2 Samuel 2 - Bible in Tzeltal Bachajón

David och ta ajwalil ta Judá

¹ Patil te David la sjoc'obe te Jehová: ¿Ya bal xhu' ya xmohon bahel ta junuc pueblo ta sq'uinal Judá? xchi. La yal te Jehová: Mohan bahel, xchi. ¿Banti ya xbohon? xchi te David. La sjac' te Jehová: Ta Hebrón, xchi sc'oblal.

² Tey mo bahel a te David soc te cheb antsetic yu'un, ha te Ahinoam te talem ta Jezreel soc te Abigail te me'ba' ants yu'un Nabal te talem ta Carmel.

³ Soc te David la yic' bahel te winiquetic te sjoquinejic, jujutuhl soc te mach'atic ay yu'unic, c'ohtic ta nahinel ta pueblohetic yu'un Hebrón.

⁴ Patil talic te winiquetic yu'un Judá, la smalic ta aceite scuenta ajwalil ya xc'oht yu'un Judá. Te c'alal la yalbeyic te David te ha la smuquic te Saúl te mach'atic ayic ta Jabes ta sq'uinal Galaad,

⁵ te David la sticon bahel winiquetic ta stojol te winiquetic yu'un Jabes ta sq'uinal Galaad, hich la yalbeyic: Ac'a ya'beyex bendición te Jehová yu'un te la ac'uxultayic te Saúl te ajwalil awu'unic, te la amuquique.

⁶ Ac'a sna'beyex yo'bolil abahic te Jehová soc junuc me yo'tan ta atojolic. Ha nix hichon lec bin ya jpasbeyex yu'un te hich la apasique.

⁷ Ac'ahic me fuersa soc ayuc me yip awo'tanic, yu'un lajix te Saúl te ajwalil awu'unic, soc ha la smalonic ta aceite te sts'umbal Judá yu'un ya x'ochon ta ajwalil yu'unic, xchi.

Guerra yu'un David soc mach'atic ay yu'un Saúl

⁸ Pero te Abner snich'an Ner, te jtsobaw yu'un te soldadohetic yu'un Saúl, yic'ojix bahel ta Mahanaim a te Is-boset snich'an Saúl,

⁹ la yotses ta ajwalil yu'un Galaad, Gesuri, Jezreel, Efraín, Benjamín soc spisil Israel.

¹⁰ Ay cha'winic (40) ya'bilal a te Is-boset snich'an Saúl te c'alal och ta ajwalil ta Israel, cheb ha'bil ay ta ajwalil. Pero te sts'umbal Judá la st'unic te David.

¹¹ Te jayeb ha'bil te ay ta ajwalil yu'un Judá ta Hebrón te David, ha huqueb ha'bil soc waqueb u.

¹² Te Abner snich'an Ner, loc' hahchel ta Mahanaim, baht ta Gabaón soc te winiquetic yu'un Is-boset snich'an Saúl.

¹³ Te Joab te yal Sarvia, soc te winiquetic yu'un David loq'uic bahel, c'oht stahic ta yawil ha' yu'un Gabaón. Jchahp la shuhcan sbahic ta jehch yawil ha' soc jchahp ta yan jehch.

¹⁴ Te Abner hich la yalbe te Joab: Ac'a hahchuc ya'be sbahic ta jtojoltic te queremetique, xchi. Ac'a hahchuquic, xchi te Joab.

¹⁵ Ha yu'un loq'uic hahchel soc c'axic bahel lahchaytuhl (12) yu'un Benjamín soc Is-boset snich'an Saúl, soc lahchaytuhl (12) a'batetic yu'un David.

¹⁶ Jujutuhl la stsacbe sjol te scontra, la slow ta espada ta smochbaquel te scontra, hich pajal lajic spisilic. Ha scuentahil te Helcat-hazurim, sbihil c'oht te lugar te ay ta Gabaón.

¹⁷ Ta hich ora mero tulan c'oht te guerra yu'unique. Te Abner soc te winiquetic yu'un Israel tsalotic yu'un te winiquetic yu'un David.

¹⁸ Tey ayic a te oxeb yalatac Sarvia: ha te Joab, Abisai soc Asael. Te Asael mero ya xhu' yahnimal hich te bin ut'il ha'mal chij.

¹⁹ Ha la snuts bahel te Abner, ma ba loc' bahel ta wa'el o ta q'uexam.

²⁰ Te Abner la sut sit la yil ta spat, hich la yal: ¿Ha'at bal, Asael? xchi. Ho'on, xchi.

²¹ Ha yu'un te Abner la yalbe: Loc'an bahel ta wa'el o ta q'uexam, tsaca jtuhluc te yantic winiquetic, ich'beya te bintic ay yu'un, xchi. Pero te Asael ma ba la squehchan snutsel.

²² Te Abner la scha'halbe te Asael: Ma me xanutsonix, ¿bin yu'un ya quehchentesat yu'un ya jmilat? ¿Bin ut'il ya xhu' ya quilbe sit a hiche te abanquil Joab? xchi.

²³ Pero te Asael ma ba la sc'an loc' bahel, ha yu'un te Abner la slow ta ste'el slanza ta sch'uht, loc' ta spat, hich puch' bahel, tey laj a. Spisil te mach'atic c'ohtic tey ta lugar te banti laj te Asael, la stehc'an sbahic ta yilel.

²⁴ Pero te Joab soc te Abisai baht snutsic te Abner. Yaquix ta mahlel c'ahc'al a c'ohtic ta tut wits Amma te snuhp'usitayej sba soc Gía ta sbehlal te jochol taquin q'uinal yu'un Gabaón.

²⁵ La stsob sbahic te snich'nab Benjamín ta stojol Abner, jchahp nax soldadohetic c'ohtic, la yac' sbahic ta ba wits.

²⁶ Hich te Abner la yawtay te Joab: ¿Stalel bal ya xlajinwan te espada? ¿Ma bal ana'ojuc te wocol ya xc'oht ta loq'uel ini? ¿Bin to ora yac awalbe te winiquetic awu'un te ya yihquitay snutsel te yermanotac? xchi.

²⁷ La sjac' te Joab: ¡Xyil Dios! te manchuc hich la awal, te winiquetic la snutsic te yermanotac c'alal sacubel q'uinal te hichuque, xchi.

²⁸ Ha yu'un te Joab la yoq'uesin xulubil, spisil te winiquetic la slahman sbahic; ma ba la snutsiquix bahel te israeletic, soc ma ba la ya'beyiquix guerra.

²⁹ Te Abner soc te winiquetic yu'un sjunal ahc'abal behenic c'axel ta Arabá, sohlic bahel ta Jordán, behenic c'axel ta Bitrón, c'ohtic c'alal ta Mahanaim.

³⁰ Te Joab la squehchan snutsel te Abner soc la stsob spisil te winiquetic yu'un. Ch'ay Asael soc balunlajuneb (19) ta tuhl winiquetic yu'un David.

³¹ Pero te winiquetic yu'un David la smilic waxaclajunwinic (360) ta tuhl winiquetic yu'un Benjamín te sjoquinejic Abner.

³² Patil la yich'beyic bahel te sbaq'uetal Asael, baht smuquic ta Belén ta smuquenal stat. Te Joab soc te winiquetic yu'un sjunal ahc'abal behenic, yac ta sacubel q'uinal a c'ohtic ta Hebrón.