2 Samuel 22 - Bible in Tzeltal Bachajón

C'ayoj yu'un la ya'iy tsalaw David

¹ Te David la sc'ayojtay Jehová ta scuenta te c'ayoj ini c'alal coltayot yu'un Jehová ta sc'ab spisil scontratac soc ta sc'ab Saúl.

² Hich la yal: Te Jehová ha toyol ch'entiquil cu'un, ha tulan ahnibal cu'un soc jcoltaywanej cu'un;

³ ha Dios cu'un, ha muc'ul ton cu'un ta banti ya jnac' jba; ha jmahquil soc ha yip te jcolele, ha toyol ahnibal cu'un soc jcoltaywanej cu'un, la acoltayon ta uts'inel.

⁴ Ya jc'opon te Jehová te ay ta halbeyel yutsil, ya me xcolon yu'un te jcontratac.

⁵ La sjoytayon bayel lajel, la xiwteson te yip te bin chopol.

⁶ Te schuhquil te muquenal la sjoytayon; la ya'bon ta jtojol te lazohetic yu'un lajel.

⁷ C'alal ay jwocol a la jc'opon te Jehová, la jcawtay te Dios cu'un. La ya'iybon jc'op c'alal ta templo yu'un; c'oht ta schiquin te caw.

⁸ Yuc'ot soc nihc te q'uinale, soc la syuc' sbahic te yich'o-ip te ch'ulchan; la stij sbahic como ilin te Diose.

⁹ Loc' ch'ahil ta sni', loc' lajinwanej c'ahc' ta ye, soc loc' tsumbil ac'aletic.

¹⁰ La sjat te ch'ulchan, co talel; ay yihc'al q'uinal ta ye'tal yoc.

¹¹ Mo ta querubín soc wihl bahel; wihl bahel ta sba xic' yu'un te iq'ue.

¹² La yac' yihc'al q'uinal ta sjoyobal scuenta smahquil, yihc'al q'uinal soc pimil tocal te ay ya'lel.

¹³ Ta sts'anabul ta stojol loc' bahel tsumbil ac'aletic.

¹⁴ T'ohm hich te bin ut'il chahwuc c'alal ch'ulchan te Jehová, te Mach'a toyol ay, tulan c'opoj.

¹⁵ La st'im bahel te ya'tejibal st'ihmalte' soc la spucticlan, la yac' tal tsantsehwal, la slajinlan.

¹⁶ Chicnaj hilel ye'tal te mar, chicnaj hilel te yich'o-ip bahlumilal, ta scaj te tulan tsitsel yu'un Jehová, ta scaj tulan ic' te loc' ta sni'.

¹⁷ La yac' cohel tal sc'ab c'alal ta toyol, la stsacon; la sloq'ueson ta banti bayel ha'etic.

¹⁸ La scoltayon ta sc'ab te jcontra te bayel yip, ta sc'ab te mach'atic la sp'ajonic, aunque c'axem hich yipic a te bin ut'il ho'on.

¹⁹ Tal stsaconic te c'alal ay jwocol, pero la scoltayon te Jehová.

²⁰ La sloq'ueson, la yac'on ta jamal q'uinal, la scoltayon como lecon ta yo'tan.

²¹ Te Jehová la ya'bon jtojol hich te bin ut'il toj ca'tel; la ya'bon jmahtan hich te bin ut'il lec ca'tel.

²² Como la jcanantay te behetic yu'un, ma ba howiyon bahel ta spasel bin chopol ta stojol te Dios cu'une.

²³ Ay ta jtojol spisil te bin yaloj ta mandar, ma ba howiyemon ta stojol te chahpambil mandariletic yu'une.

²⁴ Toj la jcac' jba ta stojol, jcanantayej jba yu'un ma ba ya jta jmul.

²⁵ Te Jehová la ya'bon jmahtan hich te bin ut'il toj ca'tel; hich te bin ut'il lec ca'tel ta stojol te site.

²⁶ Jun awo'tan ta stojol te mach'a jun yo'tan ta atojol, soc lec te bin yac apasbe te mach'a lec te bin ya spasbat.

