2 Samuel 8 - Bible in Tzeltal Bachajón

David ya smuc'ubtes banti ya scuentahin

¹ Ta patil te David la stsal te filisteohetic, la slajimbe yip, soc la spojbe loq'uel te Meteg-ama ta sc'ab te filisteohetique.

² Soc la stsal te moabetic. La ya'be slim sbahic ta lum, la sp'is ta lazo. La sp'is cha'p'is yu'un ya yac' ta milel, soc jp'is yu'un cuxul ya xhilic. Hich a'batetic c'oht yu'un David te moabetic, soc la stoj spatanic ta stojol.

³ Ha nix hich te David la stsal te Hadad-ezer snich'an Rehob, ajwalil yu'un Soba, te c'alal yac ta yich'el suhtel te sq'uinal ta muc'ul-ha' Éufrates.

⁴ Te David la stsac chanbahc' soc ho'winic (1,700) winiquetic te cajajtic ta cawu, soc j'ohlil yoxpic (20,000) soldadohetic te behel ta yoquic; la sbojticlambe schihal yacan te cawuhetic te ya snitic carretahetic yu'un guerra, pero la yihquitay hilel te jaycoht ya xtuhun yu'un snitel ho'winic (100) carretahetic.

⁵ C'alal talic te siriohetic yu'un Damasco ta scoltayel te Hadad-ezer ajwalil yu'un Soba, te David la smil cha'pic soc ho'lajunbahc' (22,000) arameohetic.

⁶ Te David la yac' soldadohetic te la scanantayic te arameohetic cuentahimbilic yu'un Damasco. Te arameohetic ha a'batetic c'ohtic yu'un David, soc la stoj spatanic ta stojol. Te Jehová la yac' ta tsalaw te David bayuc banti baht.

⁷ Te David la yich'be te smahquilic yu'un guerra te pasbilic ta oro te yich'ojic te winiquetic yu'un Hadad-ezer, la yich'ticlan bahel ta Jerusalén.

⁸ Ha nix hich la yich' bahel bayel bronce te ay ta Beta soc ta Berotai, pueblohetic yu'un Hadad-ezer.

⁹ Te Toi ajwalil yu'un Hamat, te c'alal la ya'iy te tsalotix yu'un David spisil te soldadohetic yu'un Hadad-ezer,

¹⁰ la sticon bahel Joram te snich'an ta stojol te ajwalil David ta spatbeyel yo'tan soc ta yalbeyel te lec te la ya'be guerra te Hadad-ezer soc te la stsal, como te Toi ayix ora a'bot guerra yu'un. Te Joram yich'oj biluquetic te pasbilic ta plata, oro soc ta bronce.

¹¹ Te David la ya'be Jehová spisil te biluquetic, hich te bin ut'il la spas soc te plata soc oro te talem ta spisil te nacionetic te la stsalticlan:

¹² ha te Edom, Moab, Amón, filisteohetic soc te amalequetic, soc te bintic la spojbe te Hadad-ezer snich'an Rehob, ajwalil yu'un Soba.

¹³ Puhc sc'oblal te David ta bayuc te c'alal suht tal ta stsalel cha'pic soc ho'bahc' (18,000) edometic ta Spamlej Ats'am.

¹⁴ La yotses soldadohetic ta scanantayel spisil te sq'uinal Edom, hich spisil te edometic ochic ta cuentahinel yu'un David. Te Jehová la yac' ta tsalaw te David bayuc banti baht.

Mach'atic ay ya'telic ta stojol David

¹⁵ Te David ay ta ajwalil ta stojol spisil Israel; la spas te bin toj soc te bin lec ta stojol spisil te pueblo.

¹⁶ Te Joab yal Sarvia, ha jtsobaw yu'un te soldadohetic yu'un; te Josafat snich'an Ahilud ha la sts'ihbay te bintic c'oht ta pasel.

¹⁷ Te Sadoc snich'an Ahitob soc te Ahimelec snich'an Abiatar ha sacerdotehetic; te Seraías ha jts'ihbajel;

¹⁸ te Benaía snich'an Joiada scuentahinej te cereteohetic soc te peleteohetic; te snich'nab David ha príncipaletic.