Daniel 10 - Bible in Tzeltal Bachajón

Snahalsit Daniel ta ti' muc'ul-ha' Tigris

¹ Ta yoxebal ha'bil yochel ta ajwalil yu'un Persia a te Ciro, ay bin a'bot sna' te Daniel, te Beltsasar yan sbihile. Melel te bin la yal soc ha sc'oblal muc'ul guerra, pero te Daniel la sna'be scuentahil te c'op soc la sna' bin la yal te nahalsitile.

² Ta hich ora, ho'on, Daniel, oxeb semana yacon ta mel-o'tan.

³ Ma ba la jwe' lequil we'elil, ma ba la jwe' ti'bal, ma ba la jcuch' vino, soc ma ba la jca'be jba perfume ha to c'alal ts'acay te oxeb semana.

⁴ Ta chaneb scha'winic (24) c'ahc'al ta shahchel u, ayon ta sti'il te muc'ul-ha' Tigris.

⁵ La jquil mohel, tey ay a jtuhl winic slapoj lino pac' soc te schuquil-ch'uht pasbil ta oro te talem ta Ufaz.

⁶ Te sbaq'uetal hich te bin ut'il yaxcancan ton, te sit yelaw hich yilel te bin ut'il tsantsehwal, te sit hich yilel te bin ut'il tsumbil c'ahc', te sc'ab soc te yoc hich yilel te bin ut'il ch'ulbil bronce, soc te sc'op pajal soc sc'op tsobol ants-winiquetic.

⁷ Ho'on nax jtuquel la jquil te nahalsitil. Te yantic winiquetic te sjoquinejonic ma ba la yilic, ha u'untayotic yu'un bayel xiwel, hich ahnimal baht snac' sbahic.

⁸ Jtuquel hilon ta yilel te nahalsitil te jchahp ta ilel a. Laj quip, sacub jsit quelaw yu'un, mayuc bin hu' cu'un.

⁹ C'alal la jca'iybe sc'op, ch'ay q'uinal, hilon ta lum yu'un.

¹⁰ Ay c'abal te la spicon, la yac' jquejan hahchel jba ta sjol cacan soc ta stahn jc'ab.

¹¹ Hich la yalbon: Daniel, te bayel c'uxat ta o'tanil, a'iya awa'iy te bin ya calbat. Hahchan, como ticombilon tal ta atojol, xchi. C'alal hich la yalbon, yacon ta nihquel a la jtehc'an jba.

¹² Hich la yalbon: Ma xiwat, Daniel, como c'alal ta shahchibal te la anop ta awo'tan te yac ana'be scuentahil soc te la apehc'an aba ta stojol te Dios awu'un, la ya'iybat te ac'ope. Ha talon yu'un te ac'ope.

¹³ Pero te príncipal yu'un ban c'alal scuentahinej Persia la scomon jun scha'winic (21) c'ahc'al. Pero te Miguel, jtuhl jtsobaw yu'un te príncipaletic, tal scoltayon, tey hilon soc a te ajwaliletic yu'un Persia.

¹⁴ Talemon yu'un ya ca'bat ana' bin ya xc'oht ta pasel ta stojol alumal ta patil bahel, como te nahalsitil ha sc'oblal te yorahil ta patil bahel, xchi.

¹⁵ C'alal hich yac yalbelon a, nijilon ta yilel te lum soc uma'ubenon.

¹⁶ Pero te mach'a pajal yilel soc snich'an winic la spicbon sti'il que, hich la jam que soc c'opojon, hich la jcalbe te mach'a ay ta jtojol: Tatil, hahch jwocol yu'un te nahalsitil soc mayuc quip ya ca'iy.

¹⁷ ¿Bin ut'il c'an hu'uc yu'un te a'bat awu'un te ya sc'oponat, tatil, como lajemix quip soc wocoltic ya quich' ic'? xchihon.

¹⁸ Hich te mach'a pajal yilel soc snich'an winic la scha'picon, la ya'bon quip,

¹⁹ hich la yalbon: Ma me xiwat, ha'at te c'uxat ta o'tanil, lamaluc me q'uinal xawa'iy; ac'a xan fuersa, ayuc me yip awo'tan, xchi. C'alal yac sc'opombelon a, la jquich' quip, hich la jcalbe: C'opojan, tatil, como la awa'bon xan quip, xchihon.

²⁰ Ha yu'un hich la yalbon: ¿Ya bal ana' bin yu'un te talon ta atojol? Ya sc'an te ya suhtonix bahel ta ya'beyel guerra te príncipal yu'un Persia. C'alal ya xlaj co'tan soc ta guerra, ya xtal te príncipal yu'un Grecia.

²¹ Pero ya calbat te bin ts'ihbabil ta libro yu'un te bin smelelile. Mayuc mach'a ya scoltayon ta ya'beyel guerra, ha nax te Miguel, te príncipal awu'une, xchi.