayuc mach'a ya xhu' ya stsac sba soc. Ya xhalaj ta t'ujbil q'uinal te ya xlajinot yu'un te yipe.

¹⁷ Ya me snop ta yo'tan te ya xtal soc spisil yip ban c'alal scuentahinej. Ya schap sc'op soc te ajwalil ta sur, ya ya'be yihnamin jtuhl yantsil-nich'an scuenta yu'un ya sjimbe ya'tel te ajwalil, pero ma ba ya xc'oht ta pasel yu'un.

¹⁸ Patil ya xbaht ta banti te pueblohetic ta ti'ti'mar, ya me yu'untay tsobol. Pero ay jtuhl jtsobaw yu'un soldadohetic te ya scom te tse'layel yu'une, ha ya yac' c'ohtuc ta stojol te tse'layel yu'une.

¹⁹ Patil ya suht bahel ta ahnibaletic yu'un ta slumal, pero ya sc'ohchin sba soc ya xyahl cohel, ma ba ya xtahotix.

²⁰ Ya xchicnaj sjelol te ya sticon bahel jc'an-patan scuenta yu'un ya sta xan yutsilal te ban c'alal scuentahinej; pero ma ba ya xc'ax bayel c'ahc'al a ya xlaj, aunque ma ha'uc ta scuenta ilimba o guerra.

²¹ Ya xchicnaj sjelol jtuhl winic te p'ajbil, te ma ba ac'ot ta ich'el ta muc' hich te bin ut'il ya sc'an ajwalil. Repente nax ya xtal soc ya yich' ya'tel ta ajwalil ta scuenta lo'loywanej.

²² Bayel soldadohetic ya yich'ic mesel bahel ta stojol hich te bin ut'il snojel ha', pajal ya yich'ic lajinel soc te príncipal yu'un te chapbil-c'ope.

²³ Te c'alal schapojix sc'op soc a, ya xlo'loywan, soc ya yich' yip aunque mayuc tsobol mach'atic ay yu'un.

²⁴ Te c'alal lamal q'uinal ya ya'iy te jsehp q'uinal soc te ay sc'ulejal a, ya me yochintay soc ya me spas te bintic mayuc la spas te sme'stat o te smamuch. Ya spucbe te soldadohetic yu'un te biluquetic soc c'ulejaliletic la sta ta guerra. Ya snop bin ut'il ya stsal te tulan ahnibaletic, pero ma ba ya xhalaj te hich ya spase.

²⁵ Ta scuenta bayel soldadohetic ya shach yip soc ya yich' yip yo'tan ta scontrahinel te ajwalil ta sur. Te ajwalil ta sur ya me ya'be guerra soc tsobol soldadohetic, pero ma xhu' yu'un ta scaj te ya snopic te ya x'ac'ot ta c'abal.

²⁶ Ya xjihnot yu'un te mach'atic ya xwe'ic ta mesa yu'un; te soldadohetic yu'un ya yich'ic lajinel, soc tsobolic ya xlajic ta milel.

²⁷ Te cheb ajwaliletic ya snop ta yo'tanic spasel te bin chopol. Pajal ya shuhcan sbahic ta mesa, talel c'axel ya slo'tiy sbahic, pero mayuc bin ya xloc' a como ma to ba stahoj yorahil te ya xc'oht ta pasele.

²⁸ Te ajwalil te talem ta norte ya suht bahel ta slumal soc bayel sc'ulejal, pero ta yo'tan ya scontrahin te ch'ul chapbil-c'ope; ya spas te bin ya sc'an yo'tan, patil ya suht bahel ta slumal.

²⁹ Ta yorahil te chapale ya scha'suht xan bahel ta stojol sur, pero ma hichuc ya xc'oht ta loq'uel te bin ut'il ta nahil to.

³⁰ Como ya xtalic ta contrahinel yu'un barcohetic talemic ta smahlib c'ahc'al, ya xpehc'aj yo'tan yu'un; hich ya suht bahel soc ya st'omtes bahel ta stojol te ch'ul chapbil-c'op te tulan yilimba, soc ya spas te bin ya sc'an te yo'tane. Ya suht xan bahel soc lec yo'tan ta stojol te mach'atic ya yihquitayic hilel te ch'ul chapbil-c'ope.

