Abdías 1 - Bible in Tzeltal Bachajón

Ya yich' pehc'anel Edom

¹ Te snahalsit Abdías. Hich yaloj te Jehová te Ajwalil sc'oblal Edom. Ca'iybeyejtic te sc'op Jehová, ticombil jal-c'op ta stojol te nacionetic, hich ya yal: ¡Hahchucotic! ya ca'betic guerra te pueblo ini, xchi.

² Tut ya cac'at ta yohlil te nacionetic, jc'axel p'ajbilat.

³ Ha la slo'loyat te stoybahil awo'tan, ha'at te nahinemat ta jamajtic tontiquil, te nahinemat ta toyol, te hich yac awal ta awo'tan: ¿Mach'a ya sjinon cohel ta lum? xchihat.

⁴ Aunque ya xwihlat mohel hich te bin ut'il jxic soc yac apas apechech ta yohlil te eq'uetic, tey ya jinat cohel tal a, xchi te Jehová.

⁵ Te ha'uc tal j'eleq'uetic ta atojol, te ha'uc tal yelc'ambat ta ahc'abal, (¡mero jimbil c'ohat!) ¿ma bal yacuc yelc'anic te ban c'alal ya sc'anic? Te ha'uc talic ta atojol te mach'atic ya stulic ts'usub, ¿ma bal yacuc yihquitayic hilel cha'oxchej?

⁶ ¡Jc'axel pojbil te bintic ay yu'un Esaú! La yich' lehbeyel te sc'ulejal te nac'bile.

⁷ Spisil te mach'atic jun awo'tan soc la slo'loyat; la yac'at bahel c'alal ta sti'il te q'uinale; Te mach'atic lamal q'uinal yac awa'iy soc, la stsalat; te mach'atic la swe'bat te pan awu'un la spasbat ayacol ta awe'tal. ¡Mayuc sp'ijil yo'tan te Edom!

⁸ Ta hich ora, xchi te Jehová, ya cac' ch'ayuc te p'ijil winiquetic yu'un Edom soc ya jlajin ta witsiltic yu'un Esaú te mach'atic ay snopojibal yu'unique.

⁹ Te mach'atic awu'un te ay yipic, Temán, ay me tulan xiwelic, spisil ants-winiquetic ta witsiltic yu'un Esaú ya yich'ic lajinel.

¹⁰ Ta scaj te la awuts'in te awihts'in Jacob, ya jmucat ta q'uexlal, soc jc'axel jimbil ya xhilat sbahtel q'uinal.

¹¹ Te c'alal ich'otic bahel yu'un jyanlumetic te sc'ulejal, te c'alal ochic bahel ta ochibaletic yu'un, soc la spasic seña ta na'el ta stojol Jerusalén, tey ayat a, pajal la awac' aba soc.

¹² Ma hichuc la sc'an te tse'el awo'tan ta scuenta awermano te bin c'ahc'alil te la yich' pehc'anel; ma hichuc la sc'an te tse'el awo'tan ta stojol te snich'nab Judá te bin c'ahc'alil la yich' jinel; soc ma hichuc la sc'an te la alaban te bin c'ahc'alil ay swocole.

¹³ Ma hichuc la sc'an te ochat ta yochibal te pueblo cu'un te bin c'ahc'alil la yich' jinel, ma hichuc la sc'an te tse'el awo'tan yu'un swocol te bin c'ahc'alil la yich' jinel, ma hichuc la sc'an te la awich'be te bintic ay yu'un te bin c'ahc'alil tal te swocole.

¹⁴ Ha nix hich ma hichuc la sc'an te la atehc'an aba ta jet-be yu'un yac amil te mach'atic yaquic ta ahnel; ma hichuc la sc'an te la awac' ta c'abal te mach'atic cuxul hilic ta sc'ahc'alel wocol.

Te sc'ahc'alel yu'un Jehová

¹⁵ Como nopolix te sc'ahc'alel yu'un Jehová ta stojol spisil te nacionetique. Hich te bin ut'il la apas, hich nix ya spasbotat; ha nix ya suht ta atojol te bintic la apase.

¹⁶ Hich te bin ut'il la awuch'ic ta ch'ul wits cu'un, hich me ya yuch'ic spisil ora te nacionetique; ya yuch'ic, bayel ya yuch'ic, hich ya xc'ohtic te bin ut'il mayuc bin ora cuxajic.

¹⁷ Pero ta wits Sión ay mach'atic hilemic te ya xcolique; ch'ultesbil ya xc'oht, soc te sna Jacob ya scha'ich'ic xan te bintic ay yu'un.

¹⁸ Ha c'ahc' ya xc'oht te sna Jacob, yat c'ahc' ya xc'oht te sna José, ha c'ajben te sna Esaú; ya slajinic ta c'ahc', mayuc mach'a cuxul ya xhil yu'un te sna Esaú, como hich yaloj te Jehová.

¹⁹ Te mach'atic ayic ta Neguev ya me yu'untayic te wits yu'un Esaú, soc te mach'atic ayic ta tsehletic ya me yu'untaybeyic sq'uinal te filisteohetique; soc ya me yu'untaybeyic te sq'uinal Efraín soc te sq'uinal Samaria. Te Benjamín ya me yu'untay Galaad.

²⁰ Te tsobol yu'un Israel te bahemic ta chuquel ya me yu'untaybeyic sq'uinal te cananeohetic c'alal ta Sarepta, soc te mach'atic yu'un Jerusalén te bahemic ta chuquel te ayic ta Sefarad ya me yu'untayic te pueblohetic yu'un te Neguev.

²¹ Te jcoltaywanejetic ya xmohic bahel ta wits Sión yu'un ya scuentahinic te wits yu'un Esaú. ¡Yu'un Jehová ya xc'oht te ban c'alal ay ta cuentahinele!