2 Samuel 3 - Bible in Tzeltal Bachajón

¹ Halaj te guerra te la ya'be sbahic te jchahp yu'un Saúl soc te chahp yu'un David; pero te David behbe yich'bel yip, yan te jchahp yu'un Saúl behbe yac ta pehc'ajel yip stuquel.

Mach'atic ayin yu'un David ta Hebrón

² Ayinic snich'nab David te c'alal ay ta Hebrón; ha ba-alal te Amnón, ha yal Ahinoam te ants talem ta Jezreel;

³ te schebal, Quileab, ha yal Abigail te me'ba' ants yu'un Nabal te talem ta Carmel; te yoxebal, Absalón, ha yal Maaca te yantsil-nich'an Talmai, ajwalil yu'un Gesur;

⁴ te schanebal, Adonías, ha yal Haguit; te yo'ebal, Sefatías, ha yal Abital;

⁵ te swaquebal, Itream, ha yal Egla te yan yihnam David. Ha'ic te ayinic c'alal ay ta Hebrón a te David.

Abner ya schap sc'op soc David ta Hebrón

⁶ Te c'alal ay guerra yu'un te sna Saúl soc te sna David, te Abner xquechet ta yich'el yip ta scuenta te mach'atic ay yu'un Saúl.

⁷ Te Saúl ay yan ants yu'un, Rizpa sbihil, ha yantsil-nich'an Aja. Te Is-boset hich la yalbe te Abner: ¿Bin yu'un wayat soc te yan ants yu'un te chawinic jtat? xchi.

⁸ Te Abner bayel ilin yu'un te bin halbot yu'un te Is-boset, hich la yalbe: ¿Yu'un bal sjol ts'i'on ta ac'op te ayon ta a'batinel yu'un Judá? C'alal ora jun co'tan ta stojol te sts'umbal atat Saúl, ta stojol te yermanotac soc te mach'atic jun yo'tan sba soc, ma ba cac'ojat ta sc'ab David; yo'tic ¿ya bal alehbon jmul ta scuenta jtuhl ants?

⁹ Dios ac'a ya'be c'ax tulan castigo te Abner teme ma ba ya jpasbe te David te bin halbot yu'un te Jehová,

¹⁰ ha te ya yich' loq'uesel ta ajwalil te sts'umbal Saúl, ha ya x'och ta ajwalil yu'un Israel soc Judá te David, c'alal ta Dan ha to c'alal ta Beerseba, xchi.

¹¹ Te Is-boset ma ba la sjac'be p'ahluc sc'op te Abner, yu'un la xi'.

¹² Hich te Abner ta stuquel-o'tan la sticon bahel winiquetic ta stojol David yu'un hich la yalbeyic: ¿Mach'a yu'un te q'uinale? Ya jchap jc'optic; ya jcoltayat te yacuc xtalic ta atojol spisil Israel, xchi.

¹³ Hich la yal te David: Lec ay, ya jchap jc'optic, pero ay bin ya jc'ambat: Ma me xtal awilon ha to teme la awic'bon tal te Mical snich'an Saúl, xchi.

¹⁴ Soc te David la sticon bahel mach'atic hich baht yalbeyic te Is-boset snich'an Saúl: Sutbon tal te quihnam Mical te la jquic', te la jel ta ho'winic (100) snuhculel sjol sc'unil sbaq'uetal filisteohetic, xchi.

¹⁵ Ha yu'un te Is-boset la sticon ta pojel te ants ta stojol te smamalal, ha te Paltiel snich'an Lais.

¹⁶ Pero te Paltiel la st'un bahel, yac ta oq'uel bahel c'alal ta Bahurim. Hich halbot yu'un Abner: Bahan, suhtan bahel, xchi. Hich suht bahel.

¹⁷ Ha yu'un te Abner hich la yalbe te mamaletic yu'un Israel: Ayix ora te yaquex ta sc'anel te ya x'och ta ajwalil awu'unic te David.

¹⁸ Pasahic hiche, como te Jehová hich yalbeyejix te David: Ta scuenta sc'ab te ca'bat David ya jcoltay loq'uel te jpueblo Israel ta sc'ab filisteohetic soc ta sc'ab spisil scontrahic, xchi.

¹⁹ Te Abner ha nix la sc'opon te sts'umbal Benjamín. Patil baht ta Hebrón scuenta yu'un ya yalbe ya'iy te David te bin la yalic te Israel soc spisil te sts'umbal Benjamín.

²⁰ Te Abner tal ta stojol David ta Hebrón soc jtahb (20) ta tuhl winiquetic. Te David la schahpan lequil we'elil yu'un te Abner soc te mach'atic sjoquinej.

