2 Samuel 4 - Bible in Tzeltal Bachajón

Ya yich' milel Is-boset

¹ Te c'alal la ya'iy te Is-boset snich'an Saúl te lajix ta Hebrón te Abner, jc'axel laj yip yo'tan, soc hahch ta xiwel spisil Israel.

² Te snich'an Saúl ay cheb winiquetic yu'un, ha jtsobawetic yu'un jchahp jpoj-biluquetic. Te jtuhle Baana sbihil, te yane Recab, ha snich'nab Rimón te beerot-winic, ha sts'umbalic Benjamín. (Como te Beerot ay ta scuenta Benjamín,

³ yu'un te c'alal loq'uic ta ahnel te mach'atic ayic ta Beerot, c'ohtic ta Gitaim, tey nahinemic c'alal ora hich te bin ut'il jyanlumetic.)

⁴ Te Jonatán snich'an Saúl, ay jtuhl snich'an te chamen schebal yoc. Ayix ho'eb ya'bilal a te hul ta halel ta Jezreel te lajix te Saúl soc te Jonatán. Te jcoltesej-alal la yic' bahel ta ahnel, c'alal yac ta tulan ahnel soc a, yahl te alal, hich coxo' hil. Ha Mefi-boset te sbihile.

⁵ Te Recab soc te Baana, te snich'nab Rimón te beerot-winic, bahtic ta sna Is-boset ta yorahil sc'uxul c'ahc'al, yac ta cux-o'tan ta swayib a.

⁶ Te jcanan-ti'nahil ants yac ta stsahel trigo, pero och swayel. Te Recab soc Baana te yermano, ochic bahel ta na.

⁷ C'alal ochic bahel ta yutil na, te Is-boset wayal ta swayib a c'oht stahic; la smilic soc la set'beyic sjol, la yich'beyic bahel. Sjunal ahc'abal behenic bahel ta sbehlal Arabá.

⁸ La yich'beyic bahel te sjol Is-boset ta stojol David ta Hebrón. Hich la yalbeyic te ajwalil: Li' ay te sjol Is-boset snich'an Saúl, ha te acontra te la sle bin ya yut ya smilat. Te Jehová la spacbeyix sc'abal yo'tic te cajwal ta stojol te Saúl soc te sts'umbale, xchihic.

⁹ Te David la sjac'be sc'opic te Recab soc te yermano Baana, snich'nab Rimón te beerot-winic, hich la yal: ¡Yiloj Jehová! te la scoltaybon jch'uhlel ta spisil mel-o'tan.

¹⁰ Te mach'a tal yalbon: Lajix te Saúl, te xchihe, la scuy te lec te bin tal yalbon; pero la jtsac, la jmil tey ta Siclag scuenta stojol te bin tal yalbon.

¹¹ ¿Ma bal c'axuc to xan hich ya jpasbe a te chopol winiquetic te la smilic ta sna soc ta swayib te mach'a toj ta winiquil? Ha yu'un ¿ma bal yacuc sc'an te ya jc'ambeyex sch'ich'el ta acuentahic soc te ya jtup'ex ta q'uinal? xchi.

¹² Ha yu'un te David la spas ta mandar te winiquetic yu'un, hich la smilic, la set'ticlambeyic yoc sc'abic, la sjihpanic ta nopol yawil ha' ta Hebrón. Patil la yich'beyic te sjol Is-boset, la smuquic ta smuquenal Abner ta Hebrón.