2 Samuel 9 - Bible in Tzeltal Bachajón

David soc Mefi-boset

¹ La sjoc'oy te David: ¿Ay to bal mach'a ay yu'un Saúl te cuxul hilel te ya xhu' ya jc'uxultay ta scuenta sna'ojibal te Jonatán? xchi.

² Ay jtuhl a'bat yu'un te mach'atic ay yu'un te chawinic Saúl, Siba sbihil. La sticonic ta iq'uel yu'un ya xtal ta stojol David. Te ajwalil la sjoc'obe: ¿Ha'at bal te Sibahate? xchi. Ho'on te a'baton awu'un, xchi.

³ ¿Ma bal ayuc mach'a ay yu'un Saúl te cuxul hilem te ya xhu' ya jc'uxultay ta scuenta Dios? xchi te ajwalil. Te Siba la sjac'be te ajwalil: Ay to hilem jtuhl snich'an Jonatán, chamen schebal yoc, xchi.

⁴ ¿Banti ay? xchi te ajwalil. Ay ta sna Maquir snich'an Amiel, ta Lodebar, xchi te Siba.

⁵ Ha yu'un te ajwalil David la sticon ta iq'uel tal ta sna Maquir snich'an Amiel, ta Lodebar.

⁶ Hich te Mefi-boset snich'an Jonatán, smam Saúl, tal ta stojol David, la snijan sba scuenta yich'el ta muc'. Mefi-boset, xchi te David. Li' ay te a'bat awu'un, xchi te Mefi-boset.

⁷ La yal te David: Ma xiwat, yu'un ya jc'uxultayat scuenta sna'ojibal te atat Jonatán. Ya me suht ta atojol spisil te sq'uinal te amamuch Saúl, soc spisil ora ya xwe'at ta mesa cu'un, xchi.

⁸ Te Mefi-boset la snijan sba, hich la yal: ¿Mach'a a te a'bat awu'un, te ay ta cuenta awu'un chamen ts'i' hich te bin ut'il te ho'one? xchi.

⁹ Ha yu'un te ajwalil la yic' tal te Siba te a'bat yu'un Saúl, hich la yalbe: La jca'beyix te smam te awajwal chawinic Saúl spisil te bintic ay yu'un soc nix te mach'atic ay yu'une.

¹⁰ Ha'at soc anich'nab soc te a'batetic awu'un ya me x'a'tejex ta sq'uinal soc ya me atsobeyic te sit bintic ya xloc' tey a, scuenta yu'un hich ay swe'el a te smam te chawinic awajwal. Pero te Mefi-boset, te smam te chawinic awajwal, ya xwe' spisil ora ta mesa cu'un stuquel, xchi. Te Siba ay ho'lajuntuhl (15) snich'nab soc jtahb (20) ta tuhl a'batetic yu'un;

¹¹ hich la sjac'be te ajwalil: Spisil te bin la awalix, ajwalil, hich me ya spas te a'bat awu'une, xchi. Hich te Mefi-boset spisil ora we' ta smesa David, hich bin ut'il snich'an te ajwalile.

¹² Te Mefi-boset ay jtuhl snich'an te tut to, Micaía sbihil. Spisil te mach'atic ay ta sna Siba ayic ta a'batinel yu'un Mefi-boset.

¹³ Te Mefi-boset, te chamen schebal te yoc, nahin ta Jerusalén como spisil ora ya xwe' ta smesa te ajwalile.