²¹ Te Abner hich la yalbe te David: Ya xloc'on bahel, ya jtsob spisil Israel ta stojol te cajwal; ya schap sc'opic ta atojol, hich yac awa'iy cuentahinwanej chican ban c'alal ya sc'an awo'tan, xchi. Hich te David la spatbe bahel yo'tan te Abner, hich lamal q'uinal a baht.

Joab ya smil Abner

²² Te Joab soc te winiquetic yu'un David hich ora hulic tal ta spojel biluquetic, bayel bin yich'ojic tal. Pero te Abner ma ba tey ayix a ta banti ay David ta Hebrón, como bahemix a, lamal q'uinal a suht bahel.

²³ Te c'alal c'oht te Joab soc spisil te soldadohetic sjoquinej, hich halbot ya'iy: Te Abner snich'an Ner xtaluc ta stojol te ajwalil, patbot bahel yo'tan, hich lamal q'uinal loc' bahel, xchi.

²⁴ Ha yu'un te Joab tal ta stojol te ajwalil, hich la yalbe: ¿Bin la apas? Tal ta atojol te Abner; ¿bin yu'un te la awac' suhtuc bahel?

²⁵ Ana'ojbe stalel te Abner snich'an Ner. Ha nax tal slo'loyat, soc ha nax tal stsahtayat te bin ora ya xloc'at bahel soc te ya suhtat talel, soc spisil te bintic yac apas, xchi.

²⁶ C'alal loc' bahel ta stojol David te Joab, la sticon bahel winiquetic ta stojol Abner, la yiq'uic suhtel tal ta pozo yu'un Sira. Ma ba sna'oj te David.

²⁷ Te c'alal suht tal ta Hebrón te Abner, te Joab la yic' bahel ta jehch sti'il yochibal te pueblo scuenta yu'un ya sc'opon ta muquen. Tey la yehchentes ta sch'uht a te Abner scuenta sutbeyel spacol te milbot te yihts'in Asael, hich laj te Abner.

²⁸ Ta patil, c'alal la ya'iy te David, hich la yal: Ho'on soc te ban c'alal jmacoj ta ajwalil stalel mayuc jmulcotic ta stojol Jehová yu'un te sch'ich'el te Abner snich'an Ner.

²⁹ Ac'a c'ohtuc te mulil ta stojol Joab soc spisil mach'atic ay yu'un ta sna te state. Spisiluc ora ay me mach'a ya xloc' pojow, o te ay sc'a'el-chamel, coxo', te ya xlaj ta espada, o te mayuc swe'el, xchi.

³⁰ Hich te Joab soc Abisai te yermano, la smilic te Abner, como ha milbot te yihts'inic yu'un te c'alal ay guerra ta Gabaón.

³¹ Ha yu'un te David hich la yalbe te Joab soc spisil te mach'atic sjoquinej: Ch'i'a ac'u'ic soc lapahic pac' yu'un mel-o'tan, oq'uetayahic te Abner, xchi. Te ajwalil David baht at spat te schahchamte'el

³² c'alal la smuquic ta Hebrón te Abner. Te ajwalil tulan la yoq'uetay ta sts'ehl te muquenal. Ha nix hich oc' spisil te pueblo.

³³ Te ajwalil la sc'ayojtay te c'ayoj ini ta scuenta mel-o'tan yu'un te Abner, hich la yal: ¿Hich bal la sc'an te ya xlaj Abner te bin ut'il ya xlaj jtuhl sonso?

³⁴ Ma ba chucbil ac'ab, soc ma ba chucbil ta cadena awoc. Hich lajat te bin ut'il mach'a ya xlajinot yu'un mach'atic chopol yo'tanic, xchi. Hich spisil te pueblo la yoq'uetayic xan te Abner.

³⁵ Patil spisil te pueblo tal yalbeyic wocol te David te yacuc xwe' te c'alal ma to xmahl a te c'ahc'ale. Pero te David la yal ta jamal: Hich me ac'a spasbon Dios, soc c'ax to xan hich a, teme ya jwe' pan o yan we'elil te c'alal ma to ba mahlem c'ahc'al a, xchi.

³⁶ Spisil te pueblo la sna'ic bin la spas, lec la ya'iyic. Spisil te bintic la spas te ajwalil, lec la ya'iy te pueblo.

³⁷ Ta hich ora spisil te pueblo soc spisil Israel la sna'ic te ma ha'uc ta scuenta te ajwalil te laj te Abner snich'an Ner.

³⁸ Soc te ajwalil hich la yalbe te winiquetic yu'un: ¿Yu'un bal ma ba ana'ojic te lajemix ta Israel jtuhl príncipal soc te mach'a muc' sc'oblal?

³⁹ Mayuc quip yo'tic, aunque tsahbilon ta ajwalil. Te winiquetic ini, ha te yalatac Sarvia, c'ax tulanic stuquelic. ¡Ac'a ya'be stoj Jehová te mach'a chopol bin ya spas, ha chican bin yilel te schopolile! xchi.