Amós 2 - Bible in Tzeltal Bachajón

¹ Hich yaloj te Jehová: Ta scuenta oxchahp mulil yu'un Moab, ta scuenta chanchahp, ma ba ya jcom te castigo yu'une; como la schic'be sbaquel te ajwalil yu'un Edom ha to tanub yu'un.

² Ya ca'be sc'ahc'al te Moab te ya slajinlan te tulan ts'ahquetic yu'un Queriot; ya xlaj Moab ta yohlil xnilet, c'alal ay aw yu'un guerra soc oq'uesinel corneta.

³ Ya jloq'uesbe te jtsobaw yu'un, ya jmil soc spisil te príncipaletic yu'un, xchi te Jehová.

⁴ Hich yaloj te Jehová: Ta scuenta oxchahp mulil yu'un Judá, ta scuenta chanchahp, ma ba ya jcom te castigo yu'une; como la sp'aj te ley yu'un Jehová, ma ba la sch'uhumbe te mandariletic yu'un, howiyic yu'un slotic, te ha nix la st'unic te sme'statique.

⁵ Ha yu'un ya ca'be sc'ahc'al te Judá, ha ya slajinlan te tulan ts'ahquetic yu'un Jerusalén, xchi.

⁶ Hich yaloj te Jehová: Ta scuenta oxchahp mulil yu'un Israel, ta scuenta chanchahp, ma ba ya jcom te castigo yu'une; como la schonic ta taq'uin te mach'a toj yo'tan soc la schonic te pobre ta stojol jchahp zapato.

⁷ Ya sts'o'ts'o'tec'beyic sjol ta ts'u'lum te mach'atic ma xhu' ya scoltay sbahic, soc ya showiytesic ta be te mach'atic peq'uel yo'tanique. Te winic soc te snich'an jtuhl nax ach'ix ya xwayic soc, hich ya sbohlobtesbonic sc'oblal te jch'ul bihile.

⁸ Ta sts'ehl biluc scajtajib ta chiq'uel mahtanil ya smehtsan sbahic ta c'u'ul te yich'ojic scuenta prenda, soc ta sna te diosetic yu'un ya yuch'ic vino te mambil tal ta multa te ma stojiluc ta pasele.

⁹ La jlajin ta stojolic te amorreohetic te hich snahtilic te bin ut'il te cedro soc hich ay yipic te bin ut'il te jihte'; la jlajimbe te sit ta toyol soc te slohp' ta ye'tal.

¹⁰ La jloq'uesex tal ta sq'uinal Egipto, soc la jquiq'uex bahel cha'winic (40) ha'bil ta jochol taquin q'uinal, yu'un yac awu'untaybe sq'uinal te amorreohe.

¹¹ La jach jalwanejetic ta yohlil awal-anich'nab, soc nazareohetic ta yohlil te ach'ix-queremetic awu'unique. ¿Ma bal hichuc, sts'umbalex Israel? xchi te Jehová.

¹² Pero te ha'exe la asujic ta yuch'el vino te nazareohetic, soc hich la awalbeyic ta mandar te jalwanejetic: Ma xawalic sc'op-jalwanej, xchihex.

¹³ Ha yu'un ya jtenex cohel tey ta banti ayex, hich te bin ut'il ya xtenawan te carreta te nojel ta trigo:

¹⁴ ma xhu' ya xloc' ta ahnel te mach'a tulan ya x'ahnimaj, te mach'a ay yip ma ba ya xcoltayot yu'un te yipe, soc te mach'a ma xiw ma xhu' ya scoltay scuxlejal;

¹⁵ te mach'a ya yac' t'ihmalte' ya x'ahn bahel, ma ba ya xcol te mach'a tulan ya x'ahnimaj, soc te jmohel ta cawu ma ba ya scoltay scuxlejal.

¹⁶ Te mach'a jc'axel ma xiw watal ya xloc' ta ahnel ta hich ora, xchi te Jehová.