³¹ Te soldadohetic yu'un ya me sbohlobtesbeyic sc'oblal te ch'ul awilal soc te ahnibal ts'ahc, ya me scom ta aq'uel te chic'bil mahtanil scuenta jujun c'ahc'al soc ya yac' tey a te bin ilobtic sba te ya xjinawan.

³² Ta scuenta lo'loywanej ya stsal te mach'atic ya sc'axuntayic te chapbil-c'op; pero te pueblo te ya sna'be sba te Dios yu'un ya me yac' yip yo'tanic soc ay bin ya spasic yu'un.

³³ Te mach'atic yu'un te pueblo te ay sp'ijilic ya me snohpteslan tsobolic; pero mayuc bayel c'ahc'al ya xlajic ta espada soc ta c'ahc', ya xchucotic soc ya xpojbotic sbiluquic.

³⁴ Te c'alal ya xyahlic ya xtal jtebuc coltayel yu'unic, soc ya xjoquinotic yu'un tsobol jchebal-o'tanetic.

³⁵ Soc ay p'ijil winiquetic te ya xyahlic, scuenta yu'un ya yich'ic lecubtesel soc poquel, ha to c'alal ya xc'oht yorahil te chapale, como ay to sc'an ya xc'oht yorahil te halbile.

³⁶ Te ajwalil ya me spas te bin ya sc'an yo'tan. Ya me stoy sba soc toyol ya yac' sba yu'un spisil diosetic, soc ay bintic c'ax chopol ya yal ta stojol te Dios yu'un te diosetique. Lec ya xc'oht ha to c'alal ts'acal ya xc'oht te yorahil ilimba, como ya me xc'oht ta pasel te bin chapale.

³⁷ Ma ba ya yich' ta muc' te diosetic yu'un te sme'stat, o te dios te ya smulanic te antsetic, biluc diosil ma ba ya yich' ta muc', como toyol ya yac' sba yu'un spisil.

³⁸ Pero ya yich' ta muc' te dios yu'un tulan ahnibaletic, ha dios te ma ba sna'beyejic sba te sme'state. Ha ya yich' ta muc' ta scuenta oro, plata, t'ujbil tonetic soc bintic bayel stojol.

³⁹ Ta scuenta te dios yu'un jyanlum ya scontrahin te ahnibaletic te c'ax tulanic. Ya me yac' ta ich'el ta muc' te mach'atic ya x'ich'ot ta cuenta yu'unic, ya ya'be scuentahinic tsobolic soc ya spucticlambe q'uinal scuenta stojolic.

⁴⁰ C'alal ya xc'oht yorahil te slajibale, te ajwalil ta sur ya me ya'be guerra te ajwalil ta norte; pero ha ya xloc' tal ta stojol hich te bin ut'il chahwuquil ha'al, ya xtal soc carretahetic yu'un guerra, soldadohetic mohemic ta cawu soc bayel barcohetic; ya yochintay bayel q'uinaletic, soc ya xc'ax xan bahel.

⁴¹ Ya me x'och ta q'uinal te ay yutsilal, bayel ta jsehp q'uinal ya xyahlic ta stojol; pero ya xcol stuquelic te Edom, Moab soc jteb ma spisiluc te sts'umbal Amón.

⁴² Te soldadohetic yu'un, ya me yu'untayic yantic q'uinaletic, soc ma ba ya xcol ta c'abal te Egipto.

⁴³ Ya me yich' bahel te c'ulejalil oro soc plata, soc spisil te biluquetic te buen t'ujbilic ta Egipto. Te mach'atic yu'un Libia soc Etiopía ya me yac' sbahic ta stojol.

⁴⁴ Pero ya xc'oht c'op ta stojol te ya xtal ta sloq'uib c'ahc'al soc ta norte te ya ya'be xiwel, ya me xloc' bahel soc bayel ilimba ta sjinel soc ta smilticlanel tsobolic.

⁴⁵ Ya spas te nahilpaq'uetic yu'un ajwalil ta ohlil yu'un te mar soc te ch'ul wits te ay yutsilal; pero tey ya xlaj a, mayuc mach'a ya xcoltayot yu'un.