²⁷ Te mach'a sac yo'tan yac awa'be yil sac awo'tan; tulan yac awac' aba ta stojol te mach'a chopol.

²⁸ Yac acoltay te mach'atic peq'uel ayic, pero yac apehc'an te mach'a toyol ya yac' sba.

²⁹ Ha'at tsumbil c'ahc'at cu'un, Jehová; ha Dios cu'un te ya sacubtesbon te yihc'al q'uinal.

³⁰ Ta acuenta ya jtsal te jcontra, ta scuenta te Dios cu'un ya xmohon c'axel ta ts'ahc.

³¹ Te Dios, lec te be yu'une; ay yutsil te sc'op te Jehová. Ha smahquil ta stojol spisil mach'atic ya yac' sbahic ta scuenta.

³² Como ¿mach'a a te ha Dios, ma bal ha'uc nax te Jehová? ¿Soc mach'a a te ha muc'ul ton; ma bal ha'uc te Dios cu'untique?

³³ Ha te Dios te ya ya'bon quip, soc te ya slecubtesbon te be cu'une;

³⁴ ya ya'bon coc hich te bin ut'il yoc chij, ya yac' tehc'ajucon ta stoyolil.

³⁵ Ya xchahpambon jc'ab ta yaq'uel guerra, hich ya xhu' ya xpuxq'uij ta jc'ab te t'ihmalte' pasbil ta bronce.

³⁶ La awa'bon te smahquil te colel awu'un, te yutsil awo'tan la smuc'ubtesbon jc'oblal.

³⁷ La amuc'ubtesbon te banti ya xbehenon, mayuc banti bilts'uj coc.

³⁸ La jnuts bahel te jcontratac, la jlajinlan; ha to suhton tal a te c'alal la jlajinlan.

³⁹ La quehchentes soc la jlajin, hich ma hu' stambel sbahic; yahlic ta ye'tal coc.

⁴⁰ La awa'bon quip ta yaq'uel guerra; la awa'be spehc'an sbahic ta jtojol te jcontratac.

⁴¹ La awac' suhtuc ta spatic ta jtojol te jcontratac, scuenta yu'un ya jlajinlan te mach'atic ya sp'ajonic.

⁴² Awonic, pero mayuc mach'a coltayotic yu'un; la yawtayic te Jehová, pero ma ba jac'botic yu'un.

⁴³ La juch', hich te bin ut'il ts'u'lum c'ohtic; la jts'ot ta teq'uel hich te bin ut'il ahch'al ta callehetic.

⁴⁴ La acoltayon loq'uel ta utamba yu'un te pueblo cu'un, la acanantayon scuenta jolal c'ohon yu'un nacionetic; te pueblo te ma ba la jna'be sba la jca'batin.

⁴⁵ Te yal-snich'nab jyanlumetic ya yac' sbahic ta jcuenta; te c'alal ya ya'iyonic, ya sch'uhumbonic jmandar.

⁴⁶ Te jyanlumetic laj yipic, yacalic ta nihquel a ya xloq'uic tal ta yahnojibic.

⁴⁷ ¡Cuxul te Jehová, bayel yutsil te muc'ul ton cu'un! Muc'uc sc'oblal te Dios te Jcoltaywanej cu'un.

⁴⁸ Ha te Dios te ya suhtesbe spacol cu'un, soc ya ya'bon ta jcuenta te pueblohetique.

⁴⁹ Ha te ya yac'on ta libre yu'un jcontratac, ya stoybon jc'oblal ta stojol te mach'atic ya xhahch scontrahinon, yac acoltayon ta stojol j'uts'inwanej.

⁵⁰ Ha yu'un ya calbat yutsil ac'oblal ta stojol te nacionetic, soc ya jc'ayojtaybat abihil.

⁵¹ Ha ya scoltay ta tsalaw te ajwalil yu'un; ya ya'be yil sc'uxul yo'tan te mach'a tsahbil yu'un, ha te David soc te sts'umbal ta sbahtel q'uinal, xchi ta c'ayoj.