2 Samuel 21 - Bible in Tzeltal Bachajón

Spacol yu'un gabaonetic

¹ Te c'alal ay ta ajwalil a te David, tal wi'nal, oxeb ha'bil la stic' sba. Te David la sjoc'obe te Jehová, hich halbot yu'un: Ha ta scuenta Saúl soc te sna te la smal ch'ich', como la smilticlan te gabaonetic, xchi.

² Ha yu'un te ajwalil la yic' tal te gabaonetic, la sc'opon. (Te gabaonetic ma ha'uc snich'nab Israel, ha sts'umbal amorreohetic te ay to hilique. Te snich'nab Israel ay bin la yalbeyic ta jamal, pero te Saúl c'an smilticlan scaj xut'et yo'tan yu'un te snich'nab Israel soc Judá.)

³ Te David la sjoc'obe te gabaonetic: ¿Bin ya jpasbeyex ta atojolic? ¿Binti lec yac awa'iyic te ya ca'beyex scuenta yu'un yac awa'beyic bendición te mach'atic yu'un Jehová? xchi.

⁴ La sjaq'uic te gabaonetic: Ma ta scuentahuc plata soc oro te bin quechel cu'untic soc te Saúl soc sna, soc ma jc'ancotic te ay mach'a ya xlaj ta Israel, xchihic. Ya jpas te bin yac awalbonic, xchi te David.

⁵ Hich la sjac'beyic te ajwalil: Te winic te ya c'an slajinotcotic soc te la snop te jc'axel mayuc mach'a ya xhil cu'uncotic ta spisil sq'uinal Israel,

⁶ a'botcotic huctuhl snich'nab yu'un ya jihpambecotic sbaq'uetalic ta te' ta stojol Jehová ta Gabaa yu'un Saúl, te tsahbil yu'un Jehová, xchihic. Ya ca'beyex, xchi te ajwalil.

⁷ Te ajwalil la sc'uxultay te Mefi-boset snich'an Jonatán, snich'an Saúl, scaj te ay bin yalojic ta jamal ta stojol Jehová te David soc te Jonatán snich'an Saúl.

⁸ Pero te ajwalil la yic' te Armoni soc Mefi-boset te yalatac Rizpa yantsil-nich'an Aja, te ha yal-snich'nab soc te Saúl, soc la yic' te ho'eb yalatac Merab yantsil-nich'an Saúl, te ha yal-snich'nab soc te Adriel snich'an Barzilai te mehola-winic.

⁹ La yac'ticlambe ta sc'ab te gabaonetic te la sjihpambeyic sbaq'uetalic ta te' ta wits ta stojol Jehová. Pajal lajic te huctuhlic, ha lajic ta yorahil shahchel ta tsobel cebada.

¹⁰ Te Rizpa yantsil-nich'an Aja la stsac pac' scuenta mel-o'tan, la slim bahel yu'un ya xihc'an sba ta muc'ul ton. Tey ay a ta yorahil shahchel ta tsobel cebada ha to c'alal tal te ha'ale. Ma ba la yac' luhtsajuc jcohtuc mut ta sba te mach'atic lajemic ta c'ahc'alel soc ha'mal chambahlametic ta ahc'abal.

¹¹ C'alal halbot ya'iy te David te bin spasoj te Rizpa yantsil-nich'an Aja, te yan ants yu'un Saúl,

¹² baht yich'be tal te sbaquel Saúl soc te sbaquel Jonatán te snich'an te ayic ta stojol te winiquetic yu'un Jabes ta Galaad te elc'ambotic tal yu'unic ta plaza yu'un Bet-sán, te banti jihpambot sbaq'uetalic yu'un te filisteohetic te c'alal la smilic te Saúl ta Gilboa.

¹³ Te David la yac' ta ich'el bahel tey a te sbaquel Saúl soc te sbaquel Jonatán te snich'an, soc nix te sbaquelic te mach'atic lajic ta jihpanel.

¹⁴ La smucbeyic te sbaquelic Saúl soc Jonatán ta smuquenal Cis te stat Saúl ta Zela, ta sq'uinal Benjamín. La spasic spisil te bin pasotic ta mandar yu'un te ajwalil. Ta patil te Dios la sna'be yo'bolil sba te q'uinale.

Abisai la scoltay ta milel David

¹⁵ Te filisteohetic la ya'beyic guerra yan buelta te snich'nab Israel. Ha yu'un te David soc te winiquetic yu'un cohic bahel ta ya'beyel guerra te filisteohetique. Luhb te David,

¹⁶ ya c'an milec yu'un te Isbi-benob, jtuhl sts'umbal nahtil winic, te ho'lajunwinic (300) siclo yu'un bronce te yalal te slanza soc te chucul ta sch'uht yach'il espada.

¹⁷ Pero te Abisai yal Sarvia c'oht ta coltayel yu'un, la yehchentes te filisteo, la smil. Ha yu'un te winiquetic yu'un David hich la yalbeyic ta jamal: Ma me ayuc bin ora yac ajoquinotcotiquix ta guerra, scuenta yu'un ma ba yac atup' te tsumbil c'ahc' ta Israel, xchi.

Te winiquetic yu'un David ya smilic nahtil winiquetic

¹⁸ Hahch guerra yan buelta soc te filisteohetic ta Gob. Te Sibecai te husa-winic la smil te Saf, te ha sts'umbal te nahtil winiquetic.

¹⁹ Yan buelta hahch guerra soc te filisteohetic ta Gob; te Elhanán snich'an Jaare-oregim te talem ta Belén, la smil te Goliat te talem ta Gat; te lanza yu'un pajal soc ste'el muc'ul jalabil.

²⁰ Patil hahch yan guerra ta Gat, te banti ay mero nahtil winic te ay lahchayeb (12) yal sc'ab soc lahchayeb (12) yal yoc, chaneb scha'winic (24) ta spisil; ha nix hich sts'umbal te nahtil winiquetique.

²¹ Ha la shachbe yo'tan te Israel, milot yu'un te Jonatán snich'an Simea, sbanquil David.

²² Ta schanebalic ini, te sts'umbal te nahtil winiquetic ta Gat, lajic ta milel yu'un David soc te winiquetic yu'une.