Amós 6 - Bible in Tzeltal Bachajón

Sjinel Israel

¹ ¡Obol sbahic te mach'atic mayuc swocolic ta Sión soc te mach'atic jun yo'tan nahinemic ta wits Samaria, te mach'atic ich'bilic ta cuenta soc te príncipaletic ta nacionetic, ha te mach'atic ta sna Israel te ya xbahtic ta stojolic!

² Bahan ta Calne, ilawilic, c'axan bahel ta muc'ul Hamat patil cohanic bahel ta Gat yu'un te filisteohetique. ¿Yu'un bal c'ax lec xan te ha'ex te bin ut'il te nacionetic ini? ¿Yu'un bal c'ax muc' xan te sq'uinalic te bin ut'il te aq'uinalique?

³ ¡Ha'ex te yac ac'anic te namal ya xhil te chopol sc'ahc'alel, yac awaq'uic nohpojuc tal te cuentahinel yu'un te tulan uts'inele!

⁴ Ya xwayex ta wayibaletic pasbilic ta marfil, soc yac acux awo'tanic ta huctajibaletic yu'un cux-o'tanil; yac awe'ic te tut tuminchijetic te talemic ta jtsohb tuminchijetic, soc yac awe'ic te tut wacaxetic te talemic ta banti q'uejbilique;

⁵ yac awixtalan anuq'uic ta scuenta sc'op te flauta, soc yac anopic spasel yantic a'tejibaletic yu'un música hich te bin ut'il David;

⁶ yac awuch'ic vino ta muc'ul vasohetic, soc yac amal abahic ta lequil perfumehetic, pero ma ba yac amel awo'tanic yu'un te jinel yu'un José.

⁷ Ha yu'un ha nahil ya x'ic'otex bahel ta chuquel, soc ya xlaj te q'uinetic te awac'oj abahic ta spasel.

⁸ Te Jehová yaloj ta jamal ta scuenta stuquel, te Jehová, te Dios te scuentahinej spisil, hich yaloj: Ya quihlay te ya scuy sba ta muc' te Jacob, ya jp'aj te t'ujbil muc'ul nahetic yu'une; ya cac' ta c'abal te muc'ul pueblo soc spisil te bintic ay tey a, xchi.

⁹ Teme ya xhil lajuntuhl winiquetic ta jun na, ya me xchamic.

¹⁰ Te smohlol-ts'ahquil ya yich'be loq'uel ta na te sbaq'uetalic yu'un ya schic'ticlan, soc hich ya sjoc'obe te mach'a ay ta yutil te na: ¿Ay to bal mach'a sjoquinejat? xchi. Mayuc, xchi te yane. Soc hich me ya yal xan: Ch'aban, ma xhu' ya jtahtic ta halel te sbihil Jehová, xchi.

¹¹ Como te Jehová ya me yal mandar, hich busul ya xhil ta jinel te muc'ul na soc jc'axel ya xlaj te tut nahe.

¹² ¿Ya bal x'ahnimajic ta tontiquil te cawuhetique? ¿Ya bal stuquic lum tey a soc j'a'tel-wacaxetic? Pero ha'ex la ac'atp'unic ta veneno te stojil chahpanel, soc la ac'atp'unic ta bin ch'a te sit te bin stojil ta pasele.

¹³ Ha'ex, te tojol nax tse'el awo'tanic, hich yac awalic: ¿Ma bal lajuc jtahtic cu'eltic ta scuenta te quiptique? xchihex.

¹⁴ Hich ya yal te Jehová, te Dios te scuentahinej spisil: Ho'on ya jach jun nación ta atojolic, sna Israel, te ya yuts'inex c'alal ta yochibal Hamat ha to c'alal ta uc'um yu'un Arabá, xchi.