Cantares 7 - Bible in Tzeltal Bachajón

Winic:

¹ ¡C'ax t'ujbil awoc ta atep, yantsil-nich'anat príncipe! Te seplejal acub pajal soc ch'albil oro, ha ya'tel te mach'a ya sna' spasel.

² Te amuxuc' pajal soc jun sepel vaso te spisil ora ay vino tey a. Te ach'uht pajal soc jbus trigo te joytaybil ta lirio-nichim.

³ Te schebal achu' pajal soc te wats yal gacela-chij.

⁴ Te anuc' pajal soc bahlal ts'ahc pasbil ta marfil; te asit pajal soc te estanquehetic yu'un ha' ta Hesbón ta nopol te yochibal Bat-rabim; te ani' pajal soc bahlal ts'ahc yu'un Líbano te yiloj sba soc Damasco.

⁵ Te ajol, ha scoronahinejat hich te bin ut'il wits Carmelo; chi'in-yaxal hilera yilel te stsotsel ajol; te ajwalil chucul c'ohem yu'un stehnil ajol.

⁶ ¡C'ax t'ujbilat soc mulantic aba, ha'at te c'uxat ta co'tan, te mulambilat cu'un!

⁷ Te anahtil pajal soc te xahn; te achu' pajal soc jchej sit xahn.

⁸ Hich la jcal: Ya xmohon ta xahn, ya jtsacbe te site, xchihon. Ha'uc pajal soc jchej sit ts'usub te achu'e, te yic'al awe pajaluc soc yic' manzana;

⁹ te apa'jaj pajaluc soc lequil vino te ya xc'oht ta stojol te mach'a c'ux ta co'tan soc c'un ya xmahl bahel ta sti'il ye te mamaletique.

Ants:

¹⁰ Ho'on yu'unon te mach'a c'ux ta co'tan, ha sc'anojon.

¹¹ La', ha'at te c'uxat ta co'tan, conic ta aquiltic, c'axuc ahc'abal cu'untic ta tut pueblohetic.

¹² Ta sab ya xbohotic ta ts'usubiletic ta yilel teme puhlinemiquix, teme yaquix ta t'ohmel te sniche, teme nichinemix te granadahetique. ¡Tey ya ca'bat a te sc'uxul co'tan!

¹³ Te mandrágorahetic ya spuquic bahel sumet yic', soc ta sti'il jnatic ay spisil ta chahp lequil sit te'etic, ay yach'il soc ay pajuben te jq'uejojbat, ha'at te c'uxat ta co'tane.